سینے جھوکاں دیدیں دیرے(23)||نذیر لغاری

زمین ہکی جاہ تے تھہری کھڑی ہے سجھ چندر تارے اوندے چودھارپئے پھردن گیلیواہدے سارا کوڑ ہے زمین سجھ دے چودھار پئی پھردی ہے

اٹلی دے اتوں لنگھدئیں فریدی صیب تاکی دے ٻاہروں ٻیٹھے ڈہدݨ چٹاکپاہ جھڑ ہوا اچ ودا تردے تے ہوا جھڑو چوں شکلاں پئی کڈھیندی ہے جھڑدا اینجھا سوہݨا نظارہ کڈاہاں نہ ڈٹھاسے اے ہݨ پیرس دے اتوں پئے ٹپدوں پتہ نہیں چوڈواں لوئی زال کوں ڳھن تے کن تے گیا ہوسی انقلابی شاہی محل دے دربھنی ویندے ہوسن نپولین ہک قافلہ گھن تے مصر فتح کرݨ پیا ویندا ہوسی جنرل ونچورا پیرس کنوں نکل تے دیرے پیا ویندے ہوسی اتھوں ڄام پور اتے راڄن پور کنوں تھیندا روجھاݨ دے پروں کن ونج پڄسی اتے کاݨے رنجیت سنگھ سانگے مزارئییں نال بھڑسی کھلا ہی ووئے نامراد ا بحراوقیانوس دآ اتوں ٹپ تے لندن دی پوادھی چنڈ تے ودے اڈردوں میں ڈوجھی واری ہیتھروتے لہساں ڈوجھی واری آوݨ دی پھوت ہے فریدی صیب کنوں سینئر تھیا ٻیٹھاں تلے ٹیمز پیا وہندے اور یجنٹ پارک ہے نال ہائیڈ پارک ہے دریادی مݨ تے پالیمنٹ ہاوس ہے اومیلیم ڈوم نظردا پئے ۔۔۔جہاز جھکا تھی ڄلیا اتے اساں ہیتھرو تے آن لتھوسے ائر پورٹ توں ٻاہروں آیوں تاں میڈی دید آفتاب دی عینک تے انیس دی ڈاڑھی تے پئی آفتاب برکت بھائی دا پتر ہے برکت بھائی ساکوں کراچی دا سونہاں کیتا انیس پنڈت حبیب الرحمن خان دا پوترا ہے پنڈت حبیب الرحمن مہاتماگادھی دا سنگتی ہا پنڈت حبیب الرحمن دے ناں مہاتما گادھی جیرھے خط لکھئن انھیں دی ہک کتاب بݨی تے کتاب چھپ وی گئی ہے انیس الرحمن کراچی اچ میڈے کٹھے کم کریندے ۔۔ائر پورٹ تے تاں آکرم شاداد بلوچ آوݨا ہا آفتاب کوں آکھیم جو لا وڈاسپیکر تے اعلان کروا جو اکرم شاد اد بلوچ پیش تھیوے اونکوں کجھ ناں آکھیا ویسی آفتاب کنڈولائی تے اکرم شادادتے دیدپئے گئی ووئے میاں جھلو آفتاب کوں اکرم گاڈی دوگھن گیا لندن اچ مینہہ پیاوسدے کراچی اچ کئی سالیں کنوں مینہہ سانگے لوئھ ڳئے ہاسے فریدی صیب اکرم نآل ڈرائیونگ سیٹ نال ٻیٹھے اتے میں آفتاب تے اینس پچھوں ول ٻیٹھوں اکرم دے موبائل فون دی گھنٹی وڄی پروں لاشاری صیب پیا پچھدا ہا جو مارکا آئن یا کائنا اکرم ہا اچ ولدا ڈتا تاں لاشاری صیب انھیں کوں آکھیا جو انھیں کوں میڈے سینٹرل لندن آلے گھر اچ گھن آو اے گھر لاشاری صیب دے حلقہ انتخاب اچ ھے اتھوں اوترئے واری کونسلر دا الیکشن کھٹی کھڑے اتھاں لاشاری صیب دے ڈووڈے پتر غلام عباس عبدالرزاق تے دھی بے نظیر رہندن ۔اتھاں اساں کپڑے وٹائے لمے ایشیادی ستھݨ تے چولا لہاتے یورپ دی پینٹ شرٹ پاتم ٹائی بدھ تے شیشہ ڈٹھم بندہ بدلیا کھڑا ہا آپ کوں آپ نہ سنڄاتم فریدی صیب وی تیار تھی گئے ہن ڈوکاریں دا قافلہ بݨ ڳیا ہک کوں لاشاری صیب پیا چلینداہا تے ٻی اکرم شاداد بلوچ اے کنزنگٹن اینڈ چیلسی باروداٹاون ہال ہے اتھاں ہک ہال اچ تھرڈورلڈ سالیڈیرٹی دا سیمینار تھیوݨے سیمیناردا منڈھ بدھیڄݨ اچ اجاں دیرہے نال آلے ہال اچ ہک کانفرنس تھیندی پئی ہے اتھاں أبھے تے لمے کوریا دے رل ٻہن تے ہک تھیوݨ دیاں ڳالھیں پیاں تھیند ین اسکاٹ لینڈ توں لیبر پارٹی دا ممبرپاریمنٹ جارج گیلووے کانفرنس دی صدارت پیا کریندے دنیا جہان دے کمیو نسٹ کٹھے تھئے ٻٹھین ایشیا افریقہ یورپ امریکہ تے لاطینی امریکہ دے کمیونسٹ ابھے تے لمے کوریا دے خانیں دے گالی تھیوݨ تے اپݨیاں صلاحیں پئے ڈیندن ائرلینڈ دا کامریڈاہدے جو چنڳاتھیا جو ڈوہیں صدرمل ٻٹھیݨ ابھاتے لماکوریا ہکو کجھ ہن ہکے پیوما دی اولا درنگ ہکو نسل ہکا ٻولی ہکا وسیب ہکو لوک ہکو کجھ کوئی میں کنوں پچھے ساڈے ائر لینڈدے ڈوبھانگے تھئے پئن نہ مرݨ دے نہ جیوݨ دے نہ ڈکھ دے نہ سکھ ساڈا وسیب ونڈیاپئے وسیب دا ڈکھ کوئی اساں ائر لینڈآلیں کنوں پچھے ائر لینڈ دا کامریڈ ٻیٹھا تے ہندوستان کامریڈ أٹھی کھڑاتھیا اوں آکھیا کوریا ہک نہیں ڈو ہن ہک کمیونسٹ کوریا ہے ہک سرما یہ دار کوریا ہے ہک طبقاتی کوریاہے ہک غیر طبقاتی کوریا ہے ہک کوریا انصاف ڈیندے بیا انصاف کھسیندے ہک کوریا انقلاب دا تجربہ کیتی ھڑے بیا کوریا انقلاب دے اگوں چھاٻ ڈ تی کھڑے کوریا ہک کائنی میں تے فریدی صیب حیران ٻیٹھوں فریدی صیب یادرکھا ھے جے اساں قومی سوال حل کروی گھد اتاں ساڈے وسیب وچ طبقاتی سوال اوئیں کھڑا ہوسی اے ڈوبزرگ قومی تے طبقاتی سوال کوں انجوانج کیتی کھڑن ہندوستان اچ طبقاتی سوال حل نہیں تھیا ایں گالھوں ہندوستانی کامریڈ طبقاتی مسئلے دا وکیل بݨیا کھڑے ائر لینڈ اچ قومی سوال حل نہیں تھیا ایں ڳالھو ں اوندے اگوں وڈا مسئلہ قومی سوال ہے فریدی صیب جے ڈوہیں سوال ہکے لنگ نہ چاتوھے تاں ول ڈکھاھے قومی بھڑاند دے بعد طبقاتی بھڑاندتھیسی جارج گیلووے مٹھی تقر یر کیتی اوں ڈونھائیں سوالیں تے گالھ کیتی تے کوریا دے ہک ٻے دے کو لھوں تھیوݨ کوں سرمایہ داری تے فاشزم دی شکست آکھیس