مارچ 19, 2024

ڈیلی سویل۔۔ زمیں زاد کی خبر

Daily Swail-Native News Narrative

سائیں دا مونہہ حے (چوتھا حصہ) ۔۔۔ زلفی

شئت سندھی فقیر تہوں ایندے بارے اے رائے قائم کیتی ہووے ۔پتا نئیں سندھی فقیر دا کیا رولا ہا میکوں ایندی سمجھ وت وی نہ آئی۔

جڈاں سرائیکی لوک پارٹی بݨدی پائی ہائی میں اوں ویلھے ظفر لنڈ دے کٹھے کروڑ ڳیاں تے میکوں ایں بندے نال ملݨ دا پہلا موقع ملے۔

میکوں ایویں لڳے جو ایں بندے دی روح اچ کوئی ڈونگھا جیہاں ڈکھ تے اچاٹ پن حے۔وقت گزردا ڳیا تے میڈی شناسائی وی ودھدی ڳئی پر کوشش دے باوجود ایندی ذات دی کوئی تند میڈے ہتھ نہ لڳی۔

حتی کہ کوئی نفسیاتی کمی وی وا نہ تھائی جیکوں وسیلہ بݨا کے میں اپݨے تعلق کوں ایندے نال ڳنڈھ سڳاں ہا۔میڈی اپݨی ذات میڈے اگوں چیلنج بݨ کے میکوں جھنجھوڑݨ لڳی جو ایندے نال کیویں اپنی سنجاݨ ودھاواں؟؟

کجھ وی سمجھ نہ آوے چھیکڑ میں اپݨے آپ کوں ایں نقطے تیں مطمئن کیتا جو اے بندہ ڈو قسم دا ڈاکٹر حے ہیک جیرھا بیمار جسمیں کوں میڈیکل سائنس دے ذریعے ٹھیک کریندے تے ٻیا جیرھے ذہنی تے روحانی طور تیں کہیں زعم دا شکار ہن انہاں کوں سدھا کریندے۔۔

باقی اساں جیہیں وچاک آلے لوکاں نال ایندا کوئی تعلق بݨ وی نئیں سڳدا۔اے ہر ڈو لحاظ نال پروفیشنل ڈاکدار حے۔غیر جذباتی تے بے رحم۔۔۔

ہیک ڈیہنہ میں تے سندھی فقیر کلھے ٻیٹھے ہاسے تے ایں بندے نما دیوتا دا ذکر ٹر پیا تے میکوں گالہیں گالہیں اچ ایویں محسوس تھیا جیویں سندھی فقیر دی ذات اچ اچانک خالی پن آ ڳیا ہووے تے اوندی ذات دی سنجاݨ تیں کئی سوالیہ نشان لڳ ڳئے ہوون۔

میں تھوڑا جیہاں حیران تھیاں تے سندھی فقیر دے اگوں ایں شخص دیاں تعریفاں شروع کرݨ لڳ ڳیاں۔

سندھی فقیر دے چہرے دے رنگ وٹیجݨ لڳ گئے تے سندھی بھڑک ڳیا۔میکوں تھوڑی تھوڑی بھنک پائے ڳئی جو اڃ اوندے شہر دا اے جوان کجھ نہ کجھ اینجھا کریسی جیندی وجہ کولو سرائیکی وسوں دے ایں دیوتا دی ذات دا کوئی نہ کوئی سرا میڈے ہتھیں لڳ ہی پوسی۔

اے ڈو ہزار اٹھ دی ڳالھ ہوسی اوں ویلھے سندھی فقیر گاندا گمدا ودا ہائی۔اوندی ڈاچی دا غم وی تھتھرام اچ ہائی تے سندھی دی اپݨی بے چین ذات وی کہیں حد تک سکون اچ ہائی پر اوکوں ایں جوان دی تعریف ول کھیرو کھانڈ کر ڈتا۔

انسانی تعلقات اچ نفرت یا محبت دے وچاک ہیک ہلکی جہیں لکیر ہوندی حے جیکوں زمانہ شناس ہی پرکھ سگدن ورنہ اکثر لوک تعلقات دی اصل شکل کوں کیموفلاج کر کے جیوݨ دے عادی ہوندن تے تہوں اکثر تعلقات ویلھے دی ترکڑی تیں بوجھ بݨ کے تلدے رہ ویندن تے انسانیں دی تعلقات آلی گݨڈھڑی ڈیہوں ڈیہنہ باری تھیندی ویندی حے۔

