امریکا سے زیادہ سخی داتا کون ہے؟ ||مبشرعلی زیدی

امریکا سے زیادہ سخی داتا کون ہے؟ ہر سال اربوں ڈالر دوسرے ملکوں کو دیتا ہے۔ عالمی اداروں کو سب سے زیادہ رقوم دیتا ہے۔ امیر ترین یورپی ملک اپنے عوام کو صحت اور تعلیم مفت اس لیے فراہم کرپاتے ہیں کہ انھیں سیکورٹی پر بہت کم خرچہ کرنا پڑتا ہے۔ ان کا نیٹو کا ساتھی امریکا ان کی سیکورٹی پر اربوں ڈالر صرف کرتا ہے۔

پاکستان، اسرائیل، مصر، افغانستان، عراق، کتنے ہی ملک ہیں جو برس ہا برس اربوں ڈالر وصول کرتے رہے۔

امریکا نے کرونا وائرس ویکسین بنانے کی کوشش کرنے والے اداروں کو اربوں ڈالر ایڈوانس میں دیے اور ان سے وعدہ لیا کہ وہ کروڑوں ابتدائی خوراکیں اسے فراہم کریں گے۔

پھر یہ سخی داتا اور دیالو امریکا کسی کو ویکسین کیوں نہیں دے رہا؟ امیر یورپی ممالک بھی ویکسین کسی کو فراہم نہیں کررہے۔ کیوں؟

اس لیے کہ ان ملکوں کے لیے اپنے عوام سے بڑھ کر کچھ اہم نہیں۔ عالمی ادارہ صحت، اقوام متحدہ اور غریب ممالک کوئی بھی الزام لگائیں، جتنا چاہے برا بھلا کہیں، امریکا اور یورپ نہیں سننے والے۔

امریکا اپنی ضرورت سے دو گنا زیادہ ویکسین خوراکیں خرید چکا ہے۔صدر بائیڈن نے کہا ہے کہ اضافی خوراکیں غریب ملکوں کو عطیہ کی جائیں گی لیکن امریکی عوام کی ضرورت پوری ہونے کے بعد۔

دوسری طرف یہ پاگل خان ہے۔ اپنے عوام مر رہے ہیں۔ کھانے کو چنے نہیں۔ اسپتال بھرے ہوئے ہیں۔ بستر نہیں ہیں۔ آکسیجن گھٹ رہی ہے۔ ویکسین بہت کم دستیاب ہے۔ اور یہ بھارت کو مدد کی پیشکشیں کررہا ہے۔

ابے گدھے، اپنے گھر کی فکر کر۔

جب آپ جہاز کا سفر کرتے ہیں تو ہر بار آپ کو سمجھایا جاتا ہے کہ اگر دوران سفر ہوا کا دباؤ کم ہوا تو آکسیجن ماسک نمودار ہوگا۔ پہلے اپنا ماسک لگائیں۔ بچہ ساتھ ہو تو اس کا ماسک بعد میں لگائیں۔ ایسا نہ ہو کہ بچے کو ماسک لگانے کی کوشش میں آپ بے دم ہوجائیں۔ پھر نہ آپ کا سانس باقی رہے اور نہ آپ کے بچے کا۔

یہ قدرت کی ستم ظریفی ہے کہ ہلاکت خیز عالمگیر وبا کے دوران تاریخ کا سب سے احمق حکمران قوم پر مسلط ہے۔

……………..