سینے جھوکاں دیدیں دیرے(31)||نذیر لغاری

اساں جیرھی چنڈ کنوں ہائیڈ پارک اچ پیٹھے ہاسے اوندے نال ولنگٹن میوزیم ہے پر اساں میوزیم کائنی ونڄݨا بکھ ٻے حال تے تریہہ بیشم کیتی ودی ہے ایں علاقے تہاکوں ہر گلی دی چنڈ تے کے ایف سی مکڈانلڈ تے پزہ ہٹ نظرسن میکڈانڈ اچ پہہ گیوں اتے ڈوبرگر منگوائنسے برگر کھاوݨ دے بعد پیپسی دی ہکا لیٹر پیک بوتل اساں ڈونھائیں کوں کافی تھی پئی ہاں جھل تھی ونجے تاں بندہ نوں پنئوں تھی ویندے اساں وی کورے پنج تھی گیوسے جہانزیب تھیلا کچھ اچ پاتے اگوں اتے میں امام صیب دے پچھوں استاد ہݨ کیڈے جہانزیب آکھیؔے جو شاہی محل ڈیکھسوں بکنگھم پیلس ۔۔۔انویہویں صدی کنوں اے جاہ بادشاہ یا راݨی دا سرکاری ٹکاݨا ہے اے جاہ ہائیڈ پارک کنوں ڈھیر پریں کائنی ولنگٹن میوزیم دے نال ولنگٹن آرچ ہے اتھوں کانسٹی ٹیوشن ہل ناں دا راہ نکلدے جیندے کھبے پاسوں ڳرین پارک تے سجے پاسوں بکنگھم پیلس دی کندھ ہے کندھ دے اتوں لوہے دے کنڈئیں دا لوڑھا ڈتا کھڑے محل دے چودھاروں کندھ ہے ایں محل دا نقشہ ۱۸۲۳ اچ جان ناش بنایا اتے ۱۸۳۷ اچ ایں جاہ کوں شاہی محل بݨاڈتا گیا شاہی محل بݨݨ دے بعد بکنگھم پیلس ساری دنیا دا سبھ توں وڈا سیاسی مرکز بݨ ڳیا ہندوستان سودھی ادھ کنوں وی ڈھیر دنیاتے ملکہ وکٹوریہ دارا ڄ تھی گیا اتھوں فرمان جاری تھیوݨ پئے گئے اتھوں ٻاہر نکل تے گھوڑے تے لانگھ ولاوݨ والے سرکاری ہر کار بھوئیں دی ہک چنڈ کنوں ٻی چنڈ تائیں بھڄݨ پئے گئے سنڈیمن وی اتھاوں گیا تے چارلس نپئیر وی منرو وی اتھاوں ڳیا ہاتے رچرڈبرٹن وی ۔۔۔سنڈ یمن دیرے دا لاٹ صیب بݨ تے آیا تاں ساڈے جمال خاں لغاری تے امام بخشں خاں مزاری دریشک گورچاݨی لݨد بزدار کھوسے قیصرانی سرداریں کوں نال رلاتے لاٹ صیب دے گھوڑے دیاں واڳاں جھلی ودے ہن رائے بہادر ہتورام چھمک ہتھ اچ پاتے سرداریں کوں ہکوجیہاں ودا جھنبھیندا ہا جے کوئی خان ترہڑتھیووے ہاتاں لکڑدرنج ونج تھیندی ہئی خان سردار تمن دار آپݨے نال راڄ وی سلھاڑی ودے ہن کئی ڈینہہ پندھ کریندے قلات ونج پنے ہن اتے خانیں دے خان دے مونڈھے تے ونج ہتھ رکھیا ہانے خان آف قلات کوں آکھیونے جو اساں پٹکیاں لہاتے لاٹ صیب کوں سنبھال ڈتین اتے ہݨ توں وی اساں ونگر گوڈے سٹ تے ڈھہہ پئو ۔۔