سینے جھوکاں دیدیں دیرے(25)||نذیر لغاری

لیسٹر اسکوائر ہک پارک داناں ہے جیندے چودھار سینما نائٹ کلب رلیسٹوران پب ہٹیاں تے ٹیلی فون بوتھ نظردن لیسٹر لندن دے ٻاہروں ہک وستی دا ناں ہے شہردا ہر علاقہ شہر دے ٻا ہروں کہیں وستی دے ناں تے آباد تھیاپئے آکسفورڈ سرکس لندن اچ اتے آکسفورڈ شہر لندن دے ٻاہرو ایویں لیسٹر شہر دے ادھ اچ تے لیسٹر وستی شہردے ٻاہروں ’’’جتھ اوپرے اقتداردی چھاں نہ پئی ہووےاتھ شہر وستیں سانگے اتے وستیاں شہریں کیتے اوپریاں نہیں ہوندیاں کراچی وچ انگریز یں سڑکیں ڳلئیں تے علاقئیں دے ناں اوپرے رکھئے برنس روڈ نیپئر روڈ لارنس روڈ میکلو ڈ روڈ کوئنز روڈ وکٹوریہ روڈ کلب روڈ انگریز گئے تے انھیں سڑکیں دے ناں رکھیج گئے ابراہیم اسمعیل چندر یگر روڈ مولوی تمیزالدین خان روڈ سرعبداللہ ہارون اسمعیل چندریکر روڈ راجہ غضنفر علی خان روڈ وستئیں وچوں لوک آندن تاں اودرے تھی تے ایڈے اوڈے ودے ڈہدے ہوندن

اللہ سائیاں کتھ آگیوں اتھاں پراݨے نانویں اچ اونویں چس ہے جیویں لندن اچ ہے لطیف تے فریددا ملیر وسیب کنوں لڈیج تے کراچی آن وسیئے ۔۔لانڈھی دے ناں وچوں أپرپ دی دزک نہیں آندی ڄام صیب آف لسبیلہ دے گھر پچھوں علاقے داناں لسٻیلہ پئے گیا ایویں لگدے جیویں وستی شہر اچ آئی ہووے پرڈیفنس ونجو تاں ایویں لڳسی جیویں کہیں ایرانی شہر اچ آئے ودے ہووو خیابان حافظ خیابان رومی خیابان شمشیر خیابان ہلال خیابان بدر خیابان توحید۔۔۔ہرپاسوں خیابان آباد ہن ول جے نارتھ ناظم آباد ونجوتاں شارع نورجہاں شارع شیر شاہ سوری شارع اکبر شارع جہانگیر شارع شاہجہان شارع اورنگزیب عالمگیر شارع ہمایوں ’’ایویں لگدے جوآگرہ یادہلی اچ مغلیں دے محلات دے اگوں ودے ٹردے ہوووں

ایں نہ ہووے جو ملکہ نورجہاں دا بھراآصف جاہ لکڑچاتے ساکوں تڑھائی ودا ہووے تے اپݨی بھیݨ دے جو انترے شہریاردیاں اکھیں کڈھ تے سلایاں چاتے ساڈے پچھوں ودا بھڄدا ہووے شہریار مترائی مادا ڄو انترا ہاجے مامے دا جونترا ہووے ہاتاں شہزادہ خرم شاجہاں نہ سڈاوے ہا۔نہول مامے دی دھی ممتاز محل سانگے تاج محل ٻݨے ۔ہا اتے نہ شاہجہاں سکی دھی نال منہہ کالا کرےہا۔۔۔۔لیسٹراسکوائر اچ روزمیلہ لگدے اساں وستی آلے لوکیں سانگے اے ڈاڈھی چس دی جاہ ہے پارک دے چودھاروں پکا فرش ٻدھاپئےاینکوں سڑک چا آکھو پر اتھاں ترائے پاسوں ٹریفک نہیں چلدا ہک پاسوں پروبھریاں تھی تے گاڈیاں ٹپدین لیسٹرا سکوائر دے میلے تے ہک پاسوں کوئی لوک فنکار گاندا کھڑا ہوسی اوندے نال کوئی بیا فنکار سنگھ تے زورلائی کھڑا ہوسی ہک پاسوں سوہݨیاں سوہݨیاں چھوہریں ہتھیں اچ گٹار گھن تے جین دیاں پنیٹاں پاتے پلتھری ماری بیٹھیاں ہوسن ہواانھیں دے سونے رنگے والیں دے نال پئی کھیڈدی ہوسی انھیں دے کٹھے چھوہر وی ہوسن جیرھے سرنال سر رلاتے فن دان پئے کریندے ہوسن

