مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

سرائیکی تحریک دی کہانی۔۔۔اکبر ملکانی

آخر کے تک ہیں عزاب وچ مبتلا رھسوں۔ایویں اگر اے پاور شو کریندے رھ ویسوں۔ایہو ساڈا حال تیں اساں ہیں دائرے کنوں کڈاہیں وی باہرو نہ نکل سگسوں۔گال اتھاہیں دی اتھائیں کھڑی رہسی۔

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ڈھیر گالہیں ان جیرھیاں بندے دی سمجھ نئیں اندیاں۔ڈھیر گالہیں ان جیرھیاں بندے دی سمجھ وچ ا ویندین۔ہک گال اے جیرھی میکوں آج تئیں میڈی سمجھ نئیں ائی۔او اے ھ۔گندی چنگی ہر کہیں دی ہک اپڑیں رائے ھوندی اے۔میڈی وی ہک اپڑیں رائے ھ۔رائے ڈیونڑ دا ہر کہیں کوں حق حاصل اے۔رائے اگر چنگی نہ لگے ۔اوندے تیں بحث وی تھی سگدی اے۔ سوال جواب وی تھی سگدن۔کڈاہیں وی کہیں دی گال حرف اے آخر نئیں ھوندی۔اساں سارے ایں وخت اپڑیں قد کچھانونڑ دے عزاب وچ مبتلا نہ تھیووں۔پانڑیں جو سر تار تھیندا ویندے۔ہنڑ تاں ساکوں ایں قد کاٹھ آلے خول وچو نکلڑاں چاہیدا اے۔خیال کرو پندھ کانڑاں پیا تھیندے۔بقول میڈے مرحوم قاید بابا اے سرائیکستان جناب حمید اصغر شاہین دے تحریکاں خون دا چکا منگدین۔اساں اجاں وڈیں چھوٹیں جماعتیں دے چکر وچ پئے ودوں۔اے ھ ساڈا رولا جتھو آساں نسے پئے نکل سگدے۔کوئی اہدے تحریک تیں سبھ کنوں میڈا ودھ خرچ تھیا پئے۔کوئی اہدے ایں تحریک تیں میں اپڑیں جوانی خرچ کیتی کھڑاں۔کوئی اہدے افرادی قوت سبھ کنوں زیادہ میڈے کولھو اے۔کوئی اہدے مدر پارٹی صرف میڈی اے۔کوئی اہدے میڈی پارٹی ہرضلعے وچ کم کریندی پئی اے ۔تہوں میڈی پارٹی پورے وسیب دی نمائندہ پارٹی اے۔کوئی اہدے میڈی شارٹ کال تیں میڈا پنج سو ورکر کٹھا تھی ویندے۔کوئی اہدے سبھ کنوں زیادہ احتجاج میڈی پارٹی دے شو تھئے کھڑن۔بنہیں الی کار میں وی اپڑیں پارٹی دا ایہو کجھ اہداں۔میں سبھ کنوں زیادہ طاقتور اں۔
آخر کے تک ہیں عزاب وچ مبتلا رھسوں۔ایویں اگر اے پاور شو کریندے رھ ویسوں۔ایہو ساڈا حال تیں اساں ہیں دائرے کنوں کڈاہیں وی باہرو نہ نکل سگسوں۔گال اتھاہیں دی اتھائیں کھڑی رہسی۔
ایں ویلھے تحریک ہک اہم موڑ تیں پج چکی اے۔چالاک دشمن ساڈی تاڑ وچ کھڑے۔ساکوں تحریک دے ہر پہلو کوں سنجیدگی نال ڈیکھڑاں پرکھڑاں چاہیدا اے۔بیشک ہر رہنما اپڑیں پارٹی کوں اپڑیں جاہ تیں قائم دائم رکھے۔ کوئی جماعت کہیں دے وچ ضم نہ تھیوے۔بیشک او اپڑیں وجود کوں اپڑیں جاہ تیں برقرار رکھے۔او انہیں دا اخلاقی آئینی حق اے۔ایں ویلھے ہر سرائیکی جماعت آئینی حدود وچ رہندیں ھوئیں اپڑیں بساط دے مطابق بہتر کارکردگی دا مظاہرہ کریندی کھڑی اے۔غلطی ہر انسان وچ ھوندی اے۔غلطیاں میں وی ڈھیر کیتیاں ھوسن۔ھو سگدے کجھ غلطیاں سہون میڈے بنہیں رہنمانویں کنوں وی تھی گیاں ھونون۔ ہر کوئی ہک بے دی چھوٹی موٹی غلطی کوں نظر انداز کر سگدے۔ آوندا اگلا حل سوچ کیں اے طئے کروں۔