کربل کتھا:شمالی ہند میں اردو نثر کی پہلی کتاب ||مبشرعلی زیدی

شمالی ہند میں اردو نثر کی پہلی کتاب کربل کتھا تھی جو فضل علی فضلی نے 1731 میں لکھی۔ یہ ملا حسین واعظ کاشفی کی فارسی کتاب روضۃ الشہدا کا ترجمہ تھی اور اسے دہ مجلس بھی کہا جاتا ہے۔

کربل کتھا نایاب ہوچکی تھی اور اس کا شاید ایک ہی پرانا نسخہ بچا ہے۔ اس کی دریافت کی کہانی دلچسپ ہے۔ علامہ اقبال نے جو شعر "کتابیں اپنے آبا کی” کہا ہے، وہ اس پر صادق آتا ہے۔ علی گڑھ یونیورسٹی کے پروفیسر مختار الدین احمد 1950ء کی دہائی میں اعلیِ تعلیم کے لیے آکسفرڈ گئے تو انھیں کسی نے کہا کہ کربل کتھا کا واحد معلوم نسخہ جرمنی کی کسی لائبریری میں موجود ہے۔ اگر تلاش کرسکو تو اچھا ہے۔

یہ نسخہ مولوی کریم الدین کے پاس تھا جو انھوں نے جرمنی کے مستشرق الویز اسپرنگر کو دے دیا تھا۔

اسپرنگر کون تھے؟ وہ آسٹریا کے ایک عالم تھے جنھیں مشرقی زبانوں اور علوم سے دلچسپی تھی۔ وہ پہلے لندن منتقل ہوئے اور پھر ایسٹ انڈیا کمپنی کے ملازم ہوکر ہندوستان چلے آئے جہاں انھیں دہلی کالج کا پرنسپل مقرر کیا گیا۔ وہاں انھوں نے چار کتابیں مرتب کیں اور کئی کتابیں یورپی زبانوں سے اردو میں ترجمہ کروائیں۔ سرسید نے آثار الصنادید انھیں کے کہنے پر لکھی تھی۔

اسپرنگر کو کتابیں پڑھنے اور جمع کرنے کا جنون تھا۔ جیسے میں اپنی ہزاروں کتابیں پاکستان سے امریکا لے آیا، اسپرنگر بھی ہندوستان سے واپسی پر سیکڑوں کتابیں یورپ لے گئے جو بعد میں برلن کے کتب خانے کی نذر کردیں۔ کربل کتھا کا نسخہ ان میں شامل تھا۔ ان کی کتابوں کا کیٹلاگ بھی چھپا ہے جو میرے پاس ہے۔

اسپرنگر کے سو سال بعد مختار الدین احمد جرمنی میں اس نسخے کو ڈھونڈتے پھرے۔ انھیں معلوم ہوا کہ جنگ عظیم کے دوران کتابوں کی حفاظت کے لیے انھیں برلن سے کہیں اور منتقل کردیا گیا تھا۔ کربل کتھا ٹوبنگن یونیورسٹی کی لائبریری کی زینت بنا تھا۔ آخر مختار الدین احمد اس کتب خانے پر پہنچے اور کتاب کی نقل تیار کرلی۔

یہ کتاب 1965 میں دہلی میں چھپی اور پٹنہ سے اجرا ہوا۔ اس پر مختار الدین احمد کے ساتھ مالک رام کا نام بھی درج ہے جنھوں نے اسے مرتب کرنے میں مدد کی۔ اب یہ ہندستان کی کئی جامعات کے اردو نصاب میں شامل ہے۔ گوپی چند نارنگ اور خلیق انجم نے اس پر مقالے لکھے جنھیں کربل کتھا کا لسانی مطالعہ کے عنوان سے ایک کتاب میں جمع کردیا گیا ہے۔

جی تو چاہتا ہے کہ میں روضۃ الشہدا اور لسانی مطالعہ بھی شئیر کروں بلکہ اسپرنگر کے کتب خانے کا کیٹلاگ بھی لیکن ظاہر ہے کہ ان میں زیادہ لوگوں کو دلچسپی نہیں ہوگی۔ میں یہاں 1965 میں شائع ہوئی کربل کتھا کی پی ڈی ایف پیش کررہا ہوں۔ اسے صرف مجلس کی کتاب نہیں، اردو نثر میں سنگ میل سمجھ کر محفوظ کیا جانا چاہیے۔