سندھی فقیر ایں بندے نال تعلقات دی پنڈ شئت اڳاں ٹورݨ چاہندا ہائی تے او ہیک انوکھے تے غیر متوقع قدم چاوݨ واسطے تیار تھی ڳیا تے میڈا ہتھ پکڑ کے اپݨے گھر دے اتلے پورشن تیں گھن ڳیا۔ جتھاں ٻہوں ساریاں کتاباں ہن، دیسی دوائیاں ہن، جڑی بوٹیاں ہن، نسخے پائے ہن، پتھر دیاں داوریاں لاتھاں ہن تے پچادھو آلی الماری دے اتلے حصے اچ ٻہوں ساریاں شیشاں ہن چھوٹیاں چھوٹیاں۔انہاں شیشیں اچ مختلف حشرات حنوط تھائے پائے ہن۔

سندھی فقیر انہیں حنوط شدہ حشرات آلیں شیشیں وچوں ہیک شیشی چا کے میں کولو پچھیا اے کیا حے؟ میں آکھیا اے تاں کالا وٹھواں حے۔

سندھی فقیر دے چہرے تیں ہلکی جہیں مسکراہٹ آئی تے آکھس اے وٹھواں نئیں اشرف شعاع حے جیکوں میں ایں شیشی اچ بند کیتی پیاں۔سندھی فقیر اپݨی اے فتح ڈیکھالݨ دے بعد میکوں آکھیا اے ڳالھ کہیں کوں ڈسݨی نئیں تے ایں گالھ دا ٻیا پتا وی کہیں کوں کائینی۔میں سندھی فقیر دے ایں احسان کوں چا گھر آ گیا پر میکوں سمجھ نئیں آئی جو اے معمہ کیا ہا۔

میکوں ایویں لگا جیویں ایں سارے وقوعے اچ دیوتا دی کوئی اپݨی حکمت ہووے۔ میں کیا میڈی اوقات کیا۔سندھی فقیر آخر میکوں کیوں اے گالھ ڈسی ہوسی؟۔میں ایں بجھارت اچ دی ڳتھی کوں سلجھاوݨ واسطے اپݨی پاسو پوری کوشد کیتی پر میکوں کجھ خاص سمجھ نہ آئی۔

اے وی پڑھو:سائیں دا مونہہ حے (پہلاحصہ) ۔۔۔زلفی

ول ہاؤلیں ہاؤلیں میکوں دیوتا دی اے کھیڈ سمجھ آوݨ پائے ڳئی۔اے دیوتا دا کوں سمجھݨ دا کوئی اپݨا اوپائے تھی سڳدے۔تساں منو یا منو کجھ گالہیں ساڈے حواس کولو ماورا ہوندن تے انہاں اچ غیر مرئی جیہاں صرف احساس ہوندے۔ڳالھ میڈے اگوں کھلدی ڳئی تے میکوں پتا لڳا جو دیوتا تاں اصل اچ خود پسند ہوندن، انہاں دا ہووݨ ساڈے زمان و مکان کولو انڃ ہوندے تے انہاں نال ملاقات کرݨ دا وسیلہ ساڈی سمجھ مطابق نئیں ہوندا۔

ایں گالھ کوں استاد فدا حسین گاڈی احسن واگھے نانویں ہیک خط اچ لکھدے جو ” ملاقات اوں ویلھے ملاقات ہوندی حے جڈاں ہیک ٻئے نال ڈکھ سکھ ونڈ سڳوں، ڈکھ سکھ اوں ویلھے ونڈیج سگیندن جڈاں محسوس کرݨ دی فریکوئینسی ہیکا ہووے۔ہیکا فریکوئینسی ہیکے زمان تے مکان دا تقاضا کریندی حے۔

زمان مکان وچ حے۔اے ڈو انج نئیں تھی سگدے۔واقعات زمان وچ تھیندن ایں واسطے جیرلھے ڈو آدمیں دا مکان (space) انج ہووے، زمان وی انج ہوندے۔واقعات انج ہوندن،تاریخ انج تھی ویندی حے،محسوس کرن دے مرکز انج تھی ویندن۔موت وی ایں مکان تے زمان دا فاصلہ حے، تاریخ دا انج تھیون حے،محسوسات دے مرکز دی جدائی حے”.

