سینے جھوکاں دیدیں دیرے(35)||نذیر لغاری

سویل تھئی تاں آلس بھن تے اٹھی کھڑے تھیوسے سوئٹرر لینڈ دی جپسی ڈش نال نریان کیتوسے پراوکہیں بھاڄی جیندے وچ لوݨ مرچاں تے تتامسالہ نہ ہووے لاشاری صیب دے ٻالیں نال ملاقات تھئی اوئیں تاں سارے ٻال ڈھیر سیاݨے ہن پروڈابال غلام عباس فلسفے دا جانوہے عبدالرزاق ساڈاشوق سانجھا ہے ساز آوازدا عاشق ہے جتھاں وداہووے واک مین کھیسے اچ پا ہیڈفون کنیں کوں لاتے میڈونا کنوں ڳھن تے بینٹ جیکسن تائیں ہر کہیں کوں سݨدے ۔بے نظیر کتابیں دی شوقین ہے ہرویلھے پڑھݨ دا خفت ہس

میں تےمشتاق لاشاری گھروں نکل تے کنز نگٹن اینڈ چیلسی کونسل دے دفتر ڳیوں اتھاں انھیں عملے کوں اپݨے گھردی بھن ترٹ کوں جوڑن سانگے آکھیا لندن اچ اپنے گھردی ہک سلھ وی آپ نوھے لاسگدے تہاکوں گھردا کوئی کم کراوݨے کونسل کنوں پچھپݨا پوسی گھر دے اندروں جیویں تہاڈادل آکھے گھرکوں سنگھارو سنوارو ٻاہر سارے گھر ہکوجہیں ہوسن اتھاں جے کوئی سوکھاسودھا ھے اپݨے سانگے ہے اتھ کہیں کوں پھوت مارݨ آکڑبدھݨ اتے ٹر ٹر پ کرݨ دی موکل کائنی لندن اچ پراݨے شاہی محل ماڑیاں ہن تاں ہن اتھاں لاہور دا ماڈل ٹاون تے کراچی دا ڈیفنس کائنی ڈیفنس ماڈل ٹاون تے گلبرگ دیاں ہزاراں کوٹھیاں اینجھیاں ہوسن جنھیں دے سانویں لندن وچ کوئی ماڑی کائنی اتھاں وزیراعظم ۵مرلہ دے ۱۰ ڈاوننگ اسٹریٹ اچ رہندے وزیراعظم دے گھر دا ناں سݨوتاں لگدے جوایں ڳھر دے ماشکی عباسی نواب تے لغاری مزاری سردار ہوسن پر جے گھرڈیکھ ڳھنوتاں ساڈے سرداریں دے کمداریں کارداریں دے گھروی وزیراعظم دے گھر کنوں وڈے ہن ۔۔کونسل دے دفتر کنوں نکل ہک چرچ اچ آڳیوں لاشاری صیب پچھلے سال ھیں چرچ دی سارسنبھال لہݨ آلی منیجنگ کمیٹی دا چیرمین ہا اتے ایں سال اوایں کمیٹی دا ممبر ہے اڄ

شام کوں کمیٹی دا کٹھ تھیوݨے تے لاشاری صیب ایں کٹھ اچ نہ آوݨ دی اگونہیں معزرت سانگے آیاکھڑے اتھ ہک مائی ٻیٹھی ہئی انھیں مائی کوں آکھیا جو اڄ میں کمیٹی دے کٹھ اچ کائنا آسگساں مائی لاشاری صیب دا عزرمنیا خیر خوش کیتی حال حوال پچھیس تے اساں ول لاشاری صیب دی کاراچ ایسٹ ہیم ول آیوسے ایسٹ ہیم پچ تے میں چارلٹن کورٹ آگیم اتھوں ٹکٹ آن سنبھالیم اڄ کراچی واپسی دا ٹکٹ کنفرم کراوݨے ٹکٹ چاتے لاشاری صیب دے گھر کیتھرین روڈآگیم اتھوں روٹی ٹکی کھا تے ول ایسٹ ہیم اسٹیشن تے آڳیوسے اسٹیشن کنوں ڳاڈی تے ٻہہ وکٹوریہ اسٹیشن ول آیوسے سویل جیرھے اسٹیشن کنوں ٻہہ تے ایسٹ ہیم ولیے ہاسے اوہک پندھ اگوں ہے وکٹوریہ دے بعد ساوتھ کنزنگٹن آندے