جون 13, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

جندرا بند کنجی فیل سپر اسٹورتے بگ بین

جہانزیب دے گھر پچ تے مسیں ساہ گھدا ہاسے جو لاشاری صیب دا فون آگیا انھیں آکھیا جو سدھے میڈے گھرپئے آو میں تے جہانزیب وت نکل پیوسے شیفسبری اسٹریٹ تے ٹردے ٹردے کیتھرین روڈ تے آن چڑھیوسے تے سجے پاسے پھر پیوسے ۱۰ منٹ بعد لاشاری صیب دے گھر ونج کھڑوسے لاشاری صیب جوس دا ہک ہک گلاس ڈے ڈتا چھک تے ہاں تے رکھیوسے سارا تھکیڑ الہہ گئے اتھاں ڈھیر ٹرݨ نال ہݨ وزن کجھ ڳھٹداویندے لندن اچ ٹرݨ دی ڈاڈھی چس ہے ہک زمانے کراچی وچ وی بہوں ٹرداہم اتنا ٹرداہم جو سعید خاور میڈے اتے مضمون لکھ تے اے ڈسایا ہا جو میں اکثر پیدل ٹرداں اتے پیروراہنا ٹرداں ہک ڈینہہ تاں اسلم رسولپوری کوڑیج پیا ہا تھیاایں جوشفیع محمدی دے سوسائٹی آلے گھر کنوں پہلے بندر روڈ تے آن چڑھیوں اتھوں صدرول آیوں صدر کنوں پریس کلب ول اتھوں وت بندر روڈ ریڈیو پاکستان دے درتے آن کھڑوں اتھوں ول میڈی ٹرݨ دی نیت ڄاݨ تے اسلم رسولپوری پھٹ کھڑا تھیا میکوں تے آپݨے آپ کوں مندے کڈھݨ پئے گیا حداں قسماں بس ووئے بس جوگی روگی ہے ول نہ ولسوں دیس پرائے تئیں ساکوں ڈھیر ٹروائے تے ٻہوں روائے لندن اچ ٹردے ودے رہوتاں خیر ہی خیر تھک پو ووتاں کتھائیں ڳھاتے ٻہہ تھیوو جے ڈھیر تھک پوووتاں مشتاق لاشاری صیب کنوں آتے جوس پیوو کلی شفا ساراروگ اندردا ویسی جوس دا مطلب چھڑا جوس ہے متاں اتھاں ونج تے لاشاری صیب دے سرتھئے کھڑے ہووو جو کاکا اونکوں تاں پلایا ہاوی ساکوں وی پلا گھرفون کیتم عابدہ عینی تے جینی نال گالھ تھئی شایان نین تارا سرفراز تے کنزی ستے پئے ہن گھر والیں سانگے ڈاڈھا مونجھا ہم گالھ تھئی تاں دل خوش تھی پیا ول تاں خوش ہے پراے سینے وچ درد کیہاں ہے ہا اے گیس دا درد ہوسی دردودھدا گیا ودھدا گیا تے ول پچھے ساہ سدھ نہ ہووے ڈوڑا چوڑا پیا تھیواں کیں آکھیا ہا جو مارکس دا مقبرہ تے ملکہ دا محل ہکے ڈینہہ ڈیکھ بدہضمی چھڑا ڈوانجوانج اثرآلیاں شہیں کھاوݨ نال نہیں تھیندی جے ڈوا نجوانج نظرئیں کوں ڈیکھن توں پہلے اکھ اچ نظریاتی سرمہ نہ پاوتاں ایہو کجھ تھیندے جیرھا کجھ ہݨ تھیا پئے لاشاری صیب ہک چمچہ داروں ڈتا تاں درد چھہو مارگیا ول مک وی گیا لاشاری صیب جہانزیب تے میں اساں تریہے نکل تے شیفبری اسٹریٹ تے جہانزیب دے گھرول گیوں جتھاں بھرڄائی ونکوونک دیاں ڈشاں تیار کیتی ٻیٹھی ہئی روٹی بناں ہرگالھ کھوٹی ہے مانی تے دیدپئی تاں دل کوں ٹیکی آئی روٹی کھا جہانزیب کنوں مکلاتے اساں ٻاہر نکل آیوں لاشاری صیب دی گاڈی اچ بہہ تے ہݨ چارلٹن کورٹ روانگی کیتھرین روڈ کنوں ٹاون ہال آلے پاسے پھر گیوں اتے ول