سینے جھوکاں دیدیں دیرے(12)۔۔۔ نذیر لغاری

سویل تھئ تاں نعیم آختر نال باہرنکل آیم آلس بھن تے جاگداپیا ہا نوں نکور گاڈیاں سجھ کوں اکھیں ودیاں مریندیا ں ہن مرسڈیز لیموزین شیور لیٹ فورڈ یورپ دی کاری گری عربی تیل ءچ دھاں تے عالمی سرمایہ داری دا ڈڈھ دی بھریندی ہئی ۔۔1970 ءدے ڈہا کے ءچ عربیں دا تیل پیٹرو ڈالر تھی گیاہا تیل پیدا کرن والے ملکیں دی دھگ دھگ ہئی یورپ تے امریکہ اوپیک دے اگوں بانہاں بدھی کھڑ ۔۔۔۔ہن جی 8دے ممبرملک اکھیں جھمکا جکا تے اوپیک دے ممبر ملکیں ڈوڈہدے کھڑے ہن ۔۔عرب شیخ یورپ دے پرستانیں کوں داپھی تے لتاڑی ویندے ہن ۔۔۔۔ہن اوویلھا وہاگئے ،یورپ تے امریکہ رل مل تے شیخیں کوں ولے چاڑھیئے ۔۔شیخیں صدام کوں ایران دو ٹور یا ،ول اوکویت پچ گیا ،پچھیں ہر شئے ٹھا پھاتھی گئی ۔۔

میں خلیج دی بھڑاند دے موقعے تے ہکے ڈیہاڑے ءچ سعودی عرب دا ساند ھوڑاند پندھ کیتا ہم جدے کنوں ساکوں شاہی ٹرمینل کنوں شاہی جہاز ءچ بلھایا ہا نے تے مدینے گھن گئے ہن اتھوں ابہا گئے ہاسے ول اتھوں ریاض پجئے ہاسے ،جتھاں 3ڈینہہ شاہی مہمان رہ گئے ہاسے ہک ڈینہہ ساکوں آکھیونے جو قصر یمامہ جلدے پیوں وڈیاں وڈیاں سڑکاں ڈیکھ تے ایویں لگداہاجو اتھاں جہاز لہہ پووے تاں آرام نال لینڈنگ کرسگدے وت ہک گھادامیدان آگیا، اتھاں ون سونے بوٹے تے ونکوونک دے پھل رادھے کھڑے ہن ۔۔

سجھ لاٹ پلائی ہا ،شام تھیندی پئی ہئی میلیں تائیں گھادے اتے چھوٹے چھوٹے رنگو رنگ دے فوارے جھمراں پاتی کھڑے ہن پیلا پانی رتا پانی ساوا پانی ، نیلا پانی ۔۔۔۔۔۔ہزاراں فوارے ڈیکھ تے سک نہ لہے ۔آخر شاہ فہد بن عبدالعزیز دے محل پئے ویندوں ،میدان مکمل ہموار کائنی چولستان دے ڈہریں وچ روحیں دے ڈکھالے تھیندن ،قصریمامہ دے باہروں ڈہریں تے گھاایں وتھریا پئے جیویں گلم وچھی پئی ہووے اجھو اتھاں حوراں ڈکھالی ڈیسن پروں شاہ فہددے کمدار لکڑیں چاتے حوریں کوں ہکلی میں تے سابق سینٹیر پروفیسر ساجد میرہکی کارءچ بیٹھے ہاسے اگوں پچھوں فوج دیاں گاڈیاں ہن ڈرائیور دے نال گارڈ بیٹھاہا نکے وڈے خانیں دئیں کاریں دی دھوڑ جھپ تے نک تے ناساں گارکر بہن والے اساں حقیر فقیر ۔۔۔۔۔

