اظہرلشاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مارکہ! مُبارخ ھوُونیہے، سرائیکی وسیب دا گرینڈ ڈیموکریٹک الائینس (جی ڈی اے) بݨ ڳیا وے۔
آݙت وار، ترائے (3) اکتوُبر 2021ء
مُلتان: اڄ مُلتان ئچ سرائیکی وسیب دے کوئی ݙڈھ ݙوُ درجن مہاندریاں دا ھِک کٹھ تھئے، جیندے ئچ سائیں اسلم جاوید، سائیں عاشق بزدار، سائیں راݨا محبوُب اختر، سائیں ظہور دھریجہ، سائیں شاہ نواز مشوُری، سائیں جمشید رضوانی، سائیں راݨا فراز نوُن، سردار منظوُر دریشک، ملک سلیم، سائیں فرحان ملک، ملک جاوید چنڑ، ڄام اظھر مُراد، سائیݨ راشدہ بُھٹہ، سائیݨ سعدیہ کمال، پاکستان سرائیکی پارٹی دے اڳواݨاں اتے کُجھ ٻنہاں ڄݨیاں رلت کیتی۔
کٹھ دے ھِک آھرکار سائیں راݨا محبوُب اِیں کٹھ کوُں سرائیکی وسیب دا "نمُائندہ کٹھ” آکھے اتے اعلان کیتے نے جو جلدی وسیب ئچ سرائیکی صوُبہ بݨاوݨ سانگے سرائیکستان رابطہ مہم شروع کیتی ویسی۔ اُنہاں سرائیکستان رابطہ کمیٹی دے نال نال کجھ کمیٹیاں (مثال: میڈیا کمیٹی، کلچرل کمیٹی، اکنامک کمیٹی وغیرہ) بݨاوݨ دا وی اعلان کیتے۔ اکنامک کمیٹی دا مقصد وسیب دے معاشی انگ اکھر (اعداد و شمار) کٹھے کرݨ ھوسی اتے سائیں جمشید رضوانی ، سائیں شوکت اشفاق اتے ڈاکٹر سعدیہ کمال اے انگ اکھر کٹھے کرݨ دے ذمہ وار ھوسن۔
انہاں دا آکھݨ ھا جو: "سرائیکی صوبے کیتے پچھلے چالھی پنجھاہ سالاں توُں سرائیکی سوُجھواݨ، سرائیکی شاعر اتے سرائیکی سیاسی کارکن کم کریندے پئین اتے ھُݨ اِیں جدوجہد کوُں پَھل پُھل لڳݨ دا ویلا آڳئے۔ اڄ اوُں مُہم دا منڈھ ٻدھیندے پئے ھیں جیڑھی سرائیکی صوُبہ بݨݨ تئیں جاری راھوݨیءِ۔ سرائیکی صوبہ دے علاوہ اِیں مہم دا ٻیا مقصد ھِک اینجھئیں فیڈریشن بݨاوݨ ءِ جیڑھی متوازن پاکستان، کلچرل فیڈرل ازم اتے ڈائیورسٹی (تنوع) تے یقین رکھیندی ھووے۔”
کٹھ دا اڑدوُ ئچ لکھا اعلامیہ پڑھدیں سائیں جمشید رضوانی سرائیکی وسیب دے حقوق اتے سرائیکی صوُبہ کیتے سرائیکستان رابطہ مہم شروع کرݨ دا اعلان ݙرُھیندے آکھیا جو ایں مہم کیتے وسیب دے تمام اضلاع دے اھم شخصیات نال رابطہ کیتا ویسی اتے انہاں دی مشاورت نال سرائیکستان رابطہ مہم کوُں حتمی شکل ݙتی ویسی۔ ھر ضلع اتے ھر علاقے دے مسئلیاں دی نشان دہی کیتی ویسی۔ جیندا مقصد وسیب دے ھر علاقے سے مسئلیاں کوُں اجاگر کرݨ ھِ۔ سرائیکستان رابطہ مہم دی رپورٹ دیاں سفارشات مرتب کر کے مہرے والا میلہ، راڄݨ پوُر ئچ پیش کیتی ویسی۔ سرائیکستان رابطہ مہم دے ھیٹھ مختلف کمیٹیاں تشکیل ݙتے ویسن۔
کٹھ ئچ ھِک ورکنگ کمیٹی بݨائی ڳئی ءِ جیندے ئچ سائیں عنائت اللہ مشرقی، سائیں شاہ نواز مشوُری، سائیں مقصوُد دھریجہ، ڄام اظھر مراد، ڈاکٹر سعدیہ کمال، ملک جاوید چنڑ اتے عثمان کریم بُھٹہ شامل ھِن جیڑھے وسیب دے مختلف ضلعیاں ئچ رابطہ کریسن۔ انہاں دا آکھݨ ھا جو کٹھ ئچ صوُبہ دے مکمل حدوُد اتے ایندے کیتے جدوجہد تیز کرݨ تے اتفاق کیتا ڳئے اتے آکھیا ڳئے جو لوُلھا لنگڑا سول سیکریٹیری ایٹ ساݙے مسئلیاں دا حل نئیں۔
انہاں اعلامیہ ئچ لکھئے کٹھ دے ھیٹھ ݙتے مطالبے وی پیش کیتے:
1. ملک دیاں ٻنہاں قوماں دی کار سرائیکیاں کوُں وی ھِک قومی اکائی تسلیم کر متوازن اتے کلچرل وفاق بݨایا ونڄے۔
2. پاکستان دیاں مقامی زباناں کوُں سوُئٹزر لینڈ دی طرز تے قومی زبان دا درڄہ ݙتا ونڄے۔
3. سرائیکی صوُبہ دا سینیٹ توُں منظوُر شدہ ٻل کوُں قومی اسمبلی توُں پاس کرا کے سرائیکی صوُبہ ٹھہایا ونڄے۔
4. پی ٹی آئی حکوُمت ئچ آوݨ دے پہلے سؤ ݙینہاں دے اندر سرائیکی صوبہ بݨاوݨ دا وعدہ پوُرا نئیں کیتا، اتے ھُݨ سرائیکی صوُبہ بݨا کے اے وعدہ پوُرا کرے۔
چھیکڑ ئچ رضوانی صاحب آکھا جو اڳلے الیکشن (2023ء) دے ویلے علاقے دے سیاسی "گرگیاں” کوُں سرائیکی قوم کوُں ویچݨ دا موقع نہ ݙتا ویسی اتے اعلان کیتا جو: وسیب دی اجتماعی دانش کوُں استعمال کریندے ھوئے الیکشن ئچ حصہ گھنݨ دا لائحہ عمل تیار کیتا ویسی۔
سرائیکی قوم پرستاں دا اڳلا الیکشن بھڑݨ:
جی ھا، اِیں کٹھ دا وݙا اعلان تاں سرائیکی قوم پرستاں دا اڳلا الیکشن بھڑݨءِ، باقی تاں ایویں لیپا پوتیءِ۔ رہی ڳالھ سرائیکی زبان، وسیب دے مسئلیاں اتے سرائیکی صوبے دی تاں اُنہاں دی تاں ایویں اولھ گِھدی ڳئیءِ۔ سوُئٹزر لینڈ دی طرز تے سرائیکی اتے ٻنہاں پاکستانی زباناں کوُں قومی زبان دا درجہ دا مطالبہ کرݨ آلے انہاں سرائیکی قوم پرستاں دا اعلامیہ وی سرائیکی ٻولی ئچ ناھی لکھا ڳیا۔ لڳدا ایویں ھِ جو اے اعلامیہ سرائیکی لوکاں کیتے ناھی لکھا ڳیا، بلکہ کجھ اینجھئیں مہرباناں کیتے لکھا ڳیا ھا جنہاں کوُں سرائیکی ٻولی سمجھ ئی نئیں آندی پر انہاں مہرباناں انہاں سارے قوم پرستاں کوُں کٹھے کر ٻلھائے۔ یا وت اے جو اعلامیہ وی مہرباناں آپ لکھے، اتے پڑھݨ کیتےانہاں کوُں پکڑا ݙتے نے۔ سرائیکی ٻولی نال جیکر انہاں دی کتری ھِک وی حُب ھوندی تاں اِنہاں قوم پرستاں ئچ ھِک ݙو ڄݨے تاں اینجھئیں ضرور ھوسن جنہاں کوں سرائیکی لکھݨ آندی ھوسی۔
وسیب دے مسئلے: روھی اتے تھل ئچ ھزاراں ایکڑ زمین دی غیر مقامی لوکاں کوُں غیر قانونی ناجائز الاٹمینٹاں تھیندیاں پئین، وسیب دے نینگراں دا ھائیر ایجوُکیشن اتے جابز ئچ کوئی کوٹہ نہ ھووݨ پاروُں بُرا حال ءِ، وسیب ئچ ماحول اتے عوام دشمن منصوُبے جاری ھِن۔ پچھلے ترائے سالاں ئچ انہاں قوم پرستاں کݙاھیں انہاں غیر قانونی الاٹمینٹاں، سرائیکی نینگراں دے وانج، اتے ماحول دشمن منصوُبیاں دے خلاف کوئی آواز چاتی ءِ؟
سرائیکی صوُبہ اتے پی ٹی آئی سرکار! سن ݙو ھزار اٹھاراں (2018ء) ئچ وسیب دے کُجھ الیکٹ ایبلز جنوُبی پنجاب صوُبہ محاذ بݨایا ھا۔ اے اوُھے سرائیکی قوم پرست ھِن جنہاں دی ھِک کوُارڈینیش کمیٹی جنوُبی پنجاب صوُبہ محاذ نال ملݨ کیتے بے چین ھئی۔ محاذ دے اڳواݨاں انہاں کوُں گھاہ ئی نہ سٹا اتے پی ٹی آئی ئچ ونج رلے۔ بعد ئچ انہاں بناسپتی قوم پرستاں ݙو ھزار اٹھاراں دے الیکشن ئچ ودھ چڑھ کے آپݨے آپݨے علاقیاں ئچ پی ٹی آئی دی الیکشن کیمپین چلائی ھئی۔
اڄ پی ٹی آئی دی حکوُمت بݨے ترائے (3) سال توُں ودھ عرصہ تھی ڳئے۔ کہیں کوُں یاد ھے جو انہاں قوم پرستاں کݙاھیں پی ٹی آئی سرکار کوُں سرائیکی صوُبہ چتاوݨی کیتے کوئی ریلی کڈھی ھووے، کوئی احتجاج کیتا ھووے یا کوئی ٻیا مظاھرہ کیتا ھووے؟ اڄ ترائے سال بعد وی اے پی ٹی آئی سرکار توُں سرائیکی صوُبہ بݨاوݨ کیتے ٻس ایویں ھِک ڈھلا ڈھلا مطالبہ کریندے پئےھِن۔
آکھݨ دا مقصد اے ھِ جو ساݙے اے مہاندرے جنوُبی پنجاب صوُبہ محاذ اتے پی ٹی آئی ݙوھائیں نال کھنڈ کھیر ریہہ ڳئے ھِن اتے اڄ وی پی ٹی آئی اتے ایندے سیلیکٹرز نال کھنڈ کھیر ھِن۔
ھوائیں دا رُخ ھُݨ بدل ڳئے۔ پی ٹی آئی دا اڳلا الیکشن کھٹݨ دا کوئی امکان نئیں پیا ݙسدا۔ پیپلز پارٹی دے چئیرمین بلاول بُھٹو زرداری پچھلے مہینے سرائیکی وسیب دا ھِک انتہائی کامیاب دورہ کیتے۔ اِیں دورہ ئچ سرائیکی لوکاں بلاول بُھٹو دا بھرپوُر استقبال کیتے۔ رحیم یار خان توُں گِھن کروڑ لال عیسݨ اتے وِھاڑی توُں گھن دیرا غازی خان تئیں سرائیکی لوکاں شدید گرمی تے ھُسڑ ئچ کئی کئی گھنٹیاں دُھپ ئچ کھڑ چوک بزاراں، سڑکاں اتے چٹئیل میداناں تے بلاول بُھٹو دی واٹ تے نیݨ وِچھائین۔ بلاول بُھٹو وسیب دے لوکاں نال صوُبہ بݨاوݨ دا وعدہ کیتے۔
اے وی پڑھو : سرائیکی تحریک دا قضیہ|| ذلفی
وسیب دشمن طاقتاں کوں اے ڳالھ کݙݨ بھاوݨی ھئی۔ تہوُں انہاں ات واری اڳلے الیکشن تئیں تانگھ تانگھݨ دی بجائے ھُݨٰیں نال اڳلے دی ننویں شطرنج سترݨ شروع کر ݙتیءِ۔ اڄ ساکوُں ملتان ئچ اوُں شطرنج دے موھرے ستریندے نظرآئین۔
سرائیکی مہاندریاں دا اڳلا الیکشن بھڑݨ کوئی ننویں ڳالھ نہ ھوسی۔ اِیں توُں پہلے وی انہاں الیکشن بھڑن۔ سائیں تاج لنگاہ سمیت پاکستان سرائیکی پارٹی (پی ایس پی) دے کئی اڳواݨ پہلے ئی الیکشن بھڑ چُکن۔ پچھلے الیکشن ئچ پی ایس پی دے سائیں محمد نواز وینس، مخدوُم یوُسف رضا گیلانی دے مقابلے ئچ الیکشن بھڑا ھا۔ انہاں سرائیکی قوم پرستاں کوُں ووٹ کتلے مِلدے ریہن؟ نہ پُچھو تاں چنڳے۔ انہاں دا مقصد ووٹ گھنݨ نئیں ھوندا، بلکہ کہیں ٻئے دے ووٹ تروڑݨ ھوندے یا وت آپݨے ننگیچ توُں آپ پلوُں چاوݨ ھوندے۔
او ٻیا کوݨ ھِ جیندے ووٹ تروڑݨ کیتے سندھ ئچ گرینڈ ڈیموکریٹک الائینس (جی ڈی اے) بݨاوݨ دی لوڑھ پوندی ءِ؟ سندھی نیشنلزم دے ٻہوُں تکڑے ھووݨ دے باوجوُد، سندھی قوم پرستاں کوُں جی ڈی اے دے پلیٹ فارم توُں پچھلے الیکشن ئچ شرمناک شکست تھئیءِ۔ جی ڈی اے دی چھتر چھایا ھیٹھ الیکشن بھڑݨ اتے شرمناک ھار تے انہاں سندھی قوم پرستاں کوُں ککھ ئی ملال نئیں تھیا۔ سرائیکی وسیب دے انہاں مہاندریاں جنہاں اڄ ملتان ئچ جی ڈی اے بݨائے، انہاں کوُں اڳلے الیکشن ئچ چوکھیاں سیٹاں ڈھیجݨیاں ھِن؟
یہ بھی پڑھیے
”گاݙی گھَݨ گھَݨ لائی اے“ (وسیب یاترا :5)||سعید خاور
وسیب روانگی ،،گورنرسندھ دا سݙا (وسیب یاترا :4)||سعید خاور
لذت بھرے مہکتے ذائقے اور عید ۔۔۔||محمد عامر خاکوانی