ساڈا ڈُکھ ڈھیر وکھرا ھے۔|| ذلفی

بے وسی وی کوئی نا مراد کیفیت ھے۔ سٹرکچرل مٹیریلزم اچ ہیک خاص نوعیت دی بے حسی انسان کوں کتھائیں کولو کتھائیں چا مریندی ھے۔ آخر تھیندا اے ھے جو اساں کہیں سِدھائے ہوئے گھوڑے آلی کار سٹرکچرل مٹیریلزم دے اینٹی ہیومن رستیں تیں بھجݨ پائے ویندے ہیں تے ساڈی روح دا نیچر نال بہوں ڈونگھا جھیڑا متھیج ویندے تے ڈوہیں ہیک ڈوجھے نال ٻکیں آ ویندن۔

انسان شودے دی روح سٹرکچرلزم دی مار کھا کھا کی شدید گھائل تھی ویندی ھے تے ول کوئی چیز روح نال رَسدی نئیں ۔ اے فنومنا ہیک ڈونگھے کلھیپے دا سوب بݨدے تے اساں اپݨے آپ کولوں وی پروبھرے تھی ویندے ہیں۔ ول زندگی ، زندگی نئیں راہندی بلکہ ہیک اینجھی راند بݨ ویندی ھے جیندے اصول و ضوابط جدید مٹیریلزم دے مکینیکل رشتیں دے بھوگ طے کریندن۔ول اساکوں ایں گالھ دی سمجھ نئیں آندی جو ” روہی کیویں یار ملاوڑی ھے” تے ” محبت کیویں پیت دے پندھ نبھاوݨ دا ناں ھے” ۔

اساں ڈو جمع ڈو چار دے فارمولے اچ اپݨی اکشا دا وِناش کر کے ہیک اینجھے ہاتھی کوں مارݨ دا رِسک وی گھن گھندے ہیں جیرھا اپݨی مستی دے بعد شانت تے بے ضرر تھی چُکیا ہوندے۔

اے انسان دی زندگی دا حاصل وصول تے نئیں نہ ہی ایں کرہ ارض تیں اساں ایہو رول نبھاوݨ واسطے آئے ہاسے۔ ساکوں تاں مہینہ وسݨ دے بعد کچی مٹی دی خوشبو دا جیرھا سواد چاوݨا ہا او نسے چایندے بلکہ اساں چکݨ تھیوݨ دا گلہ گھن کے اپݨے آپ کوں ہر ویلھے کہیں نہ کہیں سر دردی اچ مبتلا رکھݨ دی عادت آو مجبور تھائے ودے ہوندے ہیں۔

اے بہوں ہی سنجیدہ رولا ھے زندگی دا جیندا ادراک ضروری ھے پر لوبھ دی تہذیب اچ پلدی ساڈی نسل ” مطلب تے معنی” دی درست سمت دا اندازہ لاوݨ جوگی ہی نئیں بچی تے ساڈے اطراف اچ زومبیز نما انسان وڈی تعداد اچ پھردے ٹُردے ڈسدن۔

کیپیٹلزم دی انگیجمنٹ دی حکمت عملی اچ ہیک گالھ بہوں نشابر ھے جو ہر کمپنی اپݨے اشتہار تے پروپیگنڈے دے ذریعے ساکوں اپݨی سمت اچ چھکیندی ھے دے تے ساکوں جتھاں انگیج تھیونا چاہیدا ہا اوندی بجائے ساڈا وقت ہر ویلھے ڈائیوی ایٹ تھیوݨ دی مقابلہ بازی اچ بربات تھی ویندے۔اے بھا لگا ایہو جیہاں گھن چکر ھے جیرھا ساکوں کھا ویندے ۔ ہݨ اساں چاہووں وی تاں پرو ہیومن، پرو نیچر تے اپݨی آتما نال زندہ راہوݨ دی حکمت عملی تے جی نسے سگدے۔ اے بہوں ہی عجیب تے رُکھا رُکھکھ پندھ ھے حیاتی دا جیرھا اساں سارے کٹیندے پائے ہیں، اُتوں ظُلم اے ھے جو ساڈی ریاست دا دماغ اینٹی تل وطنی تے اینٹی پیپل ھے جیندی وجہ کولو ساڈا ڈکھ باقی دنیا کولو ڈھیر وکھرا ھے۔۔!