سینے جھوکاں دیدیں دیرے(40)||نذیر لغاری

ڈسٹرکٹ لائن دی ٹیوب پکڑتے ایسٹ ہیم کنوں وکٹوریہ اسٹیشن پچ گیاں اجاں جاوید کائنی پناں ’جاوید سومرو بی بی سی کنوں وندا تھی تے اتھاں آوسی سوچیم جو ایچ آراسمتھ دا پھیرا ماراں اے ہک ہک شاپ ہے ساڈے ریلوے اسٹیشنیں تے وی کتابیں دے اسٹال ہوندن پر وکٹوریہ ہک شاپ اسلام آباد دیسٹربکس کنوں وی وڈی ہے لندن اچ ایجھے اݨ ڳیݨویں بک اسٹال تے کتابیں دیاں دکاناں ہن ۔اتھاں ہک ڈینہہ اچ ہک کتاب اتلا وک ویندی ہے جتلااساں ساریاں کتاباں سارا وچیندوں ملتان تے بہاول پوراچ کتابیں دی وکری بہوں ڳھٹ تھیندی ہے ضلع رحیم یارخان دیرہ غازی خاں اتے راجن پور اچ کجھ نہ کجھ کتاباں وک ویندین ول ایڈوں احمد پو رشرقیہ اچ لوکیں کوں کتابیں پڑھݨ دا خفت ہے پراساں پڑھاکوقوم نسے بݨ سڳئیے اپچ آرا سمتھ اچ کتابیں دے اڑڳ لاتھسن ۔ہر نواں ناول شاعری تاریخ برطانوی ادب امریکی ادب عالمی ادب دے ترجمے اتے تاریخ دیاں نویاں پراݨیاں کتاباں مل ویسن میں اتھاں دستوفسکی ٹالسٹائی اتے بنھیں روسی ادیبیں دیاں کتاباں وی ڈٹھئن ۔ہک کتاب ساڈے غلام مصطفی کھر دی۹ ویں زال تہمینہ درانی دی وی لاتھی ہے balasphamyناں سݨ تے ادرکا آویندے چھرکی نکل ویندی ہے جاویدکائنی آیاتریہہ لگی ہے پاݨی تاں پیووں ہا منرل واٹردی چھوٹی جہیں بوتل دے ۴۵ روپےگھدے نے شابش ہے وے پاݨی پی تے بوتل ہک ڈبے اچ سٹ ڳھتیم ہݨ واش روم گولوں سامݨھے واش روم پنوسے ہݨ اہدن ۴۵ روپے ڈیو تھک ہے وے انھیں تاں پاݨی دی بوتل تے واش روم دا بھاڑا ادھ ادھ پونڈ ڳھدا پر ساڈی تاں بناہ کڈھ سٹی ہے نے اساں تاں ۹۰روپے کوں ۹۰۹۰گنڈھیں ڈے ڈے تے وڈے تھیوں جاوید سومرو آگئے اوندے نال کرسٹل پیلس پارک ونجݨ آلی گاڈی تے آن ٻیٹھوں پر اساں کرسٹل پیلس پارک کنوں ہک اسٹیشن پہلے جپسی ہل اسٹیشن لہہ پیوں ’بی بی سی دی اردو سروس دا انچارج عباس ناصر ھیں علاقے اچ رہندے پر اساں اوندے گھر نہیں وݨجناں اساں ہک ویڈیو شاپ کنوں فلم گھنݨی ہئی اوہا گھدی ہاسے جاوید سومرو میڈے نکے بھرانویں تے وڈے ٻالیں وانگر ہے اوندے نال حجتیا تھیوݨ چنگاں تاں نہیں لگدا ول وی اونکوں آکھیم جاوید تیکوں سدھ ھے جو ساڈا تاج خاں لنگاہ اتھائیں آیاودے ۔۔