سینے جھوکاں دیدیں دیرے(37)||نذیر لغاری

ڈھیرےدیرنال اکھ کھلی تیارتھی تے وت لاشاری صیب دے گھر گیم اتھاں ٻیٹھے ہاسے تاں ساڈے سنگتی بیرسٹر تاج لنگاہ دا فون آیا حال حوال حیر خبر ۔۔۔۔۔ول میل دا سنجوک کوئی حیلہ بہانہ چلو سائیں مل ٻہسوں ڳزری وہاݨی دا حال سݨیسوں کوڑکٹیسوں تاج خاں نال گالھ کرتے ہاں وئلا تھیا ۔ اجھو ملاقات تھیسی وسیب دا حال پچھسوں یاریں دیاں خبراں ملسن ۔

شام کوں لاشاری صیب دی کونسل اچ میٹنگ تھیوݨی ہے اساں الیسٹ ہیم کنوں ڳاڈی اچ ٻہہ تے کنزنگٹن کنوں لہندے اتھاں ٹاون ہال آگیوں ساڈے اتھ پڄݨ نال میٹنگ شروع تھی ڳئی میٹنگ اچ لاشاری صیب

دے علاوہ ٹونی بلئیر حکومت دا مشیر کیتھ بینٹ کیل فیل وارڈ کنوں رائل بارو آف کنزنگٹن اینڈ چیلسی دا کونسلر کیتھ کنسنگھم ساڈایار کیتھ کنسنگھم ہݨ لندن اچ جج ہے پرسال اباسائیں فوت تھیا ہا تاں کیتھ کراچی وچ میڈے گھر مکاݨ سانگے آیا ہا کونسل دا تعلیم تے نینگر یں دے معاملات دا ڈائریکٹرمسزایان کمفرٹ برطانیہ دے بہوں وڈے اخبار فنانشل ٹائم دی کنٹنٹ ایڈیٹر ساندرا اسٹرلی [ساندرا وی کراچی اچ گھر آتے ابے سائیں دا ارمان کیتاہس ]اتےلیبرپارٹی دی لیڈر این نالوبوا اجلاس اچ شریک تھئن سارئیں ہک صلاح تھی تے میکوں ابزرورمن گھدا میٹنگ اچ مشتاق لاشاری دی وستی اچ کم کرݨ سانگے این جی او دا ایرابدھݨا ہا

این جی او دا پرچار تھیوے تاں میں بیلا پنے وینداں این جی اوز ۔اینجھے رسیئے ٻالیں رہاوݨ کنوں ڈھیر ٹھڳالݨ دا سعیو ہن جنھیں دے سیاݨے ہوون کنیں کہیں کوں بھئو تھیندا ہووے ساڈے ملک اچ این جی اوز گا گہاڈتے جیرھا ڳبھروسرمایہ داری تے سامراج سانگے خطرہ ہے اوندے گل اچ طوق تے پیریں اچ نئل پاتے این جی اوزدے کلے تے ٻد ھ سٹواتے اوندے آسوں پاسوں دھن چاوتھیرو آپوآپ لوث لباس داہیلک تھیسی ملٹی نیشنل کمپنئں دے خیراتی فنڈ کنوں فقیر یں کوں آنہ ڈو آنے ڈیو آپے دھاڑ پٹ بند کرتے پیسے ٹکے دی ونڈ یلھاتے پئے بھڑسن ۔پاکستان وچ ہک اینجھی این جی او وی ھے جیرھی انسانی حقوق دے ناتے انسانیں دے حق وچیندی ہے ایں دھندے وچوں کھٹ کماتے آپ وی کھمدی ہے اتے اپݨے چھوہریں چھٹکریں داڈڈھ وی بھریندی ہے سݨئے سے ایں این جی او کوں جرمنی دے صرف ہک سخی ان داتا ہک ارب روپیہ ڈتے اے ہک ارب تاں کائی شئے کائنی ایں این جی او کوں ان گیݨویں سنڄئیں کنوں دھن دان تھیندے اتے ایندے کشکول اچ اربیں دی خیرات سٹی گئی ہے پرکشتہ نہیں بھریندا لٹ آلے سال لٹ پئی تاں کراڑلڈڳئے ہن پر کوٹ طاہردے ریجھوکراڑ آکھیاہا میڈے نہ ٻال نہ ٻچی نہ گھر نہ در نہ اگوں نہ پچھوں میں کیندے سانگے وطن چھوڑتے پردیس ونڄݨ دا جوا کھیڈاں ریجھو کراڑپن تے کھانداہا نکے ٻال دے رووݨ دی آوازکڈھ تے خیریت منگݨ اوندے پنݨ دا ڈھنگ ہا اوکشتہ اڈتے پنداہا کشتہ بھریج ونجے ہا تاں اونکوں ڳودڑی اچ سٹ تے پچھوتے ٹرپونداہا اج دی روزی تھی گئی صباحیں ڈینہہ تھیسی تاں وت نویں سروں پنسوں ریجھو کراڑدا کشتہ بھریجے ہا تاں ڈڈھ وی بھریج وینداہا این جی اوز دا نہ کشتہ بھریندے نہ ڈڈھ رڄدے لاشاری صیب ہمیش اپݨے کھیسے کوں کس لاتے لوکیں دی خدمت کریندے پنݨ منگݨ تے کشکول اڈتے خریت منگݨ اونکوں ڈانئیں آندا آپݨی وستی اچ ٻالیں سانگے اسکول تے ہاسٹل بݨوائس پیروننگے کنڈ اگھاڑے لنگھڑ پیٹ ٻالیں سانگے جکھدے کھپدے اج اتھاں این جی اوبݨدی پئی ہے جھوک ملیاں اچ کم کرن سانگے گالھ مہاڑ تھیندی پئی ہے میکوں ڈو گالھیں صفاڈسدیاں پئن ہک تاں اے جو جھوک ملیاں اچ انقلاب آوسی لوکیں دی حیاتی بدل ویسی ڈکھ ڳھٹ وسن سکھ آویسن یاول اے این جی او رہسی وی کائنا لاشاری صیب لٹ مارکرݨ یاول کھیسا بھرݨ سانگے این جی او نئیں پیا بݨیندا جے این جی او بݨ ڳئی جے اوں کنے ٹکا پیسہ آگیاتاں کم وی تھیسی این جی او دا ناں کیا ہووے ؟کیتھ بینٹ تے کیتھ کننگھم ناں سوچݨ پئےگئے کہیں ناں تے صلاح نئیں پئی بݨدی لاشاری صیب دے انگریزدوستیں کوں جھوک دا وپراہےساڈیاں جھوکاں بس چھڑاناں دیاں جھوکاں ہن ہر جھوک تباہ ۔ویران ہنبھا۔ایویں لگدے پھیرادیہہ ماریئے جے جھوکاں ایویں ہوندین تاں برپٹ کیا ہوندے؟جاگیرداریں ساڈی پٹھی کھل لہا گھدی ہے ساڈے لوکیں دے ٻال دوا داروں دے ہوٹے مرویندن جاگیر داریں دے کتے مکھݨ کھاندن جے مصطفے کھر تے ممتاز بھٹوسوریں دے شکارتے ونڄن تاں سٹھ کتے نال گھن ٹردن فاروق لغاری ساڈھے ترئے سال صدر رہ گیا جے لوک ملݨ سانگے آون ہاتاں خان دی نندرونجیندی ہئی ۔جے شکار کرݨا ہووے ہا تاں نہ ڈیکھے ہارات نہ ڈینہہ وسیب دا کیڑھا ضلع ہے جتھاں ساڈے تہجدگزار خان گولی نہیں چلائی بے ایمان کوں آکھیں اوکھے ہیں میں تھیم ابز رور جے ووٹ نمھی ڈے سگدا صلاح تاں ڈے سگداں میڈاخیال ہے این جی او دا ناں جھوک چار کھو کیتھ بینٹ پچھیا جوک کیا شئے ہوندی ہے کت کوں جھوک اہدن لاشاری صیب آکھیا جو جھوک دا مطلب ہے وسوں ولیج ۔۔۔۔سارے راضی تھی گئے ناں دا مسئلہ حل تھی گیا این جی اودا ناں رکھیج گیا جھوک ایڈپروجیکٹ ’جھوک بݨ ڳئی ہے تاں ایندے مہاندرے وی چݨ ڳھنو مکھی کون ہوسی اگواݨ کیڑھا بݨسی پگ کیندے سر ٻدھیسی چلو سائیں طے تھی گیا کیتھ کننگھم چیرمین ہوسی مشتاق لاشاری سیکرٹری اتے ساندرا اسٹرلی خازن ہوسی میں سمیت میٹنگ اچ بیٹھے سارے لوکیں کوں مہری ممبرمن گھدا گیا متھ اے بݨی جو ھیں سال سارے مہری ممبر جھوک ملیاں دا دورہ کریسن کیتھ بنیٹ کوں آکھیا گیا جورجسٹریشن سانگے پنے پتر ے اوتیار کرے ٹاون ہال کنوں ٻاہر نکل آیوں ول اے طے کیتوسے جو پیریں پندھ کریندے کنزنگٹن اولمپیادی ہیمرتھ اسٹریٹ تے ڄلوں اتھاں ہک ایرانی ہوٹل ہے رائل تہران ریسٹورنٹ اتھاں ڄل تے ٹکرکھاووں ’’’’ریسٹورنٹ اچ ایرانی چھوکریاں کالی پینٹ تے چٹی شرٹ پاتے بیرا گیری کریندیاں کھڑیاں ہن اتھاں لندن دیاں پولیس آلیاں وی ایہو ویس پیندین ۔