اے ڈیکھو اے روبوٹ ہے چوکی رکھ تے اوندے اتے چڑھیا کھڑے مشین وانگوں ہتھ پیرتے گھچی پیا چلیندے کائنا اے تاں بندہ ہے جیڑھا اپݨے لباس تے چکڑرنگالیب چڑھائی کھڑے ہتھیں اچ دستانے ہن انھیں تے وی لیب ہے پیریں اچ جراباں اتے ول بوٹ اووی رنگئے پئن ڳھاں بوتھی کھاڈی متھابھربھٹے پپلیاں اتے سردے وال وی رنگی کھڑے اکھیں تے کھوپے وانگرعینک چڑھائی کھڑے عینک تے وی لیب چڑھیاپئے چوکی دے نال ٹافیاں پین بال اوندے کولھوں ویندن اونکوں پیسے ڈیندن اومشین وانگوں ہک خاص انکل نال گوڈے نوڑیندے اتے جھکا تھی تے ٹافیاں چاتے بالیں کوں ڈیندے کہیں ٻال دے والیں کوں ہتھ چالیندے جے کوئی چھوکری کولھوں اونجے تاں اصلوں مشین وانگوں اوندی چمی گھن گھندے۔۔۔۔۔۔

ذرا اگوں ونجوتاں مصور ٻیٹھن اتے کینوس تے شکلاں ٻیٹھے بݨیندن کوئی چھوکری کوئی چھوہر کوئی تریمت کوئی ٻال کوئی ٻدھڑا کوئی نینگر انھیں سموریں دے نال بوتابݨ تے ٻیٹھا ہوسی تے مصور اوندی شکل پئے بݨیندے ہوسن ودھ کنوں ودھ ڈاہ پندھراں منٹیں وچ پینٹنگ تیار ہک سوہݨی چھوکری آپݨی ستھل تے مصوری پئی کرویندی ہے مصوری چھوہردی ستھل جھولی اچ پاتے رنگیں وچوں برش ٻوڑ تے ستھل تے گلکاریاں پیا کریندے اگوں ہک چھوہرڈڈھ تے مصوری پئی کرویندی ہے مصوردنی دے اتوں ڈڈھ کوں کینوس بݨاتے رنگ تے نور دی راندرسائی ٻیٹھے آوسائیں ہتھوں پیسے وی گھنسی اوندے نال ہک بیا مصوربے پورھئے کوں لگاپئے ہک بی نینگر جہیں چھوکری دی گلھ تے برش ٻیٹھا پھریندے جاݨ گلھ تے گیرا گھوکسی یا مٹݨ آنا ڈیسی اساں ڄاڄلیوں تے رج دے مخول ڈیکھ ڄلیوں پر اینجھے مخول اڄ پئے ڈہدوں ’’’’ولدے سال اتھاہیں میں تے فریدی صیب کٹھے ودے ہاسے پارک دے وچ بݨیے چارے تے بنچاں لاتھین

اتھاں ہک بنچ تے چھوکرا ٻیٹھاہا اتے اوندی جھولی اچ چھوہر ستی پئی ہئی چھوکری پینٹ تے شرٹ پاتی پئی ہئی چھوکرے اوندے ڈڈھ توں چولا ہٹایا تاں ڈڈھ سونے وانگوں ٻلکݨ پئےگیا چھوہر چھوہر دے ڈڈھ تے ہتھ پھیرݨ پئے گیا آکھیم فریدی صیب ڈٹھے وے اے نامراد بے لجے لج لجوائی ٻیٹھن فریدی صیب اہدن کتھاں دے سائیں چھوکری دے ڈڈھ اچ درد ہے تے چھوکرا اونکوں اڈھیندا ٻیٹھےیاوت گیہن ہوسس اوہا پیا کڈھیندا ہوسی ۔۔۔۔۔

ہک دفعہ اتھاں برکت بھائی نال وی آیاہم لیسٹر اسکوائر دے پارک اچ ٻیٹھے ہاسے وڈا متھا مارتے ویجیٹبل برگر گولیے ہانسے اوہے ٻیٹھے کھاندے ہاسے گھاتے ڈھیر سارے چھوہر تے چھوہریں وی ٻیٹھیاں ہن ساڈے اصلوں نال ہک چھوکراپیر درگھیری ٻیٹھا ہا ہک چھوکری اوندے نال مشکریاں ٻیٹھی کریندی ہئی ایویں پئی لگدی ہئی جیویں وہری ودی ہووے یا جیویں کت چاتی ودی ہووے کیا کیتس جو چھوکرے دے درگھے پیریں دے اتوں ول کھڑی ہک پیرسڄیوں تے بیا کھٻیوں ول ان چتی چھوکرے دی جھولی اچ آن ڈٹھی برگر چٻیندئیں برکت بھائی دے مونہوں نکھتا چھچھوری میں برکت بھائی دی گالھ تے کھل پیم کھلیم کیا بس کھل جھلیجے ناں میڈے واتوں وی نکل پیا چھچھوری ۔۔۔۔اہدن جیں لیسٹر اسکوائر نہیں ڈٹھااوں لندن نہیں ڈٹھا ایویں أتھاں وی مارکااہدن جنے لہورنی ویکھیا اوجمیانی اساں لہور وی ڈٹھی ودوں اتے لیسٹراسکوائر وی ڈیکھ ڳھدے سے ہݨ سدھ پئی جو ڄاوی پیوں اتے لندن آوݨ دی تصدیق وی تھی گئی سامݨے اوڈیݨ سینمااچ فلم لگی پئی ہے شکسپئر ان لوجاوید سومروپچھدے جو فلم ڈیکھسیں میں آکھیم جو کیااے فلم نائی ٹے نک کنوں چنگی ہے آکھیس جو میں کیا آکھ سگداں جو انھیں وچوں ڳیڑھی فلم چنگی ہے میں ٹائی ٹے نک دے جادو اچ وداہم جیرھی کراچی دے نشاط سنیما اچ ڈٹھی ہم

ڈوجھی واری وت اتھائیں ڈٹھم تاں فلم دے نویں نویں بھیت کھلئیے ایں فلم دا بجٹ پنجاب دے بجٹ کنوں زیادہ ہا اتے ایندی پہلے سال وی کھٹی پاکستان دے بجٹ کنوں زیادہ ہئی یار جاوید اسݨئیے سے جو ٹائی ٹے نک دی ہیروئن کیٹ ینسلیٹ اتھائیں رہندی ہے اوندے نال ملݨ دا کوئی سنجوک تھی سگدے اکھیس کوئی بیا حکم آکھیم ایندا مطلب اے تھیا جو کرا جواب ہے ۔۔۔لیسٹراسکوائردے آسوں پاسوں کے ایف سی گولݨ پیوں نہ لدھوسے ایمپریل نائٹ کلب دے پچھلے پاسوں ول گیوں اتھاں سارے چینی آباد ہن بازار دے دکاندار تے گاہک سارے چینی چین دیاں زالیں تے مرد بالیں کوں نال رلاتے ٹردے پھردے ودے ہن چینی چھوکرے ہم وطن چھوکرئیں دے ہتھ اچ ہتھ پاتے من دی موج اچ تن دی تار دا بھراسہ کر تے اندری اندر جھمراں پاتی ودے ہن ۔۔چینی علاقہ ہک پاسے رہ گیااتھاں ہک دکان دے ٻاہروں لکیاپئے سیکس شاپ آوسائیں اے تاں چکلہ ہے بھڄوا تھوں جاوید تے میں ایں علاقے اچوں ٻاہر نکل آیوں اتے ایمنبکمنٹ دے اسٹیشن تے آن کھڑوں جتھوں اساں ہک ٻے کنوں ول ملݨ دے وعدے تے مکلایا میں ایسٹ ہیم تے جاویدوکٹوریہ دوروانہ تھی گیا ایسٹ ہیم اسٹیشن تے لہہ تے پیدل ساوتھ ہائی اسٹریٹ دوٹرپیاں اتے سدھاچارلٹن کورٹ آن کھڑاں جتھاں اپارٹمنٹ نمبر ۱۷ میڈی تانگھ تنگھینداپیا ہا