بادشاہ دے محل دووی آئی پی بن تے ویندے پئے ہاسے ۔آخرکاراں کھڑگیاں ،قصریمامہ دے مرکزی دروازے تے آئے کھڑے ہاسے محل دا دروازہ ڈیکھ تے دیرہ نواب صاحب والا صادق گڑھ پیلس یاد آگیا ،فرق اے ھے جو صادق گڑھ پیلس اجڑگئے تے قصریمامہ وسداپئے ۔مرکزی دروازے کنوں ہٹ تے ہک کھلی جاہ تے آگیوں اتھوں وت ہرگز رگاہ راہداری تے گلماں وچھیاں پئن ۔ٹردے ٹردے شاہی دربار ءچ آگیوں بادشاہ دا صوفہ خالی پئے باقی صوفے بھریج گئے ،بادشاہ دے سجے پاسوں مفتی اعظم سعودی عرب شیخ عبدالعزیز بن عبداللہ بن بازدی کرسی ہئی اوندے نال مفتی اعظم مصر دے بہن دی جاہ ہئی ول جامعہ الازہردے وائس چانسلر دی ہئی بادشاہ دے کھبے پاسوں شاہی خاندان دے بزرگ تے نینگر بیٹھے ہن سامنے اساں ونج بیٹھوسے نہ باادب باملاحظہ ہوشیار نہ نگاہ روبرونہ فرشی سلام نہ کورنش نہ ظل سبحانی دا ہوکا ،بادشاہ محل دے اندروں ہک دروازے کنوں نکل تے سامنے آیا سارے اٹھی کھڑوسے ، ہک ہک جنے نال ہتھ ملایس ،اساں وی بادشاہ نال ہتھ ملایا ،اپنی گزر اوقات جاہ ٹکانہ ناں نشان اتاپتہ ڈسیوسے جئے تائیں اساں الیندے رہ گیوسے بادشاہ کھلدارہ گئے اساں تاریخ دے مہابلی اکبر اعظم دے ڈاڈے ظہیرالدین بابر کنوں گھن تے اورنگ زیب عالمگیر تائیں ورقے ورقے تے بادشاہئیں دے وڑکے جھلی ودے ہاسے ۔

اساں وستی وستی تے کیڑی کیڑی دے خانیں دے کراوئیں کنوں ڈریئے ودے ہاسے ،ساکوں تاں اٹ پان چیڑی تے حکم دے بادشاہ وی ڈرائی رہ ویندے ہن اے تاں حقی حق جینداجاگدا بادشاہ آیا کھڑے ،بادشاہ کھلدا کھڑاہا وت کنیں کوپئی ہک بادشاہ بادشاہ آپ خداءاو زمین دے ٹوٹے دا بادشاہ ہا۔نہ بابا نہ اے قصے آلابادشاہ گل نہیں جیڑھا انور پری کوں وداگولینداہا ۔بادشاہ کوں اتے ساکوں قہوہ ڈتا گیا ادھ شارک دی پیالی ءچ ادھ چتھاڑے کنوں وی گھٹ قہوہ ہووے مارکہ سرکیاں بیٹھے بھریندے ہنکمرے ءچ ونج ستاں اے سی چلدا پیاہا رات دھمدی پئی ہئی ۔۔اساں نندردے ویڑھے آگیوسے

کیا کیتا گل انور نال تے آنورکیا کیتا گل نال والا قصہ کہیں ٻئے ویلھے کہیں ٻی کتاب ‘چ باد شاہ ساکوں کیا آکھیا ول اساں کیا آکھیوسے جے قصے دا قصولی عزیز شاہد دے ارمانیں کنوں بھج نہ گیاتاں ول حاضری ڈیسوں َ
نعیم آختر دے کٹھے ہک سٹور دا چکر مارتے ظفر اقبال دے گھر آیوسے ظفر باہروں آتے آکھیا جو تساں جلو میں آندا پیاں اساں اردو نیوز دے دفتر آگیوسے ۔نعیم آختر نواں چھپیا اخبار چاون سانگے دفتر دو ودھیا میں اتھائیں کھڑتےسجے پاسوں ڈٹھم حنیف نویں نکور ماڈل دی چمکنی لیموز ین ٹیکسی گھن تے کھلدا کھڑاہا ۔اپنے سرمنہہ تے گلیندا اپکا پیرو آڈھی تھی تے اتھ پج آیاکھل تے گلکڑی پاتس
حنیف ڈسایا وا و چوی گھنٹے وچ سیٹھ کوں۱۱۰ ریال ڈیون دا پابند ہے پر اوں رات او سیٹھ دے پیسے کڈھ ڳاڈی ٹینکی بھرواتے ۲۵۰ ریال وی کمتا کھڑا ہا اتے اجاں پورا ڈینہہ وی پیاہا ،،شابش پتر شابش حݨیف ساکوں ٹیکسی وچ بلھا تے نعیم َآختر دے گھرگھݨ آیا نریان کتیو سے ول ظفر اقبال آگیا اوساکوں ائر پورٹ ڳھݨ ونجن سانگے تیارتھی تے آیا پراساں اونکوں زوریں ریت موکل ڈتی جیویں شالا توں دفتر ونج اساں ہواداپندھ کرنے ظفر اقبال دے ونجن دے بعد اساں حݨیف نال گالھیں أچ کھڑڳیوسے ول موکلاوے داویلھا آیا میں نعیم آختر تے حݨیف کنوں مکلاتے لاونج وچ آگیم عربی مردتاں ڳھروݨ چغے لہا تے پنیٹ پتلون پاتے لاونج وچ بیٹھے ہن پر زالیں نھویں کنوں چوٹی تائیں ڈھکیاں ٻیٹھیاں ہن اکھیں تے وی کالے چشمے پاتی بیٹھیاں ہن جومتاں کہیں ٻدنظر دی نظر لگے ڈوچار انگریز تریمتیں لاونج دی رونق نہ بنائ بیٹھیاں ہوون ہاتاں ٻاقی کیری تے سوادیاں ہواڑاں ہن ۔ہک پنجابی نوجوان میڈے نال آن بیٹھا سلام لرتے آکھیس جو پنڈھ ڳھن آنواں ۱۰ منٹ وی نہ گزریئے جو سہکدا نال آلی کرسی تے آن ڈٹھا ڈرگیم جو متاں بیہوش نہ تھی ونجے ووئے کاکا کیا تھئی؟پچھیم تاں الانا جو سائیں لاونج دے اندر بہوں مہانگ ہے پنڈ ۴۵ ریال دی کلو بیٹھے ڈیندن شودے کوں ائیر کنڈیشنہ آچ پگھر آگیا ڈو وجے جہاز اچ بہݨ دا حکم ملیا اساں ڄہاز اچ آگیوسے اتھاں ہک نینگر ساکوں سنجاݨ گھدا ساڈا ناں ڳھن تے جنوایس اندروں اندروں کھݪ ییوسے جو اساں ڈھیر مشہور ہسوں آپݨی سیٹ ڳول تے ونج بیٹھوسے اکھیں نوٹ تے درگھی آلس بھنی چل فقیر الندن جلوں جہاز اچ ٻہݨ سیٹ تریمتیں دے کالے برقعے تے درگھے چغے لہہ گئے اتے بیٹھوں سوڑیاں پتلوناں نکل آیاں سارا جہاز ہکے رنگ اچ رنگیج گیا۔