وکٹوریہ لہہ تے سعودی ائرلائن دے دفتر آیوسے اتھاں ہک عرباݨی تے ہک انگریز مائی بیٹھی ہئی ڈونھائیں ناسیں کنوں واچھیں تائیں کھل تے ساکوں جی آئیں کوں آکھیاساکوں کھلݨ تاں وسریا ودا ہا ھیں واسطے انھیں کوں مرک ۵ے ڈٹھوسے اتے اپݨی غرض ڈسیوسے مائیاں مشین نال متھامارݨ پئے گیاں کمپیوٹرتے انگلیں ایویں پیاں بھڄدیاں ہن جیویں گوگڑے تے امریکن سنڈی ودی ٹپدی ہووے تھولی دیر عرباݨی سراتوں تے چاتا بھربھٹے چھک تے متھے تے چارکھیونس تھوڈیں تے نچدی کھل وسماسٹیس ڳلھیں دا چگھ اتھائیں دا اتھائیں گارچا کیتس ٻتریہی لگالیس چااتے سرلوڈ تے آکھیس جو ۱۵ اگست تائیں کراچی ونجݨ َسانگے کوئی سیٹ کائنی ساڈے ہاں دراہ کیتا اکھیں دے اگوں بل ٹنڈݨ بھجݨ پئے گئے سنگھ کوں ڳل گھوٹ پیا تھیوے ووئے مائی عرباݨی شالا عرب دی خیرہووی ساڈے نال وانج تاں نہ کرساکوں ایویں ہتھیں سکھݨاں تاں نہ ٹور تر تر انگریز مائی کوں وی ڈٹھوسے پراوکہیں بے ردھیمے اچ رجھی پئی ہئی ووئے مائی عرباݨی ساکوں پردیس نہ رول کوئی راہ کڈھ عرباݨی مائی کوں پتہ نہیں ساڈے اتے ترس آئے یا ککاند کنوں بھسیج تے اساں کنوں چیل چھڑاوݨ چہندی ہئی آکھیس جو جے آکھوتاں لاہوردا روٹ ڈیکھاں ہݨ وت ساڈیاں واچھاں پٹیج گیاں ووئے مائی ساکوں پاکستان اچ کتھائیں چاسٹ اساں ڳھر آپے پچ ویسوں چارمنٹ ٻعد ساکوں ۳۱ جولائی دی خبر سݨا ٹکٹ بݨاساڈے ہتھ اچ ڈے وت بےکم اچ رجھ ڳئی وکٹوریہ اسٹیشن تے ول آیوسے تے آپݨی ڈسٹرکٹ لائن دی ٹیوب اچ ٻہہ تے مونومنٹ اسٹیشن تے آن لتھوسے مونومنٹ ہک یادگارہے اسٹیشن دے ٻاہروں ہک ٹھکݨ جیہاں منارا بݨیا کھڑے اے منارا یاد ڈیویندے اوں ویلھے دی جڈاں لندن اچ بھالگی ہئی بھا کیویں لگی کیں ساڑیا ہا لندن کوں کہیں پیرو آڈھی پیر چاتا یانہ ڳڑاترٹݨ سانگے چھڑاننانوں ڈھہݨ ضروری نہیں ڳڑاتاں کہیں ویلھے وی ترٹ سگدے کتھائیں وی ترٹ سگدے کہیں تے وی ترٹ سگدے لندن تے وی ڳڑاترٹاہوسی ایڈوں ڈوجھے چارلس پیودا پورچاوݨ سانگے کرامویل دا مڑھ کڈھواتے پھاسی تے چڑھایا تے اوڈوں دھوں دکھݨ پئے گیا دیرنہ تھئی جو ۱۶۶۶اچ لندن اچ أشااٹھئے بھانبھڑبھڑکئے بھوئیں امب تاں نہ آیاپر بھوئیں تے بچھیا کیا پہلے ڈیہاڑے ۱۳ ہزار گھر سٹرتے کیری تھی گئے اتے بھا۴۳۶ایکڑبنسی تے درگھریج گئی چوکھے موئے چوکھے بچئے کیندا سینہ سڑیا کینداہاں ٻلیا کون آپ موا کیندے ٻال موئے بھاتاں بھاہ سکئیں نال ساوئیں کوں وی ساڑڳھتیندی ہے مونومنٹ کنوں ٹردے بسیں دے اڈے تے آگیوسے لندن اچ اٹھواں ڈینہہ ہے اڄ تاں آپݨے دفتر ونجوں ہݨ اساں بس تے بہہ تے اپنے دفترپئے ویندوں ۱۵ سال پہلے کراچی اچ جنگ دی لندن ڈیسک دا انچارج بݨیا ہم محمد سرورجنگ لندن دا نیوز ایڈیٹر بݨ تے آیاہا تاں اوں میرخلیل الرحمن صیب کوں آکھیا ہا جو جیکر میکوں جہانزیب نزیرلغاری تے انور سن رائےمل ونجن تاں میں لندن اچ ڈینہہ دے تارے تروڑ تہاڈے اگوں آن سٹیساں محمد سرور آپ تاں ٻہوں سیاݨابندہ ہے جہانزیب تے انورسن رائے وی لاجواب ہن پر میں کون تے کیامن آنم کہ من دانم میرصیب ساکوں نوائے وقت وچوں سڈوایا جہانزیب کوں لندن پارسل کر چھوڑیو نےساکوں کراچی اچ لندن ڈیسک دا نچارچ چابݨیونے تے انورسن رائے آوݨ نہ واریاول جڈݨ وی ساکوں لندن بھیجݨ دا موسم آیا کھمݨ کھمی جھڑڳاجاں کرتے وسݨ پئے گیانانواں وھی تے چڑھݨا ہاتے اساں جنگ گروپ اچ ایڈیٹر بݨݨا ہا ھیں سانگے سرسٹ تے گادھی کوں گیڑاڈے کھوپے پاتے جپئے رہ ڳیوں وسیب تے ننانواں یا کال کریہہ تے وانج تھیو ے دھاڑیں تاں مارکھڑدوں پیا ہئسوں کت جوگے دفترآیوں تاں ایویں لگے جیویں چراغݨ سائیں دی سواری آن لتھی ہووے جنگ لندن دے ایڈیٹر ظہور نیازی دی کھل نہ جھلیجے توڑے جو بائی پاس کرواتے ترئے وال صاف کرائی ودا ہا وت وی گھٹ تے گلکڑی پاتس جہانزیب وی نہال ہا اعجاز ڈاڈھی سک نال ملیا علی کیانی تے عامر غوری وی گلکڑی پاتے ملئے سارے عزتیں شانیں آلے دوست اساں جہیں بے لکھݨیں کوں محبت نال پئے ملدن وڈی گالھ ہے تھولی دیر بعد ساڈے ایڈیٹر انچیف میر شکیل الرحمن وی پچ گئے اکھیونے اتھاں کیویں اکھیوسے ٻاہردی ہوالواوݨ اکھیونے چوکھی لگی اکھیوسے حالی تاں لگدی پئی ہے جڈاں پوری لگسی ول حال ڈیسوں شکیل صیب آپݨے دفتر اچ ونج بیٹھے تے اساں سنگت نال کوڑکٹݨ کھڑڳیوں لاشاری صیب ساڈا ہتھ جہانزیب دے ہتھ اچ ڈے اساں کنوں مکلاتے آپ پچھوں تے ول گئے اتے اساں اتھائیں کھڑڳیوسے جنگ دے دفتر دی بہوں وڈی ماڑی ہے ہیٹھ پریس دیاں مشیناں ہن ہن اتے وڈے ہال اچ دفتر ہے ہک پاسوں گروپ چیرمین ایڈیٹرانچیف تے ایڈیٹر دے دفتر ہن بے پاسوں دی نیوز انٹر نیشنل دادفتر ہے لندن وچوں جنگ دے نال دی نیوز وی نکلدے اج جہانزیب کاپی بݨویندا ٻیٹھے کراچی اچ جنگ لندن دا پورا نیٹ ورک ساریاں خبراں پاکستان وچوں ٻݨ تے لندن ویندین اتے لوکل خبراں لندن دیاں سیاسی تے وسیبی سرگرمیاں نال رلاتے اخبار جوڑیاویندے جہانزیب سرکھنیندا ہی ۔۔کائنی تے اج اونکوں سر کھنݨ سانگے واندکائی وی کائنی جڈاں کاپی لاتے وانداتھیسی تاں جہانزیب اعجازتے میں آصف ڈار دے گھرویسوں اتھاں وی ساڈا دراٻانہیں تھیونا اتھوں اساں ونجݨے کلب ۔۔۔دوستی کلب