چارلٹن کورٹ دوبھج پیوں لاشاری صیب میکوں لہاتے آپ پچھلے پیریں گھر دوول گئے اتے میں چارلٹن کورٹ دیاں پوڑیاں چڑھݨ پئے گیا ں آپݨے اپارٹمنٹ دے جندرے کوں کنجی لانواں تاں کنجی نہ لگے اے کیا تھی گئے کنجی کوں سدھا پٹھا پھیر زورلاہاں ہٹ تھی گیاں تاں ول درکھڑکا یم اندروں کوئی ولدانہ آوے ٻاہروں جندرے کوں کنجی نہیں لگدی یک نہ شد دوشد ہݨ کیا کریجے پالا ودھدا ویندے پوڑئیں تے وی نمھی سمھ سگدا ھیں اݨ مݨ اچ رجھیا ٻاہر نکل تے ٹاون ہال آلے پاسے ٹرپیاں راہ اچ ٹیلی فون بوتھ ڈیکھ تے سوچیم جو لاشاری صیب کوں فون کراں کھیسے اچ ہتھ ماراں تاں بھانج نہ ہووے سامݨے اسٹور والے کوں میڈی بے وسی سمجھ آئی اوں میں کنوں ہک پونڈ ڳھن تے اوندا بھانج کرڈتا میں ۱۰ ۱۰ پینی دے ڈوسکے بوتھ دے وات اچ بھیڑ ڈتے تے لاشاری صیب دا نمبر ملایم اوڈوں ہیلودی آواز ۲ئی تاں ساہ اچ ساہ آیا لاشاری صیب کوں سارا حال ڈتم اوں آکھیا اتھائیں کھڑمیں آنداپیاں لاشاری صیب تے میں چارلٹن کورٹ ول گیوں اوجندرے دی اصل بیماری سمجھ ڳئےہݨ ھیں سانگے انھیں جندرے کوں کجھ نہیں آکھیا تا کی کوں کھول اندر پہہ ڳین ول جندرا کھولئے نے میں تاکی کنوں اندر پہݨ کنوں بچ گیاں ’لاشاری صیب ندیم کوں اٹھال تے دڑکے پھوکے ڈتے جو توں اندروں اوورلاک کیوں چالایا ندیم زاری کیتی معافی منگی لاشاری صیب پچھوں تے ول گئے تے اساں بسترتے ڈھہہ پیوسے

ڈینہہ تھیا تاں اٹھی ٻیٹھوسے اڄ اساں ویسٹ منسٹر ہاوس ونڄݨے ایں جاہ کوں پارلیمنٹ ہاوس وی اہدن اتے اے بگ بین دے ناں نال وی مشہور ہے لاشاری صیب فون کیتا انھیں آکھیا جوتوں سٹی ہال تائیں آونج تے میں اتھائیں آنداپیا ں میں چارلٹن کورٹ کنوں نکل تے ٹر پیم ساوتھ ہائی اسٹریٹ تے ابھے دو منہ کرتے ٹردا وینداں جے اٻاہلےتھی کرائیں نہ ٹروتاں ول سٹی ہال تائیں ویندئیں ویندئیں ۲۰۲۲منٹ لگ ویندن اساں سٹی ہال دے نال پڄیوں تاں لاشاری صیب وی آگئے اونال رلاتے بینک گھن گئے بینک اچ پیسے جمع کرواتے کارڈ بݨوائے نے اے کارڈ اگوں شاپنگ دے کم آوسی بنک وچوں نکل تے اساں سپر اسٹورتے آگیوں ایں اسٹورداناں asba ھے اتھاں دنیادی ہر شئے موجود ہے لوݨ وسل آلو میتھرا ساگ پالک کنوں ڳھن تے کپڑالٹا تھاں تھپے اٹا روٹی پرس جتیاں چاقوں چھریاں میک اپ دا سامان ریڈیو ٹی وی فریج ڈیپ فریزر کارجیپ موٹر سائیکل تساں واتوں شئے دا ناں کڈھوشئے حاضر ۱۹۶۰ دے ڈہاکے تائیں لندن اچ ۶۰ فیصد کارنر اسٹور ہن جاہ جاہ تے ہٹیا ں کھلیاں پیاں ہن ۲۰ فیصد کمیونٹی اسٹوراتے ۱۶ فیصد سپر اسٹور ہن لوک پہلے کارنر اسٹور توں روز ڈیہاڑی لوڑھ پووݨ آلیاں شہیں ڳھن گھندے ہن جے کجھ ڈھیر شاپنگ کرݨی ہووے ہاتاں کمیونٹی اسٹور دو منہ کریندے ہن اتے جے ول کھیسے بھریئے پئے ہوون ہا تاں ول سپر اسٹور دوٹر پوندے ہن ہݨ حالتاں بدل گین ہݨ لندن اچ ۶۰ فیصد سپر اسٹور ہن ۱۵ فیصد کوپریٹواسٹور ہن اتے ۲۵ فیصد کارنر اسٹور ہݨ مارکیٹ تے سپر اسٹور داراڄ ہے ٹوری پارٹی سپر اسٹور

