اگر آپ سچ نہیں بول سکتے تو کم از کم سن ہی لیا کریں||مبشرعلی زیدی

دیکھیں یار، ابھی میں زندہ ہوں، پھر بھی لوگ پتا نہیں کیا کیا کہتے رہتے ہیں۔ کوئی لفافہ صحافی کہتا ہے، کوئی غدار، کوئی کافر۔ متعصب سنی یہ کہہ کر دل خوش کرتے ہیں کہ میں شیعہ ملحد ہوں۔ شیعوں کو میری عقلیت پسندی والی باتیں پسند نہیں آتیں۔ ملحدین اس بات پر خفا ہوتے ہیں کہ میں محرم میں حسین حسین کیوں کرتا ہوں، اور اس لیے جعلی فری تھنکر ہوں۔ کوئی مکمل یقین ظاہر کرتا ہے کہ میں ملک سے فرار ہوا۔ کسی کا خیال ہے کہ میں نے امریکا میں اسائلم لیا ہے۔ بعض لوگ سمجھتے ہیں کہ میں کسی کے اشارے پر الٹا سیدھا لکھتا ہوں۔ کچھ لوگوں کو ملحد یا شیعہ کہنے سے سکون نہیں ملتا تو قادیانی قرار دے دیتے ہیں۔ پاگل خان پر تنقید کرنے کی وجہ سے پٹواری کا خطاب بھی ملا ہے۔

یہ لوگ میرے مرنے کے بعد کیا کیا کہیں گے، مجھے اچھی طرح اندازہ ہے۔ میں اسی لیے زیادہ دیر تک جینا چاہتا ہوں۔ زندہ رہ کر سینے پر مونگ دلنے میں جو مزہ ہے، وہ خاموشی سے مرجانے میں کہاں۔

عشروں پہلے لکھنا شروع کیا تھا۔ صحافت کے پہلے دن بات سمجھ میں آگئی تھی کہ سچ بولنا اور لکھنا ہے تو غصہ اور ناراضی سہنا پڑے گی۔ میرے قریبی رشتے دار مجھ سے خوش نہیں۔ کئی قریبی دوستوں کو شکایات ہیں۔ جن اداروں میں کام کرچکا ہوں، ان کے بہت سے سابق ساتھی خفا ہیں۔

بے لاگ سچ کی ایک قیمت ہوتی ہے جو سننے والا بھی بھگتتا ہے اور کہنے والا بھی ادا کرتا ہے۔

سچ اور جھوٹ کے درمیان ایک برزخ بھی ہے جس کا نام یاروں نے مصلحت رکھا ہے۔ اکثر لوگ مصلحت اور جھوٹ کے خانوں میں اشٹاپو کھیلتے رہتے ہیں۔

میری تربیت شیعہ خاندان میں ہوئی ہے۔ یہاں ہوش سنبھالتے ہی پہلا نعرہ یاحسین سننے کو ملتا ہے۔ یاحسین کا دوسرا مطلب ہے، لعنت بر یزید۔ زندگی بھر کا سبق ملتا ہے کہ اچھے کو اچھا کہنا کافی نہیں، برے کو برا بھی کہنا ہے۔ بیشتر شیعہ مجلس اور جلوس میں یزیدیت مردہ باد کہہ کر مطمئن ہوجاتے ہیں۔ میں حسینیت زندہ باد کی طرح یزیدیت مردہ باد بھی ساتھ لے کر پھرتا ہوں۔

میں نہیں مانتا کہ کوئی شخص مر گیا تو صرف اس کی اچھائی بیان کرنی ہے اور اس کی غلطیوں، خامیوں اور برائیوں کو بیان نہیں کرنا۔ کیوں نہیں؟ کسی سے مرنے سے سچ نہیں مر جاتا۔ سچ بولنا چاہیے تاکہ برے آدمی کی پیروی کرنے والے برے کاموں سے باز آئیں۔

پہلے ڈکٹیٹر کو سزا مل جاتی تو دوسرا تیسرا مارشل لا نہ آتا۔ جھوٹا الزام لگانے والے پہلے آدمی کو سزا دی جاتی تو جھوٹے الزام لگانے والے پہلے سو بار سوچتے۔ مذہب اور حب الوطنی کا جھوٹا چورن بیچنے والے پہلے شخص کی گردن ناپ لی جاتی تو یہ سودا مزید بکنے سے رک جاتا۔

کمزور دل لوگ کہتے ہیں، مرنے والے کی برائی نہ کرو۔ اچھا! ابولہب بھی مرچکا ہے، قرآن کی سورت پڑھنا چھوڑ دیں۔ منافق عبداللہ ابن ابی کے مرنے پر رسول نے مغفرت کی دعا کی بلکہ اپنی چادر بھی جنازے پر ڈالی۔ خدا نے رسول کی دعا قبول نہیں کی۔ آیت آئی کہ آپ ستر بار بھی دعا کریں گے تو قبول نہیں ہوگی۔

اہلسنت عبداللہ ابن ابی کے لیے دعا کریں۔ نہیں تو غلام احمد قادیانی ہی کے لیے کرلیں۔ اہل تشیع یزید کے لیے دعا کریں۔ نہیں تو اعظم طارق ہی کے لیے کرلیں۔ جیالے ضیا الحق کے لیے دعا کریں۔ نہیں تو مولوی مشتاق ہی کے لیے کرلیں۔ اس کے بعد مجھے عامر لیاقت یا کسی بھی مرنے والے کے لیے دعا کرنے کو کہیں۔

اگر آپ سچ نہیں بول سکتے تو کم از کم سن ہی لیا کریں۔سن نہیں سکتے تو کان بند کرلیا کریں۔ اگر یہ بھی ممکن نہیں تو بے شک مجھے برا بھلا کہہ لیں۔ الفاظ کم پڑجائیں تو اس تحریر کے پہلے پیراگراف سے لے لیں۔