ہنڑ آگو دے سفر کوں کیویں طئے کرنڑیں۔میڈی جتلا سوچ اے۔میں تاں اوھے تلی گال کرنڑیں اے۔یا جتلا جیندی سوچ ھوندی اے۔او اتلا گال کریندے۔میڈا مقصد کہیں دے کم دی نفی اے نہ ذاتیات اے۔دل اکھیئے ۔ہک گال اے جیرھی میڈے دل وچ کجھ جیہاڑیں توں کھٹکدی ودی ھئی ۔کہیں لائی لپٹی توں ہٹ کیں تاریخی پس اے منظر کوں ڈٹھا ونجے۔سرائیکی تحریک وچ جتلا کم دھریجہ نگر دے دھریجیں دا اے۔بیا کہیں دا کئینی۔قلم دا جہاد جیرھا دھریجہ نگر دے جناب ظہور احمد دھریجہ نیں کیتے آوندی مثال تاریخ وچ نئیں ملدی۔تحریک کوں جتلا وخت ظہور احمد دھریجہ نیں ڈتے ۔اتلا وخت بیا کوئی نئیں ڈے سگدا۔دھریجہ صاحب دے کولھو تحریک دا کم کرنڑ واسطے ہمہ وخت ہک بہوں وڈی جیرھی ٹیم کم کریندی اے۔کجھ مر گئے ھوسن تیں کجھ جیندے ھوسن۔جیندے وچ بابا امان اللہ دھریجہ۔غلام یسین فخری دھریجہ۔ حاجی عید احمد دھریجہ۔مقبول احمد دھریجہ۔طارق دھریجہ۔انجینیر طاہر محمود دھریجہ۔محمد شفیع فدا دھریجہ۔اشرف دھریجہ۔نواز دھریجہ۔عاجزدھریجہ۔مقصود احمد دھریجہ۔جمشید احمد دھریجہ۔غلام جیلانی دھریجہ۔ڈاکٹر فاروق احمد دھریجہ۔نزیر احمد بزمی۔زبیر احمد دھریجہ۔اصف خاں دھریجہ۔سعید احمد دھریجہ۔عامر سلیم دھریجہ۔زاھدمنیر دھریجہ۔مطلوب دھریجہ۔ابرار دھریجہ۔عمران دھریجہ۔علی دھریجہ۔شھزاد دھریجہ۔عثمان دھریجہ۔مزمل دھریجہ۔تنویر حنیف دھریجہ۔کاشف دھریجہ۔ریاض دھریجہ۔عاطف دھریجہ۔مجاھد دھریجہ۔نعیم خاں دھریجہ دے علاؤہ بے وی کافی نوجوان۔ بزرگ شامل ان۔جیرھے گنڑتری کنوں وی بہوں زیادہ ان۔جیرھے تحریک تیں جوانیاں خرچ کر چکن۔ظہور دھریجے دا شھر۔گوٹھ۔قصبہ۔وستی ہک جیرھی دھریجہ نگر دے ناں نال مشہور اے اور مکمل دیہاتی اے۔جتھاں ایں افرا تفری دے دور وچ جتھاں بھرا بھرا دا نئیں۔اتھاں اوھے پرانڑیاں رسماں ریتاں۔محبتاں بھائی چارے دیاں ڈھیر مثالاں موجود ان۔کہیں کہیں دا احترام۔جھک نوائی ڈیکھڑیں ھووے۔او ہیں وخت وی دھریجے نگر دا دورہ کر سگدے۔ہیں دیہاتی وستی قصبہ۔گوٹھ۔ شھر دھریجہ نگر کوں بیا ہک اے اعزاز وی حاصل اے۔دھریجہ نگر دی سرائیکی کانفرنس وچ کافی تعداد وچ سرائیکی تریمتیں وی شریک تھیندین۔
تریجھی گال جیرھی دھریجہ نگر کوں نشابر کریندی اے۔او اے ھ۔اتھاں 8 بالڑیاں ایہو جیہاں وی ھن جنہیں سرائیکی وچ ایم اے کیتی ھوئی اے۔دھریجہ نگر او وستی اے۔ جتھاں ایم اے سرائیکی کرنڑ آلے سبھ توں زیادہ ان۔میں سمجھداں دھریجہ نگر لکھنؤ اے۔لکھنو دی ویسے میں ہک مثال ڈتی اے۔کجا لکھنو۔کجا دھریجہ نگر۔دھریجہ نگر دھریجہ نگر اے۔جتھاں ماکھی مٹھے لوک رہندن۔محبت دے درس ملدن۔دھریجہ نگر سرائیکیں دا مکہ اے۔جتھو محبت اخوت دا بہوں وڈا پیغام ملدے۔ڈکھییں لوکیں کوں شفا ملدی اے۔دردیں دا داروں تھیندے۔اینکوں اہدن دھریجہ نگر۔دھریجہ نگر دی کلچر دے حوالے نال اے جیڈی وڈی جڑت اے۔جتھو دا ہر چھوٹا وڈا جھومتی اے۔دھریجے نگر دی جھمر پوری دنیا وچ مشہور اے۔دھریجہ نگر دی بی وی ہک کم دی گال ڈسی ونجاں۔اتھو دی خشی تیں ڈیکھنڑ نال تعلق رکھیندی اے۔لیکن جیرھی غمی اور ڈکھ دی کوئی تقریب وی ھووے۔اوندا اینڈ سرائیکی قومی مسئلے تیں تھیندے۔میڈے خیال وچ سرائیکی تحریک تیں ایں کنوں وڈی قربانی بی نئیں تھی سگدی۔
