سینے جھوکاں دیدیں دیرے(24)||نذیر لغاری

مشتاق لاشاری آکھیا جو ساڈی تنظیم پاکستان اچ وی ایہوجہاں کانفرنساں تے سیمینار کرویسی اساں امن تے سکھ ودے گولیندوں اساں اج سکھے کائے نسے اساں چہندوں جو صباحیں سکھے ہووں

ساڈے جائے سوکھے ہوون اواساں وانگرپن منگ تے نہ جیون اوعزت دی حیاماݨن مشتاق لاشاری بی بی کوں ست بسم اللہ آکھیا تے ول سیمینار دا منڈھ ٻدھݨ سانگے بے نظیر بھٹوکوں سڈیس ۔۔۔۔۔بی بی

تقریر شروع کیتی تاں ملکہ الزبتھ وی انگریزی بی بی دے اگوں ٻانہاں ٻدھی کھڑی ہئی عالمی برادری پاکستان دے ایرے کوں پکا کرݨ تے اونکوں اسارݨ سانگے ساڈے نال تھیوے ساڈے قرضے معاف کرو جواساں پیریں بھر تھی سگوں ساڈے نال تھیوو جو اساں اوکھے جھیڑے کارتے مرݨ مارݨ تائیں ونڄݨ آلے لوکیں دا تڈاویڑھ سگوں ساڈے لوک اینجھی جاہ تے کھڑن جتھوں ڈوچارے نکلدن ملک کیڈے ویسی اینڈافیصلہ عوام کریسن جو اگوں تے ودھݨ والے لوکیں نال تھیندن یا ول انھیں لوکیں نال جیرھے پچھوں تے گھن ونجݨ چہندن

