سینے جھوکاں دیدیں دیرے(19)||نذیر لغاری

لندن میوزیم کنوں ٻاہر نکل تے ٹیوب اسٹیشن تے آگیوں ڈسٹرکٹ لائن تے ٻہہ تے ایسٹ ہیم دو ٹرپیوں ’جاوید سومرو مرووی نال ہے زمین دے ہیٹھ ٹیوب بھڄدی ویندی ہے ہر ڈو منٹ دے بعد اسٹیشن آویندے اتھوں دی ریت اے ھے جو گاڈی دے کھڑونجݨ دے بعدلہݨ والے لہسن ول چڑھݨ والےچڑھسن اے نہیں تھی سگدا جو کہیں اسٹیشن دے چھیکڑی مسافردے لہہ ونجݨ کنوں پہلے کوئی بندہ گاڈی تے چڑھَݨ سانگے پیرودھاووے چڑھݨ والے مسافر سدھی تندیر بݨائی کھڑے ہوسن ہک دے بعد ٻیا چڑھسی کیوں جوتندیر تروڑن دی ریت کائنی ایں ڳالوں تندیر ترٹدی نہیں اتھاں ریت چھڑی ریت نہیں اینکوں قانون سمجھو۔۔۔۔۔گاڈی ٹرپئی اپٹن پارک اسٹیشن کنوں سنبرݨ پئے گیوسے جوڈو منٹ ٻعد ایسٹ ہیم آوݨے آخر ڈومنٹ وی گزرگئے تے ایسٹ ہیم وی آگیا اتھوں لہہ تے کیتھرین روڈ والے پآسے ٹرپیوں

لاشاری صیب ساڈی تانگھ اچ ٻیٹھے ہن انھیں ساکوں نال چارلایاتے انھیں دی کار سرورصیب دے گھر والے پاسے بھڄن پئے ڳئی سرورصیب میڈا پہلا نیوز ایڈیٹر ہے ایندے نال میں صحافت شروع کیتی ہئی ۔عمراچ میں کنوں چھوٹا ہے پر صحافت اچ میڈآ پہلا باس ہے پہلا استاد بھانویں حاجی محمد خان ڈوݨہ ہووے تےبھانویں پہلا باس سرورصیب ہووے وسردا نہیں لندن وچوں سرورصیب دا ہفت روزہ نیشن اتے روزنامہ کشمیر ٹائمزنکلدے سرورصیب ۱۷سال دی عمر اچ صحافت اچ آئے ۱۸ سال دی عمر اچ ڈیسک انچارچ تھی گئے ۲۰سال دی عمر اچ نیوزایڈیٹر بݨ ڳئے اتے ۲۲سال دی عمراچ یونیورسٹی وچ پڑھاوݨ پئے گئے

بھلا کوئی اینجھا پروفیشنل وی ہوسی جو پیپلزپارٹی دا اخبار مساوات بندتھیوݨ دے اگلے ڈینہہ جماعت اسلامی والے اپݨے اخبار جسارت دا نیوزایڈیٹر بناوݨ سانگے گھن گئے جسارت کوں چھوڑتے نوائے وقت کراچی دا پہلانیوز ایڈیٹر نݨیے بھٹو صیب ریڈیوتے انگریزی اچ تقریر کرینداہا تےاے براہ راست اوندا أردو اچ لفظ بہ لفظ ترجمہ کرینداہا ایڈوں تقریر ختم تھیندی ہئی تے اوڑوں ’’’کاپی تیار ہوندی ہئی ۔۔۔۔۔۔سرور صیب دا گھر ایلفرڈ دے علاقے اچ ھے لندن والا قاضی خاندان سرور صیب دے پاڑے اچ رہندے ایں خاندان کوں نوازشریف تے اسحاق ڈار رل مل تے چٹ کیتا ہا انھیں دے اکاونٹ استعمال کرتے منی لانڈرنگ کیتی ہانے کالے دھن کوں چٹا کیتا ہانے ایمکس کریم نال ناں قاضیئیں دے اکاونٹ نال قاضی خاندان شریفیں دے بھوگ اڄاں تائیں ودا بھڳیندے ۔۔۔۔۔۔۔۔۔۔

لاشاری صیب جاوید سومرو تے اساں سرور صیب دے گھرپچ گیوسے جتھاں سرور صیب دی دعوت تیارہے دعوت اچ لاہور توں منوبھائی تے جاوید شاہین وی ہن پئے سرور صیب لندن اچ رہندے ول وی نہ پیندے نہ پلیندے دعوت اچ پیپلز پارٹی برطانیہ دے صدر میاں افضل خالد سینئر نائب صدر چوہدری محبوب استاد جہانزیب صادق بلوچ سنئیر صحافی ناصر ملک تے ترائے چارٻے سنگتی وی ٻیٹھن منو بھائی پوٹھوہار دا قلمکار ہے جئیں ۴۰ سال تائیں رنج برپٹ اچ قلم نال ہل وہائے اتے باغ رادھس ہک پوری نسل کوں متاثر کیتس لکھاں انسان اوندے علم تے اوندی سچائی دا اعتبار کریندن ۔

کمیونسٹیں دی کربلا دے تسے سنگتی ٹراٹسکی کوں جناب لینن دا خلیفہ بلافصل منیندے اتے جوزف آسٹالن نال اوندا ہو جھیڑا ہے جیڑھا بالشویکیں دے باغ فدک دے جھیڑے کنوں وی پہلے دا ٹردا پئے اہدن لینن اپݨے بعد اسٹالن کوں پارٹی اتے انقلابی حکومت دا اگواݨ بناوݨ دے حق اچ کائنا ہا پر اونکوں چیکڑی ویلھے مس نہ ملی جو اوا پݨے دل دی گالھ لکھ سٹے جے لینن کوں مس تے قلم پووے ہا تاں شئت ول اسٹالن لینن گرڈوچ پر ولتاری انقلاب دی اگواݨی نہ سنبھال سگے ہا ہݨ ’’ڄے دا کیاداروں ہے جے ایں نہ تھیندا تاں اوں نہ تھیووے ہاوہائےویلھے اچ جے ڈیݨ وانگوں وات پٹی کھڑی ہے ساڈے سنگتی پچھلے زمانے دے جے کوں ہوں زمانے دی معروضیت اچ ٹھیک کرݨ چہندن اتے تاریخ دی نئیں وچ پھڈیڄ تے کھڑ ویندن تاریخ انھیں کوں اکھاڑتے بھکا مریندی ہے سرور صیب دے گھر پیٹھوں تے کئی سال اکھیں دے اگوں تے پھرگئے بھرڄائی گوہر باورچی خانے وچ رجھی پئی ہئی بیگم جہانزیب وی نال ہئی

اساں سرورصیب دے گھر دے لان اچ ٻیٹھوں ۱۶ جولائی دی شام کوںسردی کنڈاچ پہندی ہئی ہݨ اندردا سیک کڈھ تے پالے نال بھڑدے ٻیٹھوں ’’’’’شریف شرفا کارگل توں لہہ آئن ہݨ کیا تھیسی ؟کہیں سوال کیتا تاں ساڈی کھل نکل پئی اگوں جیرھاکجھ تھیووݨے اوتاں جڳ ڈیکھسی پرواشنگٹن وچ کیا تھئے کلنٹن وہائٹ ہاوس اچ نواز شریف کوں کیوں نہیں ملیا بلئیر ہاوس اچ کیوں درشن دان کیتس کلثوم نواز دا ناں ڳھن تے کیوں ہڈکڑیاں مریندا بیٹھآہا کلثوم نواز پئے کوں کلنٹن دے حوالے کرتے آپ شاپنگ سانگے کیوں ٹرپئی اٹھ ڈینھ پہلے بلئیر ہاوس اچ نواز شریف تے کلنٹن ملئے تاں کلنٹن کلثوم نواز نال ملݨ دی خواہش ظاہر کیتی نواز شریف ٻاہروں آتے زال کوں سڑوایا تاں سدھ پئی جواوتاں شاپنگ کرݨ ڳئی ہے

نواز شریف پھکا تھی تے کلنٹن دوواپس ول گیا تے کارگل دراس تے بٹآلک کوں خالی کرݨ رے پنے تے اکھرمارچھوڑیئے میٹنگ مکی تاں نواز شریف آپݨی ٹیم نال ٻاہرآیا صحافیاں سوال کیتے وزارت خارجہ دا ترجمان چڑڳیا اصلوں چیٹئیں آگیا ساڈے یار نیر زیدی نال آڑوٻٹ تھینداہا پر صحافی جھیڑا ودھݨ توں پہلے ٻاہرآگئے چوہدری نثارتے سرتاج عزیز وی نال ہن اتے کہیں ڳالھ دی ولدی نہ ڈیندے ہن وت اوہو سوال ہݨ کیا تھیسی

اساں آکھیا جو ہندوستان اچ وا جپائی گھیومکھن کھاوسی اتے پاکستان اچ فوج تکڑی تھیسی ول ڈوہیں رل مل تے لک چھپ کھیڈسن اتے چھیکڑ اچ جام پور وچوں اڈے دے نال بیٹھے اوں چیڑے موچی کوں سڈویسن جیڑھا پارٹ ٹائم مداری داکم کریندے ساڈا سنگتی ہتھ دی صفائی ڈکھیسی ول کشمیر دا قضیہ حل تھیسی اتے چھیکڑ اچ مائی بدرو تے دینو قوال دے تھالی واڄے وحسن برطانیہ ہیلتھ پآلیسی دی گالھ ٹرپئی فری مارکیٹ اکانومی اچ ریاست سگھڑ کیویں تھی سگدی ہے سرمایا داری اویلفئر اسٹیٹ داخیال کیو یں ہضم کیتی کھڑی ہے

سرمایہ دار ریاستاں تعلیم صحت روزگار تے جاہ ٹکاݨے دیامن کیویں بݨیاں کھڑین گالھ اے ھے جواے تاں سمجھوتہ بازی ہے سرمایہ داری آپݨی کھل بچاوݨ سانگے سوشلزم نال نکاح کیتے برطانیہ وچ لیبر پارٹی فرانس وچ سوشلسٹ پارٹی تے اٹلی وچ کمیونسٹ پارٹی سرمایہ داری دے اگوں ڈیٹرنٹ ہن ۔سرمایہ داری دی عالمی لٹ مار کنوں اکھیں نوٹی کھڑین پر آپنے آپݨے لوکیں سانگے رعائتاں ڳھدی کھڑین مارکسی انقلاب دا بھئو نہ ہووے ہاتا ں سرمایہ داری یورپ کوں پینھ تے رکھ ڈیوے ہا سرمایہ داری دی آپݨی کوئی اخلاقیات نہیں پر سرماریہ دار ریاستیں کوں اتلا تکڑا کیتی کھڑی ہے جو او لوکیں کوں سکھا جیوݨ دیاں ضمانتاں ڈیندین مشتاق لاشاری صیب منوبھائی جاوید شاہین میاں افضل خالد چوہدری محٻوب صادق بلوچ سرور صیب جہانزیب ناصر ملک جاوید سومرو اے حقیر فقیر نزیرلغاری ڈھیر دیر تائیں ٻٹ کڑاک مریندے رہ گئے نہ ٻٹ موئی نہ کڑاک مویا ۔۔۔۔

اساں تاں اپنے سرمنہہ تے جڈان خجح ماریئے سے اد وی نہیں مویا سرور صیب دے گھر ۴۰ بندیئیں دا ٹکر پکا اتے کھاوݨ والے ہاسے ڈاہ ٻارھاں آساں ڈڈھ نہ سکایا رڄ تے کھآدوسے سجاد حسین چک ۳۷ والا مجلس پڑھدے تاں اہدے جوہر مجلس کوں زندگی دی چھیکڑی مجلس سمجھ تے سݨیا کرواساں جڈاں ٹکر کھمدوں تاں اونکوں زندگی دا چھیکڑی کھاڄ سمجھ تے کھمدوں تے ھیں سانگے اکثر بدہضمی اتے بدنظمی دا شکار رہندوں روٹی ٹکی کنوں واندے تھی تے واپس ایسٹ ہیم آیوں اتھوں میں تے جاوید سومرو وت ٹیوب اچ بہہ تے وکٹوریہ دوٹر پیوں اتھوں کنوں وت ساڈی منزل کرسٹل پیلس پارک ہئی عنبرین نال ہیلو ہائے کیتوسے تے ول اپنے بسترڈے ٹرپیوسے