پراے پولیس آلیاں نہ ہن ایرانی مائیاں ہن جنھیں حافظ دئیں غزلیں تے خیام دئیں رباعئیں نال ساڈی داری کرݨی ہئی ولدے سال فریدی صیب نال ایران گیاں تاں ہروں بھروں اوہے چھوہریں ودا گولینداہم جنھیں لندن دے رائل تہران ریسٹورنٹ اچ ٹکر کھوایا ہا ۔لندن آلیاں چھورھیں اتھاں کیویں آسگدیاں ہن جنھیں دے پیرپٹیج ویندن او دھرتی سانگے سکدے رہ ویندن پر انہاں دے چودھاروں ڈھیرساریاں چیزاں کھنڈریاں پیاں ہوندیں ’۱۷ سال پہلے گلبہار بانو دی کیسٹ سݨی ہاسے ۔۔کڈ اں ولسوسوہݨا سانول ہا وطن ساڈے غریباں دے اڄ گلبہار بانو آپ کراچی آلی تھی ڳئی ہے توڑیں جو خانقاہ شریف آلے سائیں ہوریں دے محل جیڈا محل بݨوائس وت وی اوندے آسوں پاسوں ڈھیرساریاں شہیں کھنڈریاں پئن ایرانی چھوئیں دے وال انگریزیں وانگوں سونے رنگےتاں نہ ہن پر انھیں کوں سنہری آکھ سگدوہک چھوکری کھلدی کھلدی ساڈی میزدوآئی اتے کݨک دیاں روٹیاں نال چاتی آئی روٹی نال پھودنہ دھاݨے دربھ وصل وی چاتی آئی اساں ہک گرانہہ بھن تے اوندے اتے دھاݨے رکھئے وصل دی بھوک ہتھ اچ پاتے گرانہہ کوں چک ماریوسے اتے ول بھوک کوں ڈندڈکھالیونسے وت وستی یاد آگئی جواردی روٹی وصل دا گنڈھاچاتے سکول ویندےہاسے نہ ہاسے ڈاہڈھے خوش ہاسے ایں ہاسے مارمکائیاں ’أڄڑی گئی ہاں ول اسٹارٹر آگیا ٹکر کھاوݨ کنوں پہلے بکھ چمکاوݨ سانگے اسٹارٹر نال ڈوہتھ کرݨے پوندن اساں بکھ مارݨ سانگے مٹریں کوں ہتھ مریندے ہاسے کݨک دے سٹے پٹ تلی تے مل تے آبھوں کھاندے ہاسے وت وی بکھ مردی ہئی تاں ما داسرونڄ کھاندے ہاسے چھیکڑ اچ چلوکباب آگیا۔ابلئے چاولیں دی ادھواݨ اچ ہک ککڑدی ٻوٹی لاتھی ہوندی ہے گھنوشروع کرو سک نال ڈنر کیتوسے وات چلدا رہ گئے تے بات وی چلدی رہ گئی ساندرا پچھیا توں ایں کنوں پہلے لندن کیوں نہ آیوں ولدی ڈتم جوایں کنوں پہلے آنہ سگدا ہم ساڈے نال ایویں تھیندا آئے جوڈندہوندن تاں چݨے نیں ہوندے چݨے ہوندن تاں ڈندنہیں ہوندے ساڈے پاسے ٹکر کھاوݨ سیلاں کرݨ عیش کرݨ سیکھ پاوݨ اتے من آئی ہر گالھ کوں پورا کرݨ چھڑا اتلے طبقے دا حق ہے وزبر اصلوں وزبر ہن انھیں دے پیر بھوئیں تے نئیں پوندے ھیݨے ڈھیر ھیݨے ہن انھیں دے پیرچوودے نئیں ’’’جے چوپوون تاں پچھیں ایہوسوال تھیندے جیڑھا توں ٻیٹھی پچھدی ہیں جو لندن پہلے کیوں نہ آیاہاویں