پاکستان دے لوک جیڈے منہہ کریسن انھیں دا اثر ہک ارب مسلمانیں تے پوسی پاکستان دے نینگر یں وچ پچھوہیں تے اگوہیں تے جھیڑا تھینداپئے بنیاد پرستی تے لبرل ازم دیاں قوتاں جھیڑالائی کھڑین ہک پاسوں اولوک ہن جیڑھے ڈڈھپ تے وزبری کوں اپݨادین ایمان سمجھدن ٻے پاسے اساں ہوں جیرھے لوک راڄ تے انجوانج دین ایمان والے لوکیں دے کٹھے رل بہݨ تے ہک صلاح تھیوݨ تے یقین رکھدوں اساں نہ جھیڑے کار ہوں تے نہ جیڑھے کاریں کوں نیندے سے اساں اہدوں جو چچنیا توں لا کشمیر تائیں سارے جیڑھے مکائے ونڄن تانجوہیں تے بنیاد پرستی مکے اساں اہدوں جو پاکستان تے ہندوستان کشمیر دیاں ونڈیاں حداں کھولݨ سانگے الاون اساں اہدوں جو اقتدار تے اختیار ہیٹھ تائیں ونڄے ۲۱ ویں صدی سنجاݨ دا ویلھاہے جتھاں زال جوان ڄٹ مزدور وپاری شاگرداتے اقلیتاں سوکھیاں سودھیاں ہوون لوک گھٹ تنخواہیں تے نہیں جی سگدے ساڈا بھوئیں دی وڈی وستی اچ حصہ ہے اساں اپنا حصہ گھنݨ دی گالھ کریندوں اساں اہدوں کشمیر دا جھیڑامکاو نہ تاں جے ایٹمی بھڑاند تھئی تاں ککھ نہ بچسی لکھاں لوک مرویسن جارج گیلو وے تقریر کرݨ آیاں تاں سدھ پئی جواے تاں بھٹودا عاشق ہے اونکوں جاندے تاں پہلے وی ہاسے پر اے پتہ نہ ہا جو اے عاشق بزدار تے امجد عباسی کنوں وڈا جیالا ہے جارج گیلیووے آکھیا جو جڈاں وی بے نظیر بھٹو دی حکومت گئی ہے ساکوں سرکار کرسمس کارڈ پٹھن وی بند کرڈتن شئت پاکستان دیاں حکومتاں سنگت کوں اچارسمجھدین اساں اتھاں سابق ہائی کمشزواجدشمس الحسن نال رل تے کشمیری برادری کوں کٹھا کیتوسے لیبر پارٹی کنوں کشمیر پالیسی بنوایوسے وت کیا تھیا وت اے تھیا جو ہر شئے چٹ تھی گئی نوازشریف پور ساوا کریندارہ گیا اوں تاں پورگھݨنے ہن ھیں ڳالھوں پور گھندارہ گئے جے فوجی حکومت ملک بچاوݨے اتے اپݨا ٹکر پانی بچاونے تاں اولوک راڄ سانگے پیر پٹے جے تائیں کشمیر دا جھیڑ ا نہیں مکدا اوتائیں پورے علاقے اچ ٹھاہی نہیں تھی سگدی امن نہیں تھی سگدا ۔۔۔۔ شیڈو وزیرخزانہ مائیکل پورٹیلوآکھیا جو میکوں پاکستان دی گنتری ہے کیوں جو میڈے ملک اچ پنج لکھ توں وی ڈھیر پاکستانی رہندن ڈوجھی گالھ اے ھے جو پاکستان سانجھی دولت مشترکہ دی برادری اچ رلیا کھڑے باقی رہ گیا ٹکر پاݨی تے ویلھے کوں سوکھا ٹھیلا اتھ ڈیویندے جتھ انصاف ہووے لٹ مارنہ ہووے جتھ کرپشن نہ ہووے پاکستان اچ انصاف کائنی اتھودے لوک انصاف سانگے لوہندن اتھ لٹ مارتھندی ہے اتھاں جھیڑے جھڳڑے تھیندن بھڑانداں تھیندین لوک رتورت تھیندن سیمینار اچ کونسلر میرک کوکل تے کونسلر رابرٹ اٹیکنن وی تقریر اں کیتیاں مئیر رچرڈوواکرمہمانیں کوں جی آیاں کوں آکھیا تے انھیں دا تھورامنیا سیمینار مکا تاں بی بی نال دعا اسلام تھئی کڈاں آئیں کتھاں ٹکیاپئیں چوکھے ڈینہہ رہسیں کتھاں کتھاں ویسیں کیا کیا ڈیکھسیں آٻاہلا أٻالا حال ڈتوسے جو بی بی کوں کارکن ویڑھی کھڑے ہن سیمینار مکݨ تے ٹکردا بندوبست وی ہا پیا پر بی بی کوں کتھائیں بی جاہ تے ونجناہا اساں ڈائننگ ہال اچ آگیوسے کھاون پیون داوافربندوبست ہا پراساں چھڑاکھاوݨ تے زور رکھیا ڈھیردیرتھی گئی تاں ہک بندے آن آکھیاجو تیکوں بی بی سڈیندی پئی ہے اساں حیران جو بی بی تاں ڳئی ہئی پئی کتھوں ولی ہوسی کیا گالھ تھئی ہوسی فریدی صیب وی نال تھی پئے اساں پوڑیاں لہندے ہیٹھ آیوسے بی بی دے چودھارکارکن تے لیڈر کھڑے ہن اساں اٻاہلے تھی تے ودھیوسے جی بی بی خیرتاں ھے بی بی ولداڈتا جو بالکل خیرہے اے گھن آپݨا بال پین بال پین کھیسے اچ پاتے پچھلے پیریں ڈائننگ ہال اچ ول آیوسے روٹی رج کھاتے باہر آیوسے تے وت اکرم شاداد بلوچ انیس تے آفتاب نال والتھم اسٹو سینٹرل آگیوسے جتھاں اساں ٹکݨاہا اتے اے اوجاہ ھے جتھوں ڳھتسی مارتے نویں پندھ دا حال ڈیوݨ پئے گئے ہاسے آوہݨ وت نال تھیوووکٹوریہ اسٹیشن تے انگریز فنکار تے اوندا گٹار پچھوں رہ گیا استاد خادم حسین اسلم کلاچی نصیر مستانے تے جمیل پروانے دے خیالیں دی لہر سک پئی میں تے جاوید سومروہتھ اچ ہتھ پاتے لیسٹراسکوائر دوودھدے ویندوں