جاوید آکھیا میکوں پتہ کائنی میں آکھیم ہݨ تاں پتہ لگ گیا جو خان ہوریں اتھائیں ہن توں کوئی بہانہ کڈھ تے بی بی سی سانگے ساڈے خان دا انٹر ویوگھن جاوید چھڑا میڈی گالھ منی ہائی نسی اوں صباحیں دی درائی وی ڈے ڈتی اساں اتھائیں کھڑتے خان سائیں کوں سنیہا پٹھوا چھوڑیا جو درائی دے حساب نال بش ہاوس پچ ونڄن ۔۔۔جاوید راہ اچ پکی پکائی روٹی گھدی پر جپسی ہل کنوں کرسٹل پیلس پارک تائیں پڄݨ نال پتہ لگا جو کتلا ویہاں سو تھیندن جپسی ہل کنوں چڑھائی ہئی چڑھدئیں چڑھدئیں پیر یں اچ نئو ڑپئے گئے ادا اے ٹرݨ تاں نہ تھیا بھوگ بھوگن تھیا ٹردے ٹردے بھوگ بھوگیندے جاوید دے گھر پچ گیوں عبرین آئی ٻیٹھی ہئی گالھ مہاڑ تھئی تاں پراݨا جھیڑاوت شروع ۔۔۔۔۔میں سندھ دی قوم پرست تحریک دی تاریخ ڈسی عبرین اہدی ہے تساں اے کیوں نوھے منیندے جو سائیں جی ایم سید کوں سندھ نال عشق ہا جاوید آکھیا جو عاشق کوں معشوق دا ہاں کڈھݨ دی موکل تاں نسے ڈے سگدے اول تاں سائیں کوں سندھ نال عشق کائنا ہا جے لحظے کھن سانگے من ہی گھنوں جو سائیں سندھ دے عشق اچ گارہا پر تھیا کیا سائیں عاشق ہا فنافی السندھ تھیوے ہا پر اوں تاں آپ سندھ کوں فنا کرڈتے سندھ دی بربادی دا سندھ دے ہر ڈکھ دا سندھ نال تھیوݨ آلے ہر وانج دا وڈاذمے وار سائیں بہشتی ہے

عبرین آکھیا جو تہاڈے اندر سائیں دے خلاف زہر بھریا کھڑے تساں کھوپے پاتی کھڑو سائیں ادھ جنم جیل اچ گزارئیے اوں ساری ڄمارڈ کھ ٻھوگین سائیں قوم پرست تحریک دا منڈھ ٻدھے تساں حق سچ کنوں پاسا کیتی کھڑو تساں سائیں کوں پیجودی عینک نال ڈہدو تساں پیجودے پروپیگنڈ ے دے اثر ہیٹھ ہے ۔۔اساں وچوں کوئی ہک الاݨاجو ۔۔ سائیں قوم پرستی دی تحریک دا منڈھ کائنی ٻدھیا اوقوم پرستی دی تحریک دا مخبر ہا سائیں دی ذات دا رعب بلھاوݨ سانگے سائیں دے آقا اونکوں آپݨا مہمان بݨائی رہ ڳئن اے ڈاڈھی قیدہے جو سائیں آپݨی قیددا سارا ویلھا آپݨی وستی سن وچ گزاریئے ۔اتھاں سائیں کوں ملݨ آلئیں کوں کوئی ہٹک ہوڑ کائنا ہئی سائیں ڳھر دے اگواڑ اچ جئے سندھ دا کنونشن کروینداہا ولا وی قیدی سڈوینداہا سائیں ہر کنونشن اچ بھاشن ڈیوے ہا وت وی قیدی سڈو یجے ہا سائیں ہر سال اپنی سال گنڈھ اچ سن دے ٻاہروں بندے کٹھے کرتے کہاڑی نال کیک تے کاوڑکڈھے ہاتاں وت وی قیدی قیدی دی منڈلی اچ سندھ دا سرویچ سڈاون دا ناٹک نال تھیندارہ وینداہا جنرل ضیا نہر وانگوں سندھ سودھا سارے ملک کوں داپھی تے لتاڑی وینداہا پر ساڈا قیدی سیدخونی نہر سانگے سندھئیں دی رت دے تسلے چاتی کھڑاہا تے اہدا کھڑاہا جو جیرھے سندھی ضیا نال بھڑدئیں بھڑدئیں مرگئین اوحرام موت موئن قبلہ اے وی فرمینداہا جو ملک دی تاریخ دا ہکو مومن اشراف تے اعلی نسل حاکم چھڑا ضیاالحق ہا باقی جناح کنوں ڳھن تے چھیکڑتائیں سارے منافق ہن اچھا اے ڈسوسائیں دیاں لکھتاں کیڈے ویسن سائیں چھڑالایا تاں نہیں اوں تاں لکھیا وی ھے اوندا ہک ہک اکھر سندھ نال محبت دا گواہ ہے عنبرین کوڑیج پئی عنبرین تیڈی کاوڑ آپݨی جاہ تے جے دھارݨا ترٹداہا پیا ہووے عقیدہ دلیں دے ہتھوں کٹینداہا پیا ہووے تاں اے مار سوکھی نہیں لگدی سائیں ڈومونہاں ہا ڈومیراہا ڈور خاہا جے سائیں کتاباں لکھ تے سندھودیش منگدے تے ضیا الحق تے جہاندادا وندے ہتھ چمدن ہزاراں سندھی چھڑاووٹ دا حق منگدن تاں انھیں کوں پھاسیاں ڈیتاں ویندین کوڑے ماریئے ویندن انھیں دی کھل لہائی ویندی ہے جنھیں چھڑا جمہوریت منگی انھیں دیاں لاشاں وارثیں کوں دفناوݨ تھیں ڈتیاں جیں سندھو دیش دی فردوس بریں دا عبداللہ بن صباح نݨݨ دا اعلان کیتا اونکوں سلامیاں پیاں ملدین بابا عبرین نکھیڑا کرونتارا کڈھوویورا کرو سائیں بہشتی ساری حیاتی سندھ کوں قہری ڈنگ مارین ۔۔۔۔۔جھیڑے جھیڑے اچ وقت ویلھے دی خبرنہ پئی عبرین توں ڈھیر کوڑیج گئی ہوسیں میں تے جاوید وات دی رکھی نسے رکھی اساں معافی منگدوں توں لندن اچ رہندیں تیڈے اندر سارے رویئے جمہوری ہن ھیں واسطے توں ٻے بندے دی اینجھی گالھ وی سݨ ڳھندیں جیرھی تیکوں نہیں وݨدی ول وی ساکوں تھورا ڈے جو اساں اڄاں بحث کرݨ سکھدے ودوں ’ اساں اجاں الاوݨ دے سونہے نسے تھئے ھیں سانگے اکھیں نوٹ تے وات کھول ڈیندوں ساڈے ٻارھاں وج گئن اینکوں تساں ادھ رات آکھوتاں تہاڈی مرضی پرسجھ ساڈھے ۱۰ وجے لتھاہا اتھا ں ایں ولھے انگریز یں دی نماشاں تھئی کھڑی ہے عنبرین ٻھاڄی روٹی ساڈے اگوں آن رکھی جیرھی اساں لخطے کھن اچ ولھیٹ سلھیٹ چاکیتی تے نوڑڳیوسے ڈڈھ اچ گرانہہ گیا تاں اکھیں نوٹجیݨ پئے گیاں عنبرین اوفلم لاتی جیرھی جاوید جپسی ہل اسٹیشن کنوں آندئیں نال گھن آیا ہا صباحیں جاوید تے عنبرین ڈوھائیں دی موکل ہے ھیں سانگے اے چرکے تائیں فلم ڈیکھسن اتے میں اٹھی تے اتلی منزل اچ اوں کمرے اچ آگیم جتھاں پہلے وی کئی راتاں ڳزاریم ہݨ اے کمرہ کجھ کجھ ساڈا سونہاں تھی گئے کجھ کجھ آپݨا تھی گئے