دے دھندے کوں ودھاوݨ سانگے ہتھی ڈتی ہے لیبر پارٹی سپر اسٹوریں دی اجارہ داری کوں جھلیندی رہ گئی ہے اتے ویلھا وچوں آپݨی راہ کڈھدارہ گیا سپر اسٹور کنوں ہک بے اسٹور آیوں ایندا ناں ہے take ,&carry ایں اسٹور اچ ہر کوئی آسگدا ۔اتھوں خریداری سانگے ممبر بݨݨا پوندے لاشاری صیب ایں اسٹوردا ممبر انھیں ڈونھائیں سٹوریں توں شاپنگ کرتے سامان آپݨے اسٹورتے آن پڄائے اتے اساں کاریں اچ ٻہہ تے شہردو نکل گیوں شہر دو ویندئیں انجم دی گالھ ٹر پئی میں لاشاری صیب کوں انجم لاشاری دے اردو تے سرائیکی غزلیں دے شعر سݨوائے
بیٹا ہوا جوان تو دشمن سے جا ملا
دیوار جاں پناہ میں یہ پہلی دراڑ تھی
قاتل نے خوں ٻہا بھی لیا میرے شہر میں
حاکم کا ساتھ تھا اسے منصف کی آڑتھی
درواز ے سے دھرتی تک دو چار قدم
دھرتی سے دہلیز تلک صدیوں کا سفر
ہݨ تاں ساڈی لوں لوں دے وچ رچئے پئن اندھارے کیڑھا آپݨی نندر کھناتے سجھ کوں ہکلاں مارے مشتاق لاشاری صیب ڈسیا جو بابا نجمی میکوں انجم نال ملوایاہا تاں ھوں ویلھے ساڈی سنگت تھئی انجم یاد آندے تاں اکھیں ترم پوندین اساں ستارھاں سال کٹھے گزارین ہزاریں راتیں دے ہزاراں قصے جے موڈ ہووس ہاتا ں پہاڑ سرتے چائی ودارہ وینداہا جے موڈنہ ہووس ہا تاں ککھ وی ناں سہنداہا جے دل آکھے تاں ِ صداپیا کھلے جے دل ناں منے تاں کھلدئیں کھلدئیں روپووے جیرھی گالھ کوں ٹھیک سمجھداہا اوبھانویں جے جتلا کوڑی ہووے ہا ہک لحظہ وی نہ لکینداہا بکنگھم پیلس دے اگوں دی مال توں ٹپ تے ٹریفالگراسکوائر کنوں لنگھدے ۱۰ ڈاوننگ اسٹریٹ کنوں جھاتی پیندے پارلیمنٹ ہاوس ونج پڄیوں اے ویسٹ منسٹر دا علاقہ ہے ساڈی بی بی بے نظیر بھٹو وی اتھائیں ھیں علاقے اچ رہندی ہے لاشاری صیب گاڈی اینجھی جاہ تے ونج کھڑائی جتھاں پارکنگ دی ہٹک ہوڑ کا ئنا ہئی کاروچوں نکل تے اوں عمارت دوپئے ویندوں جتھاں جمہوریت دا ڄم پل تھئے جتھاں آمریت پاپائیت شہنشاہت ڈڈھپ زوراورائی کوڑی دھڄ اتےبادشاہ دی بے حساب بڈ ھی چھوڑی دی طاقت نال بھڑاند تھئی سامݨے بگ بین ہے پارلیمنٹ ہاوس دے ٹاور تے جیرھی وڈی گھڑی پئی نظردی ہے ھینکوں بگ بین اہدن اے عمارت دنیا جہان دے جمہوری ادارئیں دی اماں سائیݨ ہے پارلیمنٹ فرانسیسی ٻولی دے لفظ pa rler کنوں بݨی ہے جیندامعنی ہے الاو اتھاں اوالیندن جنھیں کوں لوک الا وݨ دا حق ڈیندن
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: