مارچ 19, 2024

ڈیلی سویل۔۔ زمیں زاد کی خبر

Daily Swail-Native News Narrative

حسن مرتضی

میں تریمت تھیون چاہنداں۔۔۔۔ حسن مرتضی

ڈاکٹر: یار میں پاگلیں دا علاج کریندا اے کافر کتھو آگین کڈھ ایں کوں میڈا ایمان وی تباہ کیتس پتا نہی کتھو آ ویندن نا مراد *..

مریض: سلام سئیں ، او نال آلے کمرے اچ جیھرے ڈاکٹر صیب ان انھاں تہاڈو بھیجیے
ڈاکٹر: جی جی سرجن صیب بھیجا ہوسی خیر ڈساؤ کیا پرابلم ہے تہاڈا
مریض: میں سوچم میں جنس تبدیل کراواں او ڈاڑھی آلے ڈاکٹر کوں آکھیم او استغر اللہ آکھ تے میکوں آکھیس نال آلے ڈاکٹر تیڈا علاج کرسگدن توں اتھاں ونج
ڈاکٹر: جی میں نفسیاتی مسائل دا ڈاکٹر آں کھل تے ڈساؤ تہاڈا کیا مسئلہ اے؟
مریض: مسئلہ نہی ڈاکٹر صیب سمجھو میں جنس تبدیل کراونڑی اے میں تریمت تھیون چاہنداں
ڈاکٹر: ہا او تے ٹھیک اے۔ اے اکھیں کیوں سرخ ان۔ ؟ کیا مشغلہ کریندو رات دا؟
مریض: میکوں ایہو سوچ سوچ نندر نہی اندی بہوں جہاڑے دی جاگ اے ول ایں کیفیت اچ بہوں کجھ کھاپی ویندا اپنا آپ وی
ڈاکٹر: اچھا میکوں دوست سمجھ تے ڈساؤ جو کیوں چاہندو اے؟
مریض: میں خدا دا کئی احسان نہی چاون چاہندا۔ ہک تاں پہلو ای انسانی روپ ڈے تے عذاب ڈتس اتو ولا مرد ہوون دا احسان چا لائیس
ڈاکٹر: بس ایہو کجھ ؟ اے وی ڈیکھو تساں بہوں کجھ انجوائے کریندو
مریض: میں خوش نہی رہن چاہندا بس۔ 4 ذالیں تے 72 حوریں تے قابض تھیون دی وحشیانہ کیفیت کنے تریمت تھی تے کہیں جانور نانویں دل لاون دا احساس لکھ گنا خوبصورت اے
ڈاکٹر: اچھا اے گولیاں ڈینڈاں جیہلے اے خیال آون کھواہے۔
مریض: میکوں گولیں دی لوڑھ کینی میں تریمت دی محبت محسوس کرن چاہنداں، ما دے روپ اچ ، دھی دے روپ اچ ، سسی دے روپ اچ
ڈاکٹر : ڈیکھو دوا کھاؤ انشااللہ فرق پوسی اینجھیاں چیزاں نہی سوچیندیاں
مریض: اے گولیاں ذہن وسماون دے سوا کیا کریسن ۔ کیا کئی مزید اداسی ڈے سگدین۔ ول انشا اللہ پئے آہدے او جیندے دروہ دا شکار آں او کیویں چاہسی میں سکھا تھیواں
ڈاکٹر: استغر اللہ بھئی جان کیا پئے آہدو اللہ رحیم اے کریم اے ایں نہی اکھیندا گولیاں کھاؤ
مریض: کینجھا رحیم اے اپݨی خدائی دی تڈ کیتے ساکوں بݨائس ول خیرات اچ خشیاں ڈے تے تعریفاں کرویندے ۔ میں ہیندا ایہو احسان ختم کرں آیاں۔ تریمت جتلا اوکھا ایندے دھرم اچ کئی کینی۔ میں محسوس کرن چاہندا اے درد
ڈاکٹر: یار مہربانی کر کفر نا الا
مریض: کفر دی کیہری گالھ کیتم ہک مسئلہ گھن آیاں حل کرو۔ میں محسوس کرن چاہنداں جو چھوٹی عمرا اچ شادی دے بعد ہک وحشی بندے دا وزن چاون کیا ہوندے ؟
جیرھا ساڈی رت نال ساڈی پاکیزگی تے مہر لیسی. میں محسوس کرن چاہنداں جو پانی نا پلاون تے چاٹاں کھاون دے بعد جیہلے پیکیں وی آکھ ڈیندن جو بھوگ بس ول او کیویں روندی اے کلھییپے اچ۔ میں محسوس کرن چاہنداں جو سماج دی کتی نگاہ دا مقابلہ کیویں کریندی اے۔ میں محسوس کرن چاہنداں جو اکھیں لا تے کہیں کوں بغیر ڈسیے پریت کیویں ہاں اچ دفن کریندی اے میں محسوس کرن چاہنداں جو پلیت آکھ تے کجھ جیہاڑے جیہلے خدا وی اوکوں منہ نہی لیندا تے کتھاں ویندی اے میں ۔۔۔۔۔۔
ڈاکٹر: گارڈ ۔۔۔۔!!!!! وے نامرادا ۔۔۔۔ !!!
گارڈ: جی سئیں جی جی!!!
ڈاکٹر: یار میں پاگلیں دا علاج کریندا اے کافر کتھو آگین کڈھ ایں کوں میڈا ایمان وی تباہ کیتس پتا نہی کتھو آ ویندن نا مراد *..
(گارڈ مریض کوں پکڑ تے باہر دو گھدی ویندے مریض کاوڑ اچ بولیندا ویندے)
مریض: ہا میکوں پتا ہا سارے اوندے دلال بیٹھو. ہا سارے اوہے ان کئی نا سمجھسی جو۔۔۔
(آواز مدہم تھی گئی ۔ ڈاکٹر پانی دا گلاس پیتا تے آیت الکرسی پڑھ تے آپ کو آکھیا اللہ ایمان دی موت ڈیوے بس)

%d bloggers like this: