فروری 12, 2025

ڈیلی سویل۔۔ زمیں زاد کی خبر

Daily Swail-Native News Narrative

اسلم رسول پوری ۔۔ سرائیکی علم وادب دا معتبر حوالہ||عاشق خان بزدار

۔ سرکار اسلم رسول پوری قلم کوں آدم دے ضمیر دی زبان سمجھدیں ھوئیں ھمیشہ سچ لکھئیے ۔ قوم پرست تے ماہرے لسانیات ہن نظری تے عملی تنقید دے حوالے نال انہاں بھرواں کم کیتے

عاشق خان بزدار

۔۔۔۔۔۔۔۔۔۔۔۔۔۔۔۔۔۔۔

اسلم رسول پوری ۔۔ سرائیکی علم وادب دا معتبر حوالہ ۔۔۔۔۔۔۔۔۔۔۔ سرائیکی وسیب ھزاریں سالیں توں دھاڑیلیں دے کرودھ دا شکار تھی جیرھے ڊکھ ڊنج چاتن او ساڊی تاریخ دے متھے تے لکھئیے بے سیت اکھر ان ۔ ساڊے وطن وسیب اچ حملہ آوریں دے ہتھوں ساڋے ننڈھے نینگرلیلݨ ڳبھرو مزاحمت دی ریت نبھیند ے قتل تھیندے نویں جیوݨ جوڳ دی راند رسیندے وسیب واسیں کوں جیوݨ دی جاڳ لیندے ریہے جیرھے پاروں اساں جیندے ھاؤں ۔ اساڊی زبان ، تہذیب ثقافت جیندی اے جیندی تڊ تے اساں اڃ جیوݨ ریت کریندیں کرودھیں کوں آپݨے ھووݨ دی ڊس ڊیندوں ۔ وسوں دے سر لہندی شام غریباں دے اندھاریں کوں پرکھرا کرݨ آلے ساکوں کھیر دھوتا سجھ ڊے ڳن ۔ انہاں وچ ھزاراں شہید شامل ان جنہاں آپݨیں شہ رڳ نال حملہ آوریں دے کاتیں خنجریں دیاں نوکاں نواوݨ اتے آپݨیں ڳل نال تلواریں دے منہ بھنݨ دے وس کیتے جنہاں سچ دی سولی تےخود کوں وار تاریخ دے متھے تے آپݨیں انکار نال مزاحمت دے اکھر لکھئیے اتے وقت بدلدیں مزاحمتی جدوجہد لفظیں دے لیکھے لڳ ڳئی تلوار اتے توپ دی جا لکھاری دے قلم مل گھدی ۔ ہݨ ساڊے کول جیوݨ دی تڊ ساڈا اڃوکا ادب اے ۔ ادب اتے موسیقی نال بھرئیے پرئیے وسیب اچ لاہندی رت رنڳی دھمی اتے کالی شمور نماشاں جیوݨ جوکھ دی جکھدی ڊکھدی کتھا اچ کتھیج ڳئی جیندا اظہار ساڊے نثری اتے شعری ادب دا سوبھ اے ۔ ساڊی وسوں اچ تھیوݨ آلی ہر ادبی سرگرمی ساڊے سماجی حالات دی ہڊ ورتی دا قصہ اتے ساڊی جیوݨ کہانی اے ڊکھیں دی بہار اچ ساڊی ہنجوں لوتی میندی اے ۔ ساڊی وسوں وسدے دانشوریں ساکوں ساڊی زبان ساڊے ادب ساڊی موسیقی ساڊے ھووݨ تے جیوݨ دی ڊس ڊتی ۔ زبان انسانی جیوݨ جوڳ دا سب توں وڊا کرتب اے جیندے ذریعے انسان آپݨیں ڊکھیں اتے مسائیل دا ویورا کریندے آپݨیں ضرورتیں دی مانگ کریندے ۔ گنگا انسان گنگی قوم کیا منگ سڳدی اے ۔ ہر انسانی سماج کوں انہاں لوکیں دی لوڑھ ہوندی اے جیرھے زبان کوں اظہار دے وسیلے جوڳا تے علمی زبان بݨا وݨ دی لوڑھ کوں اڳونہاں کریندن انہاں دانشوریں دا کم ا نہاں دے لکھتیں اچ موجود اے ۔ سرائیکی وسیب اینجھے معتبر مہاندرےڃݨے دان کیتن جیرھے آپڑیں علمی کم دے حوالے نال وسوں دا وقار تے اتبار بݨییے جنہاں دیاں ڳالہیں ، قصے ، ذکرے ساڊی وسوں اچ جاجا وتھرئیے پن جیرھے سا ڊیں لوک کہاݨیں دے مکھ پنیں دی شکل اچ وسیب و ا سیں دے دماغ دی ست ر نگی پینگھ دے لاہیں تے سیر کریندن ۔ ساڊا و سیب شاعری ، موسیقی اتے فن دیں کئی شکلیں اچ نشابر مکھ مہاندرا رکھیندے ۔ ایندے وچ جیوݨ جوڳ دے سارے ر نگیں اچ رنڳئیے لوک آپݨیں خوبین دی بہار ڊکھیندن ۔ کئی مہان لوک جیرھے اڃ بدنی طور تے ساڊے رلے کئے نی او خواب خیال اتے روحانی طور تے ساڊے نال ان ساڊے اندر ساڊے من دی جھوک اچ وسدن نہ اساں انہاں کوں ۔بھلائے نہ انہاں خود کوں اساں تو ں نکھیڑئیے ۔ جیندیاں قوماں وس وسیب دے مہاندریں کوں بھلاوݨ دا ڊوہ نہیں چیندیاں انہاں کوں آپݨے ذہن دے پوتھیں اچ لکھدین اتے جیندا رکھیندین ۔ جیرھیاں قوماں خود جیندیاں رہݨ چاھندین او آپݨیں معتبر مہاندریں دے قصئیں کوں آپݨے جیوݨ جوڳ دا حصہ بݨیدین تاں ول او وی کہیں جیوݨ جوڳ دا حصہ بݨدین ۔ علم و دانش دے بھاڳ وند مہان انسان دے حضور انہاں دی یاد دے موکھے اچ کجھ اکھر ۔۔ جے یار فرید قبول کرے ۔۔ سرکار اسلم رسول پوری قلم کوں آدم دے ضمیر دی زبان سمجھدیں ھوئیں ھمیشہ سچ لکھئیے ۔ قوم پرست تے ماہرے لسانیات ہن نظری تے عملی تنقید دے حوالے نال انہاں بھرواں کم کیتے ۔ تحقیق دے نال سرائیکی زبان تے ادب دے کئی ادھورے گوشے پورے کیتے انہاں دے مطابق ادب صرف جیوݨ جوڳ دی ترجمانی نئیں کریندا سماجی تبدیلی دا کم کریندے ۔
وسیب اچ زبان اتے اوندے علم و ادب دی جانکاری حاصل کرݨ آلے علم دوستیں ، شاگردیں انہاں دی فکر انہاں دے کم دے پورھئیے دی ٻلدی شمع توں علم دا نور حاصل کیتے ۔ انہاں نال میڊی ڃاݨ سنڃاݨ تے نیاز مندی ڈھیر پراݨی اے جڊاں میں 1966 اچ دیرےکالج پڑھدا ھم انہاں نال سونہہ تھئی اسلم خان تڊاھوں استاد ہن ۔ محترم محمود خان بزدار دے ہفت روزہ اخبار بلال اچ کالم لکھدے ہن ۔ انہاں دیاں اخباری لکھتاں سماجی اچ جھک طبقاتی نظام سرمایہ داری، جاگیر داری نظام دے عذاب اتے جبر دے خلاف ھوندیاں ھن ۔ انہاں دے کالم پڑھ پڑھ انہاں دیاں ڳالہیں سݨ سݨ نویں نسل ترقی پسندانہ فکری نظریات دی سونہی تھئی او فرض شناس مارکسی استاد ہن انہاں شاگردیں کوں کوڑی روائیتی تعلیم دی جا سماجی، ثقافتی شعور اتے تاریخ دی حقیقی پرکھ پرچول دے سلیقے دان کیتے ۔ انسانی عظمت ، فرد دی عزت ، تکریم دا پرچار کریندیں دنیا بھر دے انہاں اسا تذہ وچ ڳݨئیے ڳئیے جنہاں دے ناں تاریخ دا سر نامہ بݨ ڳن ۔ اسلم رسول پوری دے نکھیڑے دے حوالے نال معروف عالمی دانشور خلیل جبران آکھیا ھا آو پھروں یروشلم دیاں ڳلیاں متاں کوئی ڃݨاں لبھ گھنوں ۔ بے شک ڳولݨ نال ڃݨیں لبھ پوندن بھل اسلم خان نہ لبھسی او لبھسی تاں آپݨیں لکھتیں وچ آپݨیں فکراچ ۔۔۔۔۔۔

عاشق خان بزدار دیاں بیاں لکھتاں پڑھو

About The Author