اے ھ ظہور دھریجے دی سرائیکی تحریک نال جڑت۔سرائیکی تحریک دا نشابر ناں۔ظہور دھریجے دی تحریک نال وابستگی۔تاریخی جدو جہد۔جینکوں پاکستان عوامی سرائیکی پارٹی سلام پیش کریندی اے۔
میں پوری تحریک دا گہرائی نال مطالعہ کیتے محسوس کیتے ظہور دھریجہ مفکر اے سرائیکستان اے۔اپیل کرینداں آیندہ ظہور احمد دھریجے کوں ہیں ناں نال پکاریا ونجے۔میں سمجھداں اے اعزازی ڈگری صرف ہیں ہک ناں کوں جچدی اے۔اے ھ ایں ظہور دھریجے دا تھوڑا جیہاں تعارف اپڑیں سمجھ دے مطابق میں کرا ڈتے۔اگر کوئی ناراض نہ تھیوے تاں۔میں اپڑیں فرائض اے منصبی دا فرض ادا کیتے۔جیرھا میڈے تیں قرض ھا۔دھریجے نگر دے دھریجیں دے علاوہ
بے وی کجھ ناں ھن جنہیں دی تحریک نال وابستگی پیو ڈاڈے کنوں اندی پئی اے میں انہیں کوں وی سلام پیش کرینداں۔سرائیکی تحریک وچ بیشک خاندانی پس اے منظر ضرور رکھدن۔مگر راہ رستے وچ تھک کیں کھڑ گئین۔یا راہ رستہ بھل گئین۔کتھائیں کوئی بٹ لگا ضرور اے۔جنہیں دا او وی بہوں ارمان تھئے۔
مگر ہک ظہور دھریجہ اے۔جیرھا میڈی اے تحریر لکھنڑ تک اپڑیں بالیں بچہ سودھا مسلسل جدوجہد دے عمل کوں جاری رکھیا ھویا اے۔مسلن میں اپکوں ہک جید سرائیکی اکھوینداں مگر میڈا اے عمل میڈے کولھو جاری تھئے۔ایویں بے وی اکثر میڈے سرائیکی رہنما ھن جنہیں دا عمل وی میڈے الی کار آپ کنوں شروع تھیندے۔مگر ظہور احمد دھریجے دا ایویں نسے آکھ سگدے۔
کہیں دی مر اے جی اے۔شادی اے غمی اے ۔ظہور احمد دھریجہ ہرکہیں دے ہر وخت ڈکھ سکھ دا بھائیوال ھوندے۔
تحریک دے ہر ہرپروگرام کوں اپڑیں روز نامہ جھوک اخبار دے دفتر وچ اپڑیں بساط دے مطابق لازمی کرویندا رہ ویندے۔ایں بندے دو بہوں وڈے اعزاز ویندن۔
سرائیکی اجرک دا خالق وی ایہو ظہور دھریجہ اے۔جیرھا سرائیکستان دا مقدمہ ہر فورم تیں خش اصلوبی اور احسن طریقے نال لڑدا ودے۔جیرھا ہر جاہ تیں سرائیکستان دا سفیر اور بقاء دا ضامن بنڑیا ودے۔ساکوں قدر کرنڑیں چاہیدی اے ایں مفکر اے سرائیکستان ظہور احمد دھریجہ سئیں دی جیرھا سرائیکی قوم دا نمایندہ رہنما اے۔سارے سرائیکی اگوانڑیں دا وڈا پن ہوسی اگر او متفقہ طور تے انہیں دی قیادت کوں اخلاقی طور تیں تسلیم کرن چا۔تاکہ او سرائیکستان دے مقدمے کوں بہتر طریقے نال اگوں تیں ٹور سگن۔ میں ذاتی طور تے دھریجہ سئیں دی فکر ، فلسفہ متحرک پن دی تائید کرینداں اور نال بنہیں سرائیکی اگوانڑیں کوں وی ایہا گزارش کریساں۔
محمد اکبر خاں ذات ملکانڑی،قوم سرائیکی
چیئرمین پاکستان عوامی سرائیکی پارٹی

%d bloggers like this: