ہمارے پھوپھا محمد عسکری مذاقاً کہا کرتے تھے کہ زیدی سید نہیں ہوتے۔
کچھ اور لوگ بھی مذاق میں یا سنجیدگی سے یہی کہتے ہیں۔ شاید اس کا جواز یہ دیتے ہیں کہ سید وہ ہوتا ہے جس کے نام کے ساتھ امام کے نام کا لاحقہ ہو۔
مثلاً جعفری چھٹے امام جعفر صادق کی اولاد ہیں۔ رضوی آٹھویں امام علی رضا کی اولاد ہیں۔
زیدی چوتھے امام زین العابدین کی اولاد ہیں۔ ان کے ایک بیٹے زید تھے جنھوں نے پتا نہیں امامت کا دعویٰ کیا تھا یا نہیں لیکن ان کے گرد بہت لوگ جمع ہوگئے تھے۔ پھر انھیں قتل کردیا گیا۔ زید شہید کا مزار عراق کے شہر ہلہ میں ہے۔
ان کے ماننے والوں نے الگ فرقہ زیدیہ بنالیا اور اس وجہ سے زیدی کہلانے لگے۔ ان کا اولاد زید سے کوئی تعلق نہیں۔ ان کی اکثریت یمن میں ہے اور حوثی وہی زیدی ہیں۔
زید شہید کی اولاد بھی زیدی کہلاتی ہے لیکن ان کی اکثریت اثناعشری شیعہ ہے۔ سنی زیدی بھی بہت ہیں۔ امام زین العابدین کی باقی اولاد عابدی کہلاتی ہے۔
ظاہر ہے کہ ہر امام کا ایک بیٹا امام بنتا تھا۔ باقی امام زادے کہلاتے تھے۔ ایران اور عراق میں بہت سے امام زادوں کے مقبرے ہیں۔
امام حسین کی اولاد امام زین العابدین سے چلی۔ لوگ محبت میں حسینی بن جاتے ہیں ورنہ امام حسین کے باقی دونوں بیٹے کربلا میں شہید ہوگئے تھے۔
ہمارے پھوپھا نقوی تھے۔ نقوی دسویں امام علی نقی کی اولاد ہیں۔
میرا ننھیال اور سسرال بھی نقوی ہے۔ زیدی سید نہ ہوتے تو بابا کو اور مجھے داماد کیوں بناتے؟ 🧐
خیر، اب سید لڑکے اور لڑکیاں خاندان سے باہر شادیاں کررہے ہیں اور نسلی تفاخر اگر کوئی تھا تو رفتہ رفتہ ختم ہورہا ہے۔
ایک دلچسپ بات میں نے نوٹ کی ہے کہ کچھ لوگ سیدوں کو برا بھلا کہتے ہیں، نسل پرستی کا غلط اطلاق کرتے ہیں اور عصبیت کے بہانے بھی رگڑا لگا دیتے ہیں۔ لیکن جیسے ہی کوئی اپنی پسند کا سید ملتا ہے تو سید صاحب سید صاحب کہتے منہ نہیں دکھتا۔
شیخ رشید پرویز مشرف کو سید مشرف کہہ کر خوش ہوتے تھے۔ جرنیل صاحب زیدی ہیں اور خاندانی شیعہ۔ والد کا انتقال ہوا تو ٹی وی کے لیے اہلسنت والے جنازے کی ویڈیو بنی اور شیعوں والے جنازے کے بعد تدفین ہوئی۔ یہ بات مجھے جنازے میں شریک ایک صاحب نے بتائی۔
جماعت اسلامی کے لوگ سید ابوالاعلیٰ مودودی اور سید منور حسن کو سید صاحب کہتے ہیں۔
البتہ مودودی صاحب کو سید ہونا اس وقت مہنگا پڑا جب انھوں نے خلافت اور ملوکیت لکھی۔ ان پر الزام لگایا گیا کہ انھوں نے بنو ہاشم سے تعلق کی وجہ سے بنو امیہ پر تنقید کی ہے۔
منور حسن اہلسنت اور اہل تشیع دونوں کے حساب سے سید تھے۔ ان کی اہلیہ عائشہ نقوی کا تعلق امروہے سے ہے۔
About The Author
اے وی پڑھو
کریمݨ نقلی۔۔۔||ملک عبداللہ عرفان
دیپک راگ، ثریا ملتانیکر اور لوح اعزاز کی کہانی||رانا محبوب اختر
خالی لفظاں دا میلہ||سعید اختر