فروری 25, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔
جاوید سومرو ساکوں ٹیمپل ریلوے اسٹیشن کنوں دریائے ٹیمز دی کندھی تے گھن آیا انگریز اینکوں rlver Thames لکھدن دریا شہر دے ادھواݨ وچوں لنگھرے ایندے کنارئیں تے لندن دی تاریخ ستی ہے اتھاں ماضی تے حال ایویں ڳنڈھئے کھڑن
جیویں نکھڑݨ توں پہلے گلکڑی پاتی ہوونے ول اتھائیں ساہ جھݨ تے کھڑڳئے ہوون ہک پیر ماضی اچ اٻیا حآل اچ دریادی کندھی تے ڈو اینجھیاں عمارتاں کھڑ ین جنھیں صدیں تائیں ہک ٻے نال بھڑاندکیتی ہے ٹاورہل بادشاہیں دے رہݨ دی جاہ اتے پارلیمنٹ ہاوس عوامی راج سانگے بھڑاند دا مرکز۔۔۔۔
ہک پاسوں چرچ دی عمارت وی ھے جیندا آپݨااقتدار ہا اے اقتدار مخدوم محکم الدین سیلانی ۔بہاوالدین زکریا ملتانی شاہ رکن عالم مخدوم جلال سرخ بخاری مخدوم جہانیاں جہاں ڳشت خواجہ نور محمد مہاروی ۔خواجہ سلیمان تونسوی سخی سرور مخدوم حمیدالدین حاکم خواجہ محمد عاقل کوریجہ اتے خواجہ غلام فرید دی روحانی سلطنت وانگوں نہ ہا
جتھاں بکھ بیماری ڈکھ تکلیف ظلم ستم اتے خانیں دی لکڑجھل تے آوݨ والے وݨیں تے درگاہیں دی چھا نہہ ہیٹھ لنگر دی دال سانگے کئی کئی جنڄ بکھے پئے رہند ن ۔جتھاں بکھ تے بیماری نال بھڑاند دی امک نیں تھیندی جتھاں بندہ ڈکھ سہݨ دا ہیلک بݨ تے حیاتی کنوں ترٹ ویندے اتے جتھاں تبدیلی دی سک وی مک ویندی ہے اتھاں اگوں دے سمل دیاں ڳالھیں تھیندین اتے اج دی گزران واسطے صبردیاں سرکیاں بھریاں ویندین
جمہوریت دی فتح توں پہلے لندن دا چرچ اقتدار اچ بادشاہ بھائیوال ہا چرچ بادشاہ تے حکم چلیندا ہا اتے بادشاہ رعیت تے لکڑ چا کھڑدا ہا اساں یورپ کنوں اوئیں تاں اٹھ ڈاہ گھنٹے دے پندھ تے ہیوں پرسماجی طورتے اساں صدئیں دے فاصلے تے کھڑوں
اتھاں پادری صاحب کوں شاہی دربار کنوں ڳھن تے عوامی ایواناں تائیں ہر جاہوں کڈھ ڈتا گئے اسآں کنیں ملاں اجاں سوٹا چاتی کھڑے جو اقتدار میڈے حوالے کرونہ تاں میں ٻھڑساں ٹیمز دی کندھی تے جاوید سومرو میڈے کیمرے نال میڈا پہلا فوٹو بنایا ول میں اوندا فو ٹو بنایم ول اساں ہک انگریز کوں آکھیا جو ساڈے اتے تھورا لاتے اساں ڈوہیں دا رلے فوٹو بنا اساں اے فوٹو سانبھ رکھیسوں
ایں لخطے کوں َتے تیکوں یادرکھسوں انگریز ساڈا فو ٹو بنایا ول اساں ہتھ اچ ہتھ پاتے گالھیں کریندے بش ہاوس دو ٹرپیوسے جاوید ساکوں نال رلاتے بش ہاوس ڳھن آیا ٹیمپل اسٹیشن کنوں بش ہاوس دا پندھ چار پنج منٹ داہا اتھاں پڄیوں تاں اساکوں انگریز یں تے انگریزی تے کھل آئی بش ہاوس دے ہجے غلط ہن
ڈاکٹر مہر عبدالحق ہوون ہا تاں سارے لندن کوں سرتے چاچاون ہا اساں کوٹ طاہر اچ ستویں پڑھدے ہاسے جڈاں ڈاکٹر صیب قبلہ کوں پہلے واری ڈٹھاہا سے تھری پیس سوٹ پاتی ودےہن ساڈے ہیڈماسٹر رسول بخش خاں احمداݨی تے سارے استاد امیر بخش خاں برماݨی سید یوسف شاہ فدا حسین لنگاہ سردار عالم خاں احمداݨی حاجی محمد ڈونہ رانا شمس الدین اتے گل محمد خاں باادب بݨیئے کھڑے ہن
پورے ضلع دیرے غازی خاں دے وڈے صیب دا دورہ ہا اسکول کنوار وانگوں سنگریا پیا ہا رنگ رنگ دیاں جھنڈیاں لگیاں پیاں ہن ساوے وݨیں دیاں لڑیاں لاماں اتے کیلے دے پتر کپ تے ہک دروازہ بݨایا گیا سورج مکھی گل خیرا چنبیلی گیندا تے گلاب دے پھل اسکول اچ بہآراں لائی کھڑے ہن
ڈاکٹر صیب اساں کنوں پچھیا تاں کجھ نہ پر بلیک بورڈ تے واٹ لکھ تے اکھیونے جو اینکوں پڑھ ڈکھاو اساں سارے ہم جماعت واری واری واٹ اہدے رہ گیوسے پر مہر صیب نہ منیئے اواہدن جو تساں صحیح لفظ نوہے الا سگدے وڈی ہمت کرتے اساں عرض کیتی جو سائیں ہݨ تساں ڑسو جواے کیا لکھیا پئے۔
انھیں وہاٹ دی آواز کڈھ تے آکھیاجو ہݨ ڈساو جو کیا لکھیا پئے اساں وہاٹ دی آوازکڈھی وت چڑگئے جو تساں انگریزی نوھے سکھ سگدے ساڈی بے سیتی جو اساں وٹ تے وہاٹ دا نکھڑااڄ وی نہیں کر سگئے پر استاد رسول بخش خاں دی ماردے صدقے اے جتلا انگریزی سکھ ڳیوں جو نقلی انگریز یں تے انگریززادئیں دے نال نال اصلی انگریزیں نال وی متھاماری کھڑے ہوندوں
ٻش ہاوس ڈو لفظ ہن انھیں ڈونھائیں لفظیں وچوں یو غائٻ ہے اتے وی لگا کھڑے Bvsh..hovse ہوون ہا مہر عبدالحق پچھاں ہا انھیں کنوں جو سائیں ہݨ ڈساو تساں تاں ساڈے فقیرویں حال تے روندے ہاوے اتھاں خود انگریزیں دااے حال ہے
بش ہاوس دے اندر پیٹھوں جاوید سومرو ساڈا ناں استقبالیہ تے لکھواتے رتے رنگ دا ہک اسٹیکر گھدا ول اوں اسٹیکر کوں ساڈے سینے تے ایویں چنبآڑ کھڑایا جیویں اساں کوئی سرکاری دربای تمغہ کھٹی کھڑے ہوووں کراچی وچ ہوندوں تاں بی بی سی والے اساڈا انٹرویو کریندے رہ ویندن
کراچی وچ جھیڑ اکیوں تھیا پئے لوک کیوں ٻھڑدے پئن گولیاں کیوں چلدیاں پئن بندے کیوں مردے پئن تساں آپݨے اخبار اچ لاشیں دے رنگین فوٹو کیوں چھپیدے پیو اردو سروس دے نال نال انگریزی سروس والے وی اساں کنوں حال حوال چاتی رہ ویندن چلواڄ سنگت کوں مل وی گھنسوں
بی بی سی اردو سروس اچ سارے آپݨے سنگتی کھڑن اساں استقبالیہ کنوں ذررا گوں ونج تے لفٹ وسیلے تہہ خانے دو لہہ گیوسے اتھاں ہک بیا جہان آباد ہے سامݨے بی بی سی دا کلب ہے کلب اچ اردو سروس دا انچارج عباس ناصر لاہور اچ بی بی سی دا نمائندہ شاہد ملک دہلی دا نمائندہ شکیل آختر دہلی اچ ہندی سروس دا نمائندہ وپل مدگل ٻیٹھے عباس ناصر ۹ سال پہلے کراچی اچ دی نیوز دا اسٹاف رپورٹر ہا
میں انھیں ڈینھیں جنگ دا میگزین ایڈیٹر ہم کلب اچ گل پچھیا جو فاروق لغاری تے نزیر لغاری اچ ناں دے علاوہ ٻیا کیڑھا فرق ہے میں آکھیم جو اوساڈی فقیری پچھوں خان ہے اساں اوندے خان ہووݨ پچھوں ’’فقیرں اساڈا کتھائیں میل کائنی
اساں بشیر غمخوار دی سنگت ہاں جیں کوں اوں چار مصرعیں دے ڈوہڑے پچھوں ڈھکوا کھڑوایا ہا کلب اچ بی بی سی دی نشریات ویلھے پیدا تھیوݨ آلے لطیفئیں دا ذکر چھڑپیا لطیفے توں لطیفہ آوݨ پئے گیا ہر کہیں کوں آمد تھی ڳئ کھل پیوسے ول اتلا گھلیوسے جو کھلدئیں کھلدئیں رو پیو سے
جاری ہے ۔۔۔۔

اے وی پڑھو:

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

جاری ہے۔۔۔۔

%d bloggers like this: