اکتوبر 28, 2021

ڈیلی سویل۔۔ زمیں زاد کی خبر

Daily Swail-Native News Narrative

"بھوئیں نال اسمان الیسی "||اکبر ملکانی

ملک نزیر ماچھی اکھیئے میکوں تیں ٹھڈا ساہ کتھاو وی نئیں ملیا۔میڈے چار پتر ان۔چارے کراچی ان۔محنت مزدور کریندن۔چھکیا تانڑیا ٹکر پورا نئیں تھیندا۔گھر کنوں بے گھر ہتھو ان۔ ا

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کوئی پریشانی کئینی۔پندھ اے پیریں دا ٹردا پئے۔ددڑ دھوڑ کنوں وی جان چھٹدی ویندی اے۔فصل اے تیار تھیندی پئی اے۔اللہ ننانویں کنوں وی امان ڈیوے۔نرسری نسل وی جوان تھی چکی اے۔خوف ہٹدا ویندے۔لوک الانونڑ سکھدے ویندن۔فرسودہ نظام دے بہی خواہ وی اپڑیں گنڈھ تروپ کوں لگے پئین۔جیرھے لوک پتے کھیڈنڑ دے بادشاہ ان۔وارداتیں دے ماہر ان۔کورس کیتی ودن۔کوڑ دیاں ڈگریاں وی اصلی ان۔بھن ڈھا شروع اے۔کون کیرھی بٹھی دا بل بنڑدے۔اے وت میڈے اللہ سئیں کوں پتہ۔
کل میکوں کچے بیٹ الی وستی وچ نبلہ موھانڑاں۔حسو چانڈیہ۔خالقی مستوئی ملین۔ انہیں ڈسیئےساڈی وستی وچ دینو مستوئی دا پتر اطہر خاں دیرے وچو وڈے کنیں وڈے سکول وچو وڈی کنوں وڈی جماعت وچ پڑھ پگا ول ائے۔او اہدے میں محنت کیتی اے۔میڈے رب کوں بھانڑیں میں ہنڑ تحصیلدار لگساں۔اخلاقی او اے جیڈا اے۔ہرکہیں کوں اٹھی اٹھی تیں بھاکل پا تیں بیٹھا ملدا ھا۔اہدا بیٹھا ھا۔جتلا تھی سگے بالیں کوں پڑھاوو۔کہیں دی خوشامد نہ کرو۔گودے توھاڈے خدا نئیں۔توھاڈا ساہ قبض کر گھنسن۔ڈرو نہ روزی روٹی دا اللہ مالک اے۔70 سال تھیندن توھاکوں ووٹ ڈیندین ھوئیں۔10,10 جماعتاں جو توھاڈے بال پڑھی کھڑن۔ڈتی اے کہیں گودے توھاکوں چپراس دی نوکری۔ووٹ وی گھندن۔کوڑ وی مریندن۔عزت وی نئیں کریندے۔بھا لگے نہ ڈتے کرو ووٹ انہیں کوں۔کیہاں خوف اے توھاڈے دل وچ کوئی کجھ نئیں کریندا توھاڈا۔توھاڈی گال ہنڑ آتیں تک گئی کھڑی اے۔عباسو مزاور اکھیئے ۔ووٹ اساں انہیں کوں کہیں دے ڈر کنوں نسے ڈیندے۔ساڈی مسیت دا ملاں قاری غلام رسول اکثر جمعیں تیں یا آگو پچھو اہدا رہ ویندے۔ووٹ ضایو نہ کیتا کرو ووٹ قومی امانت اے۔تہوں اساں انہیں کوں ووٹ قومی امانت سمجھو کیں ڈیندوں۔سعید خاں ملکانڑیں دا پتر مبشر خاں ملکانڑیں کالج وچ جیرھا بارہویں کلاس وچ پڑھدا پیا ھا۔اوں عباسو مزاور دی باھاں پکڑ کیں اکھیئے۔چاچا عباسو توں جو پیا اہدیں ووٹ قیمتی امانت اے۔اے کینجھی امانت اے۔جیرھی چار سال اساں غریبیں دے گھر وچ لاتھی رہندی اے۔ہر چار سال دے بعد اساں انہیں کوں انہیں دی امانت ڈے تیں ول اندوں۔ووٹ ساڈے ان۔امانت انہیں دی اے۔امانت تیں اونکوں اکھیندی اے۔جیرھی شئے کوئی کہیں دے گھر وچ رکھ گیا ھووے۔ووٹ ساڈا امانت انہیں دی۔گال ساڈی سمجھ کنوں باہر اے۔گھمناں موچی ڈاڈھا مزاقی آدمی اے۔گالہیں وڈے پتے دیاں کریندے۔ اکھیئس اصل گال میکوں ہنڑ سمجھ آئی اے۔اگلے جیہاڑے ساڈی وستی وچ اکبر ملکانڑیں وی ایہو کجھ بیٹھا اہدا ھا۔یار خیال کراھے ساڈی وسوں نال انونڑ آلے الیکشن وچ وت کوئی نویں واردات تیار تھیندی پئےاے۔میڈے خیال وچ آوندا اشارہ وی ہیں گال آلے پاسے ھا۔
سارے جیرھے بیٹھے ہن ۔ووٹ قومی امانت الی گال تیں چاچے عباسو مزاور دی گچی وچ پئے گئین۔ممدی سہرانی نیں چاچے عباسو دی جان چھڑوانڑ کیتے کچاری وچ الانڑیں سارے چاچے عباسو دے بکیں کیوں پئے ہندے او۔اوں تیں اپڑیں مسیت دے ملاں مولی غلام رسول دی گال سنڑائی اے۔جو ساڈی مسیت دا ملاں مولی غلام رسول مسیت وچ اکثر ایہا گال کریندا رہ ویندے ووٹ قومی امانت اے۔ووٹ دا استعمال ضرور کیتا کرو۔ ووٹ اپڑیں گودے کوں ڈتا کرو۔نزرو بنگالے اکھیئے چھوڑ غلام رسول ملاں دی گال آو تیں گودے دی مسیت وچ نواب صاحب دا تنخواہ دار ملازم اے۔ٹکر کپڑے وی نواب صاحب ڈیندے۔اوں ظاہر اے ڈوہڑا وی تیں نواب صاحب دا گانونڑیں۔اے وی اونکوں نواب صاحب اہدے۔اے جاہل لوک ان۔ ایہو ڈٹ ٹھیک اے۔انہیں کوں ایہا گال رٹوائی رکھ۔ووٹ قومی امانت اے۔اے وی انہیں کوں آکھی رکھ۔سکول دی تعلیم کنوں مدرسے دی تعلیم بہتر اے۔
ملک نزیر ماچھی اکھیئے میکوں تیں ٹھڈا ساہ کتھاو وی نئیں ملیا۔میڈے چار پتر ان۔چارے کراچی ان۔محنت مزدور کریندن۔چھکیا تانڑیا ٹکر پورا نئیں تھیندا۔گھر کنوں بے گھر ہتھو ان۔ ایویں رلدا پھردا تھکا ترٹا سرائیکستان ہاؤس وچ ول ایاں۔ اتھاں میڈا وڈا پتر سجاد ملکانڑی تے سید نعیم الحسن نقوی قوم ، قوم پرستی، وطن تے ملک بارے کتابی تے دانشورانہ گالھیں آپت اچ بیٹھے کریندے ہن ، میں وی نال جڑ بیٹھاں ، اے گالھیں تہوں شئیر کریندا پیاں کہ میکوں خوشی تھئی اے سب گالھیں سنڑ کے ، کیوں جو اج عوام وچوں کجھ لوک سرداریں جاگیر داریں تے ملونڈیں کولو باغی تھیندے اندن،
بہرحال اے ڈوہیں ایں گالھ تے متفق ہن کہ انسان جتھوں دا پانڑی پیندے، جتھاں رسدے وسدے، جتھاں دفنیجنڑ پسند کریندے، جتھاں جاہ ٹکانڑاں پسند کریندے فطرتاً اوہو اوندا وطن ہوندے ، سرکاری کتابیں وچ لفظ ملک جیڑا ورتیا ویندے او الگ چیز اے، او وطن نہیں، او ملک ہک تنظیمی ڈھانچہ ہوندے ، اوندے اچ ہک کولو ڈھیر قوماں ہوندین، مثال بطور نعیم شاہ دے بقول پاکستان وطن نہیں، بلکہ ہک کثیر القومی ملک اے، جتھاں بلوچ ، سندھی ، سرائیکی ، پختون ، پنجابی تے کجھ بیاں قوماں آباد ہن ، تہوں سرائیکی، پاکستانی ضرور ہن مگر انہاں دا وطن سرائیکی وسیب اے، اور سرائیکی صوبہ دے مطالبے دی بنیاد اچ وسائل دی منصفانہ تقسیم دے نال اے وی ہے شامل اے کہ سرائیکی الگ شناخت رکھدن تے آپڑا کلچر رکھدن ، اپڑیں بولی رکھدن ، تاریخ رکھدن، الگ قومی شناخت دا مقصد باقی قومیں کولو دوری نہیں ہوندا ، بلکہ باقی قومیں نال بطور حق ہمسایہ چنگا تعلق راہندے ، اے نکھیڑا نہیں ہوندا، بلکہ اپڑیں شناخت تے قائم راہندے ہوئیں ہمسایہ قومیں نال پیار ودھدے، نکھیڑا تڈاں تھیندے جڈاں کہیں کوں تسلیم نہ کیتا ونے، ایہا وجہ اے کہ حسب طاقت جتلا تھی سگدے ، انجھ صوبے کیتے کوشت کریندے رہے ہیں، کریندے پئے ہئیں، اور کریندے راہسوں ، امید اے کامیاب تھیسوں ، ضرورت اے فاصلے مٹاووں ، ڈر بھاؤ ختم کروں ، جیویں اشتر سائیں فرمائے،
"جڈاں تھیسن فیصلے فاصلیں دے”
” بھوئیں نال اسمان الیسی "

توھاڈا اپڑاں۔محمد اکبر خاں ذات ملکانڑیں۔قوم سرائیکی۔چیرمین پاکستان عوامی سرائیکی پارٹی ۔
سرائیکستان ھاوس دیرہ غازیخاں۔

%d bloggers like this: