خواجہ آصف کو رہا کر دیا گیا

مسلم لیگ نون کے رہنما اور سابق وفاقی وزیر خواجہ آصف کو رہا کر دیا گیا۔

جیل حکام خواجہ آصف کی رہائی کے احکامات لے کر اسپتال پہنچے۔

خواجہ آصف جناح اسپتال میں زیرِ علاج ہیں، جیل کا عملہ رہائی کی روبکار خواجہ آصف کو دے کر اسپتال سے روانہ ہو گیا۔

خواجہ آصف کے وکیل نجم الحسن کے مطابق ڈاکٹروں نے خواجہ آصف کو 2 دن تک آرام کا مشورہ دیا ہے، خواجہ آصف کے مثانے کا آپریشن ہوا ہے۔

سپرنٹنڈنٹ کوٹ لکھپت جیل کاشف رسول کے مطابق خواجہ آصف کی رہائی کے عدالتی احکامات پر عمل درآمد کر دیا گیا ہے۔

لاہور ہائی کورٹ کی جسٹس عالیہ نیلم اور جسٹس شہباز رضوی پر مشتمل بینچ نے گزشتہ روز خواجہ آصف کی منی لانڈرنگ اور آمدن سے زائد اثاثہ جات کیس میں ضمانت منظور کی تھی۔

لاہور ہائی کورٹ نے 1 کروڑ کے ضمانتی مچلکوں کے عوض خواجہ آصف کی ضمانت منظور کی تھی جس پر آج لاہور کی احتساب عدالت نے ان کی رہائی کا حکم جاری کیا تھا۔

About The Author

نمائندہ

See author's posts