ملک کے مسائل کا سبب عوام کی سیاست سے لاتعلقی||مبشرعلی زیدی

کسی بھی ملک کے مسائل کا سبب عوام کی سیاست سے لاتعلقی ہوتی ہے۔

پاکستان میں مسائل کی وجہ عوام کی سیاست میں ضرورت سے زیادہ دلچسپی ہے۔

یہ دلچسپی اتنی بڑھ چکی ہے کہ سیاست انٹرٹینمنٹ بن گئی ہے۔ الیکٹرونک نیوز میڈیا اس کے سوا کچھ اور دکھاکر ریٹنگ نہیں لے پاتا۔ سوشل میڈیا پر سیاست سے بڑا کوئی موضوع نہیں ہوتا۔

نتیجہ؟ سیاست دان کام کرنے کے بجائے میڈیا کے سامنے رہتے ہیں۔ ججوں کو میڈیا سے دور رہنا چاہیے۔ ہمارے جج ٹاک شوز دیکھتے ہیں اور عدالت میں ان کا ذکر کرتے ہیں۔ سیاست کی سب سے بڑی کھلاڑی فوج ہے۔ اس کا آرمی چیف احمق لوگوں کے وی لاگ دیکھتا ہے اور صحافیوں کو بتاتا ہے۔

اس خچر خانے سے کسی بہتری کی کوئی امید رکھنے والے کو دماغ کا علاج کروانا چاہیے۔

شاید مشرف نے کہا تھا کہ سیاسی عدم استحکام کی وجہ میڈیا ہے۔ اس کے دور میں ایسا نہیں تھا۔ لیکن اب ہے۔ سیاست سے توجہ کم کرنے کے ضرورت ہے۔

میڈیا منہ دوسری طرف کرے تو سیاست دان سنجیدہ ہوکر معیشت بہتر کرنے کی کوشش کریں۔ پاکستان کا خزانہ خالی ہے۔ بلوم برگ معاشی معاملات پر نگاہ رکھنے والا اہم ترین میڈیا گروپ ہے۔ اس کے مطابق پاکستان کو اگلے 12 ماہ میں 41 ارب ڈاکر قرض واپس کرنا ہے۔ پاکستان کا کل بجٹ ساڑھے 9 ہزار ارب روپے ہے۔ امریکی ڈالر کو 225 روپے رکھ کر حساب لگائیں تو 42 ارب ڈالر بنتے ہیں۔ واضح رہے کہ یہ بجٹ کا تخمینہ ہے۔ یہ رقم ہمارے پاس ہے نہیں۔ ٹیکس جمع ہوں گے، برآمدات ہوں گی، سمندر پار سے ترسیلات آئیں گی اور نئے قرضے ملیں گے تو بجٹ پورا ہوگا۔

نئے قرضے کی امیدیں سن لیں۔ آئی ایم ایف شرطیں بڑھائے جارہا ہے اور ٹرخائے جارہا ہے۔ پاکستان دیوالیہ ہوا تو کوئی قرضہ نہیں ملے گا۔ فی الوقت آئی ایم ایف نے سعودی عرب سے پوچھا ہے کہ تم پاکستان کو قرضہ دو گے؟ تم چار ارب دو گے تو ہم بھی ڈیڑھ ارب دے دیں گے۔

سعودی عرب نے پیغام دیا ہے کہ عمران خان کی واپسی کا امکان ہوا تو ہم پاکستان کی مدد نہیں کریں گے۔

کیا سمجھے؟ نئے قرضے سیاسی استحکام سے مشروط ہیں۔ پاگل خان اچھلتا رہا اور میڈیا اس کا ناچ دکھاتا رہا تو سیاسی استحکام ممکن نہیں۔

یوں سمجھیں کہ آپ کی کشتی میں سوراخ ہوگیا ہے اور جنھیں پانی نکالنا ہے، وہ دھینگا مشتی میں مصروف ہیں۔

محرم شروع ہونے والا ہے۔ آئیں ماتم کی پریکٹس کرلیں۔