میڈے نال والی سیٹ تے مسٹر ولیم بیٹھا ہا ولیم صاحٻ ساڈے سجے کن دے کولھوں منہہ ڳھن تے آیا اتے پچھیس جو کھتوں آئیں کیڈے ویسیں کون تھیندیں ’’َاساں اونکوں ڈسایا جو پچھلی صدی اچ تساڈے میجر سنڈیمن تے منروساڈے پاسے آئے ہن اساں جوابی خیر سگالی دے جزبے نال لندن ویندے پیوں انھیں ساڈے جمال خان لغاری تے امام بخش خان مزاری نال پٹکیاں وٹایاں ہن سنیئے سے جو ساڈے خانیں دیاں پٹکیاں لندن دے کہیں چوک اچ نیلام تھیسن ساڈا خیال اے ھے جو انگریز سرکار پٹکیں دی نیلامی اچ کھوٹ کریسی اساں خانیں دی لج بچواوݨ ویندے پیوں کتھائیں تاں نک کڈھݨ جوگے ہوووں ہندوستان اچ جے جاہ جاہ تے جمال خاں تے امام بخش خاں نہ ہوندے تاں تساڈا سجھ ساڈے پوادھوں نہ ٹپ ویندا
اداولیم توں کتھوں دا ایں میڈے پچھݨ تے اوں ڈسایا جو پیو میڑا اسکاٹ لینڈ داہا ما تے زال ائر لینڈ دیاں !ن دھی وی اتھائیں پرنا ئی ام پچھلے ڈینہاں آئرش ریپبلک آرمی آئی آراے والئیں میڈی ڈوہتری تے بم سٹیاہا پر سیت دی چنگی ہئی جو بچ گئی ۔۔۔۔ولیم الیندا رہ گیا جہاز اڈردا رہ گیا جہاز اچ ہر سیٹ دے اگوں ہک سکرین ہئی تے سیٹ دے نال ریموٹ کنٹرول لگیا ہویا ہا ۔اساں ڈو واری عامر خان دی ہکی فلم ڈٹھوسے اتے ول سکرین تے جہاز واروٹ ڈہدے رہ گیوسے جہاز پیرس کنوں ٹپیا تاں اشاک تھی بیٹھوسے اجھولندن آیا جہاز پنج گھنٹے اسمان دی آم شام اچ رہن دے بعد ست وجے لندن دے اتوں اڈرد ا پیا ہا سوہنیاں جائیں گھاٹے ساوے وݨ چلو چھیکڑاے تانگھ وی مکی لندن آگیا۔ سعودی ائیر لائن دا جہاز سوا ست وڄے دنیا دے ڈوجھے وڈے مصروف ہوئی اڈے ہیتھروتے آن لتھا جہاز کنوں لہہ تے گیٹ دے وچوں ٹپ تے ہک ٹنل وچ ٹردے ٹردے امیگریشن دے عملے دے کولھوں آگیوسے اتھاں امیگریشن والئیں کوں پتہ لگ گیاہا جو مٹھاون اتے کاہا کنوں سنڈیمن دے وگ وچوں نکھتا کوئی رول بھمدا بھمدا اتھ آن اپڑیئے ۔ہن اینکوں سوکھا شہر نئیں آوݨ ڈیوݨا سامݨے سوہݨی شدادی چٹی کھنٻھور بہشت دی حور بھرپور چھوکری ہرآوݨ والے دے پاسپورٹ تے مہراں ٻیٹھی مریندی ہے اساں سوچیا جو ہک مہر پاسپورٹ تے لواتے ہک مونڈھے تے چا مرویسوں پر شیت انگریز مائی کوں ساڈی نیت دی سدھ پئے گئی اوں ساڈی واری آوݨ تے کاونٹر چھوڑ ڈتا اتے اساں ولا ہک بی چھوکری دے اگوں ہک بی قطار اچ ونج کھڑوسے اتھاں وی اوہوکجھ تھیا آئی میں کملی دی واری تے ٹٹ ڳئی تڑک کرکے ۔اے چھوکری دی کانٹر چھوڑتے ٹرپئی ہن ہک انگریز جوان کاونٹر تے آیا کھڑاہا ۔جڈاں اساں اوندے اگوں پیش تھیوسے تاں اوں ڈوترائے پٹھے سدھے سوال کیتے ہن تائیں کتھاں رہ گئیں ویزہ تاں چھی مہینے پہلے لوا گھدا ہاوی ڈسیم جو میڈے ملک تے شہردیاں حالتاں ٹھیک کائنا ں ہن میں ایں نازک حال اچ ملک چھوڑ نہ سگدا ہم ہݨ کجھ واندے تھیوں تاں حاضرتھی گیوں اوں ساڈے پاسپورٹ تے ۶ مہینے دی مہرلائی اساں امیگریشن کنوں واندے تھی تے سامان گولیا سامان چاتے ٹرالی تے رکھیاتے ہوائی اڈے دے باہروں نکل آیوں

اے وی پڑھو:سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

جاری ہے۔۔۔۔

dailyswail

See author's posts