دیوتا دا ویہوار اساں جیہاں لوکاں واسطے کوئی نشانی یا چتاونی ہوندے پر او ساڈے وچوں نئیں ہوندا نہ ہی اساں اوں ویہوار کوں عام زندگی دے اصولاں تیں پرکھ سڳدے ہیں کیوں جو دیوتا دا زمان ساڈے زمان نالوں ہمیشہ وانڈھا تے ان حد ہوندے۔ حد تے ان حد دے درمیان ساڈے مسئلے، ساڈیاں ضرورتاں تے ساڈے ادھور وسدن تے اساں گالھے لوک انہاں ضرورتاں، مسئلے تے ادھورے پن کوں دیوتا دے ذمے لا کے انھاں نال امید لا ٻاہندے ہیں جیرھا سراسر غیر منطقی ہوندے۔

گالھ خواہ مخواہ ٻئے پاسے ٹردی ویندی حے ذرا اپݨی دنیا اچ واپس آندے ہیں ۔میں سندھی فقیر دی ایں ڳالھ کوں لڳ بھڳ پنج سو سال قبل مسیح آلے اوں جملے دے تناظر اچ پرکھݨ دی کوشد کیتی جتھاں ہیک راہبہ سقراط کوں آکھیا ہا جو توں یونان دا سب توں سیاݨا بندہ ہائیں۔

کالے وٹھویں آلی گالھ سندھی فقیر میکوں کیوں کیتی ہوسی ایں سوال دا جواب گولݨ واسطے میں اتھاں ڳیا جتھاں اے دیوتا مہربان حے۔سندھو دیوتا تے اوندے پونگے ۔کیہل، مور، کٹاݨے، چھٻیل تے بیڑیں تیں زندگی گزارن آلے لوکاں نال ملیاں۔او آھدے ہن دیوتا ساڈے اتیں مہربان حے، ساڈا ٻہوں خیال رکھدے، ول میں ایندی سرائیکی شاعری پڑھی تاں گالہیں مزید پیچیدہ تھی ڳیاں۔ اے دیوتا انسانیں کولو زیادہ تاں ڈوجھیں جانداریں نال پیار کریندے، انسانیں کوں تاں صرف پݨدے۔

شئت سندھی فقیر تہوں ایندے بارے اے رائے قائم کیتی ہووے ۔پتا نئیں سندھی فقیر دا کیا رولا ہا میکوں ایندی سمجھ وت وی نہ آئی۔

میں تاں تھک کے اپݨے آپ کوں تسلی ڈتی جو میں تاں کہیں اشرف شعاع کوں نئیں جاݨدا میں تاں اشو لال فقیر کوں جاݨدا جیرھا ساڈے ڈو چار یاریں دا وڈکا حے او اوندیاں گالہیں منیندن اوں کولو پریݨا گھندن ٻس ساڈے واسطے ایہو کافی حے۔

استاد دی کتاب دی تقریب اچ اے دیوتا نما بندہ وی آیا ودہ ہائی۔سر دے چٹے کھیر وال تے چٹاں مچھاں ایندے چٹے چہرے تیں سوھݨا لڳدن تے ایندے رعب کوں مزید ودھا ڈیندن۔

ایندے رعب دی وجہ کولو ٻہوں سارے وڈے وڈے لوک وی ایں کولو کن مریندن۔اویں تاں فقیر حے پر اکثر جلال اچ ہوندے۔ ایندے جلال دی ہیک شکل اے حے جو ایں اپݨے مرݨ کولو پہلے اپݨا تابوت بݨا کے گھر رکھیا ہویا حے تاں جو اوندے منݨ آلے فقیر اوندے مرݨ دے بعد وی اوندے کم نہ آون بلکہ او جیویں او چاہندے اویں کرن۔

دیوتا دا ناں سٹیج تیں صفدر اناؤنس کیتا تے اے اپݨی جاہ آؤ اٹھ کے سٹیج دو ٹر پیا تاں ہال اچ تاڑیاں وجݨ پائے ڳیاں۔اے سٹیج تیں پڃیا تے گالھ کرݨ شروع کیتس۔آھدے ٻس دکھدے راہوو مچ نہ ٻالو۔۔اجاں گالھ جاری حے مضمون لمبا تھی ڳئے

اے وی پڑھو:سائیں دا مونہہ حے (تریجھا حصہ) ۔۔۔ زلفی

باقی حصہ کل لکھسوں۔۔

%d bloggers like this: