ڈپریشن!|| ذلفی

ڈیپریشن۔

تحریر ذلفی۔

ڈیپریشن اج دے دور دی سب کولو وڈی بیماری ھے۔ ایں بیماری کولو جوجدے بندے ٻہوں آوکھے ہوندن۔ ڈیپریشن دا شکار کروڑاں لوکاں دی ذہنی، جسمانی تے رویہ جاتی سیما ریکھا ٻہوں ہی محدود تے ( vulnerable) تھی ویندی ھے۔ ایں بیماری دیاں کئی وجوہات تھی سڳدن خاص کر اڃوکی مٹیرئیلسٹ دنیا اچ ایندا ڈاریکٹ تعلق ساڈی سماجی زندگی نال جُڑیل ھے۔

اج کولو ڈاہ ویہہ سال پہلے ساڈی وسوں اچ ایں بیماری دا کوئی زیادہ اتا پتا کائنا ہا تے لوک ایکوں کوئی بیماری وی نہ سمجھدے ہن۔ پر ہُݨ اے بیماری شہریں دے نال نال دیہات دی سطح تک وی پُڃ ڳئی ھے۔

اساں پہلے اے ڈیہدے ہیں جو ایں بیماری دا شکار لوکیں دیاں نشانیاں کیا وندن۔

1. انسان کوں خواہ مخواہ کاوڑ لگݨ تے استدلال کولو کم نہ گھنݨ

2. ڈوجھیں کوں اپݨے مسائل دا ذمہ دار سمجھݨ تے جلدی مایوسی تھی ونجݨ۔

3. روز مرہ دے ضروری کم کار کولو کنی کر ونجݨ تے اج دا کم کل تیں چھوڑ ڈیوݨ۔

4. تخلیقی کم دو رجحان گھٹ ونجݨ تے ہر ویلھے ٹھڈے ساہ بھرݨ

5. خواہ مخواہ رووݨ پئے ونجݨ یا بالکل رووݨ بُھل ونجݨ

6. اپݨی ہستی یا کلھیپے اچ بند تھی ونجݨ تے سماجی میل جول کولو کنی کتراوݨ

7. ہر ویلھے کہیں اݨ جاݨے ڈر، بھاؤ اچ راہوݨ تے اپݨے آپ کوں کہیں کم دا نہ سمجھݨ۔

8. رشتے ، ناطے، سنگت ساتھ کوں نہ نبھاوݨ تے اپݨے آپ کوں لُڳا سمجھݨ۔

9. نندر دا گھٹ ونجݨ تے گھاٹی نندر کولو محروم تھی ونجݨ۔

10. پچھلے وقت کوں بار بار یاد کرݨ تے دل دی ڳالھ دل اچ رہ ونجݨ

11. روز مرہ دے کم کاریں اچ دلچسپی دا گھٹ ونجݨ تے ہر ویلھے رُسݨ دے بہانے منگݨ۔

اے تاں ڈیپریشن دا کجھ نشانیاں ہن جیرھیاں میں تہاڈے نال ونڈین۔ ڈیپریشن یا انگزائیٹی دے اثرات بہوں ہی بھیانک ہن او وی میں تہاڈے کٹھے سانجھ کرینداں۔

1. ساہ دا گُھٹیج گُھٹیج آوݨ۔

2. معدے دا اکثر خراب راہوݨ۔

3. کہیں ویلھے وزن اچانک گھٹ ونجݨ تے کہیں ویلھے ودھ ونجݨ

4. یاداشت دا کمزور تھی ونجݨ تے دماک کوں چکر آوݨ۔

5. کہیں وی گالھ یا اوبجیکٹ تیں زیادہ دیر فوکس نہ کر سڳݨ ۔

5. سر اچ شدید درد راہوݨ یا پورے جسم اچ ہلکی ہلکی اچنگ تھیوݨ۔

6. خون دا لیول یعنی ہومو گلوبن دا نارمل سطح کولو جھکا تھی ونجݨ تے چنڳی خوراک گھنݨ دے باوجود نارمل سطح تیں نہ آوݨ۔

7۔ ہاؤلیں ہاؤلیں بُکھ دا گھٹ ونجݨ تے منہ یا جبھ دا خُشک تھی ونجݨ۔

8. اکھیں اچ پیلاہٹ دا ودھ ونجݨ تے والیں دا تیزی نال ڈھاوݨ پائے ونجݨ۔

9. کہیں ویلھے قبض تے کہیں ویلھے موشن دا ول ول سامݨا کرݨ۔

10. جسم دے کُجھ حصیاں تیں خاص کر ہتھ تے پیریں تیں ہلکی پُھلکی ورم دا تھی ونجݨ۔

انہاں اثرات نال انسان دی زندگی بہوں آوکھی تھی ویندی ھے۔ زیادہ عرصہ ڈیپریشن دا شکار راہوݨ آلے لوک بالآخر شدید مایوسی دا شکار تھی کے اپݨی زندگی دے دشمن بݨ ویندن تے کوئی وڈا نقصان ڈیوݨ آلا قدم وی چا گھندن۔ ڈیپریشن ہیک قابل علاج بیماری ھے ، ایندا علاج اگرچہ تھوڑا جیہاں مہانگا تے لمبا ہوندے پر انسان ٹھیک تھی ویندے۔ اگر کوئی دوست ڈیپریشن دا شکار ہن تاں انہیں کوں اپݨے علاج اچ کوتاہی بالکل نئیں کرݨی چاہیدی نہ تاں ہیک وقت اینجھا آسی جیرھے ویلھے اے بیماری تہاکوں کہیں ون ویڑھی آلی کار ولھیٹ کے سُکا ڈیسی۔ اپݨا خیال رکھسو۔ شالا خوش وسو۔