نقوش: اردو کا سب سے اہم ادبی جریدہ||مبشرعلی زیدی

نقوش کو اردو کا سب سے اہم ادبی جریدہ کہا جاتا ہے۔ محمد طفیل نے جب اس کا آغاز کیا تو وہ محض پبلشر تھے۔ انھوں نے پہلے احمد ندیم قاسمی اور پھر وقار عظیم کو ادارت سونپی۔ پھر طفیل صاحب نے خود پرچہ سنبھال لیا اور ایسے شاندار نمبر نکالے کہ بڑے بڑے ادیب اور مدیر ویسا کام نہ کرسکے۔ وہ خود بھی لکھتے لکھتے بہت سے ادیبوں سے بہتر تخلیقات پیش کرنے لگے۔ ان کے لکھے ہوئے خاکوں کی 9 کتابیں اس کا ثبوت ہیں۔

نقوش کے کچھ شماروں پر ایک اور کچھ پر دو نمبر درج ہیں۔ بعض شمارے ایسے ہیں جن کا نمبر ایک ہے لیکن حصے کئی چھپے۔ شماروں کے مجموعی نمبر 148 ہیں لیکن پرچوں اور تمام جلدوں کی تعداد میرے خیال میں 135 ہے۔ ان میں سے 78 میرے پاس ہیں۔

طفیل صاحب کا سب سے بڑا کارنامہ نقوش کے رسول نمبر کو قرار دیا جاتا ہے جو کئی سال کی محنت سے 13 جلدوں میں شائع ہوا۔ طفیل صاحب 15 جلدیں مرتب کرنا چاہتے تھے لیکن ان کی زندگی نے وفا نہیں کی۔ رسول نمبر کی جلدوں کے دوران دوسرے شمارے بھی چھپتے رہے۔

نقوش کا رسول نمبر محض سیرت کی کتاب نہیں۔ اس میں رسول کے زمانے کا نہایت تفصیل سے احاطہ کیا گیا ہے۔ ان 13 جلدوں میں ابواب کی محض فہرست پر ایک نگاہ ڈالنے سے ہی اندازہ کیا جاسکتا ہے کہ یہ کس قدر پھیلا ہوا اور دقت طلب کام تھا۔

میں گوگل ڈرائیو کے اس فولڈر کا لنک شئیر کررہا ہوں جہاں تمام جلدیں موجود ہیں اور ڈاون لوڈ کی جاسکتی ہیں۔

میں نقوش کے باقی شماروں کو بھی ایک ایک کرکے یہاں پیش کرتا جاؤں گا۔ سانپ بن کر خزانے پر بیٹھے رہنے کا کیا فائدہ۔