مشرف کے برے کام۔۔۔||مبشرعلی زیدی

مشرف کے اچھے کام:

نائن الیون کے بعد عالمی برادری سے تعاون

دہ شت گردوں کو امریکا کے حوالے کرنا

فاٹا اور لال مسجد کے دہ شت گردوں کے خلاف کارروائی

کراچی کی ترقی کے لیے فنڈز کی فراہمی

معیشت کو دستاویزی بنانے کی مخلصانہ کوشش جسے ٹیکس چور تاجروں نے ناکام بنایا

پرائیویٹ نیوز چینلوں کے قیام کی اجازت، البتہ انھیں کنٹرول کرنے کی کوشش افسوس ناک تھی

آئی ایس آئی کے ایجنٹ افتخار محمد چودھری کی برطرفی

بھارت سے متعلق پالیسی میں تبدیلی اور آگرہ مذکرات، ان کی ناکامی کے ذمے دار بھارتی سیاست دان تھے۔

میں آئین کی پامالی کو مشرف کا سب سے بڑا گناہ سمجھتا ہوں۔ وہ بینظیر کا قاتل نہ سہی لیکن انھیں تحفظ فراہم نہ کرنے کا مجرم ضرور تھا۔ اکبر بگٹی کے قتل سے بھی بری نہیں کیا جاسکتا۔

ہمیں یہ بھی یاد رکھنا چاہیے کہ مشرف کے دور میں آئی ایس آئی اس کے قابو میں نہیں تھی بلکہ اس کے خلاف اندر اور باہر سرگرم تھی۔ اس پر قاتلانہ حملے کرائے اور وکلا تحریک کو منظم کیا۔ آج مشرف سے جن اقدامات پر نفرت کی جاتی ہے، ان میں سے کئی کا ذمے دار وہ نہیں، آئی ایس آئی کے لوگ تھے جن کے لیے غیر ریاستی عناصر کی اصطلاح استعمال کی جاتی رہی۔

مشرف کو جن جسٹس وقار سیٹھ نے سزا سنائی، ان کے بارے میں کسی نے بتایا کہ ان کی عدالت سے ڈیڑھ سو دہ شت گرد رہا ہوئے تھے۔ بعض تکلیف دہ حقائق نظر سے اوجھل ہوتے ہیں۔

میں ایک طرف ضیا الحق جیسے شاطر اور دوسری جانب باجوہ جیسے احمق کو دیکھتا ہوں تو مشرف کے بارے میں رائے بدلنے لگتی ہے، جو ذہین تھا، روشن خیال تھا، حسن پرست تھا، موسیقی سے دلچسپی رکھتا تھا، لگی لپٹی رکھے بغیر بات کرتا تھا۔ اس نے فوجی ہونے کے باوجود امریکا اور بھارت سے تعلقات میں سفارتی مہارت دکھائی اور غیرملکی مبصرین نے اسے اسٹیٹس مین کہا۔ ہاں، وہ اکھڑ تھا، آمر تھا، بہت سے دشمن بنائے اور بہت سے غلط فیصلے کیے، اقتدار کو طول دیا، حقیقی سیاست دانوں کا راستہ روکنے کی کوشش کی اور پریس پر پابندیاں لگائیں۔ کچھ مسائل اور روایات آرمی چیف کو ورثے میں ملتی ہیں۔

ہم صحافیوں کو مشرف سے شکایتیں تھیں اس لیے آج کا میڈیا اس کے دور کا غیر جانبداری سے جائزہ نہیں لے سکتا۔ یہ کام مستقبل کا مورخ کرے گا۔