بکنگھم پیلس کھلدا کھڑاہا پچادھی چنڈ کنوں محل دے اگواڑ اچ آگیوں لوہے دئیں سیخیں اتے مرکزی دروازے دے پروں محل کوں ڈیکھݨ کوئی ڈھیراوکھا کم کائنی اندر پہن آلے وڈے در دےسڄے کٻھے پاسوں کیبن بݨیے کھڑن انھیں کیبنیں دے اگوں گارڈکھڑن کالی پینٹ رتی شرٹ شرٹ نہ کوٹ کوٹ نہ شیروانی شیر وانی نہ کوئی ٻی شئے ٻی شئے دا ناں بھالاو ناں اچ کیا لاتھے سرتے وڈے والیں آلی ٹوپی پہلی نظر مارو بھانویں وچویں یاول چھیکڑی اے گارڈ اصلوں نہیں لگدے اے بوتے لگدن نہ ٹردن نہ چلدن نہ جنگھاں لڈدین نہ ہتھ اجھووکٹوریہ باہر نکل تے کنز نگٹن پیلس ٹرپوسی جتھاں ڄائی ہئی یاول ویسٹ منسٹرایبے دومنہہ کریسی جتھاں پرنی ہئی اتے شاہی سنبھالی ہس پرنی تاں اتھاں ڈیانا وی ہئی پراوندی شادی توڑنہ پجی وکٹوریہ ۲۴ مئی ۱۸۱۹ اچ جئی ہئی اوتر یجھے جارج دے چوتھے پتر دی کلھی دھی ہئی اجاں ڄائیں اٹھ مہینے تھئے ہانس جو پیومرگیس پیواوندا ڈیوک آف کینٹ سڈ وینداہا ۱۸۳۷اچ چوتھا ولیم چاچا مولیس تے شاہی تے آن ٻیٹھی ۱۸۴۰ اچ سوتر نال لانواں لدھیونس ترئے سال پچھوں ۱۸۴۳ اچ چارلس نپئیر کوں سندھ پٹھیس جو میانی دے میدان اچ ہوشونال ونج بھڑ شیر محمد ٹالپر دا سالا رہوشوشیدی ڈولئیں تے ہتھ مارتے اہداکھڑاہا مرسوں مرسوں سندھ نہ ڈیسوں ہوشومرگیا پر نیازی نہ بݨیا جیڑھا ہک ڈینہہ پہلے اہدا کھڑا ہا جو پہلے میڈی لاش توں ٹینک ٹپسی ول ڈھاکہ فتح تھیسی اگلے ڈینہہ نیازی ٹینک کوں سلیوٹ کھڑامرینداہا بچ تاں ساڈے خان وی گئے ہن نک نہ ناساں جڑ آدھی اچ ٻہساں ۲۸۵۶تائیں سنڈیمن دیرے تے لانگھ ولاگھدی تاں وت اگلے سال دلی دے لال قلعے تے یونین جیک لڈدا کھڑاہا اتے تاجدار ہند بہادر شاہ ظفر رنگون وچ ترٹے واݨ دی بھنی کھٹ تے لاتھاہا ڳلور لہنا بادشاہ منجھلی ٻدھ تے چٹے سرکوں وی کھنیدا ٻیٹْھاہا تے حقہ وی پیندا ٻیٹھاہا انگریزاہدن وکٹوریہ شاہی کیتی ہے حکم نسی چلایا شئت ایں ڳالھ دی مغلیں کوں سمجھ نہ آئی ملکہ پنج دھیریں تے چار پترڄݨ تے پئے کوں اگلے جہان ٹورچھوڑیا تے آپ برقعہ پاتے بھورے اچ ونج ٻیٹھی پچھوں سررابرٹ پیل ولیم گلیڈاسٹون تے بنجمن ڈیزرامئلی ملکہ دی جاہ ملی رہ گئے پئے دے برقعہ ٹاوݨ تے وکٹوریہ آپ پاٻیٹھی پر شاہی دا کم اوئیں داوئیں تھیندارہ گیا ۱۸۴۷اچ کمیونسٹ مینی فسٹوچھپ تے آیا تے اگلے سال برطانیہ اچ قانون بݨ ڳیا جو روٹی دا مل نہیں ودھ سگدا ہتھوں ڳھٹیج گیا ۱۸۵۷ اچ بہادر شاہ ظفر کوں چاتے برما پچایونے تے ولدے سال ملکہ اعلان کیتا جو ہݨ ہندوستان تے ایسٹ انڈیا کمپنی راڄ نہ کریسی ہݨ اے ملک تاج برطانیہ دا حصہ سڈویسی ۱۸۷۵ اچ برطانیہ نہر سویزدا کنٹرول سنبھال گھدا ۱۹۰۱ اچ ملکہ ملک الموت دے آوݨ توں پہلے اسٹریلیا کوں دولت مشتر کہ دا حصہ بݨایا ھوں سال آپ وی مر گئی اتے نبھاگی ساڈے فریدݨ سائیں کوں وی نال گھن گئی بکنڳھم پیلس دے در تے سدھ نئیں جو کیا کیا کھڑا سوچینداں کہیں ویلھے ملتان اچ وݨیں تے لڑکیاں لاشاں ڈہداں کہیں ویلھے احمد خاں کھرل کوں ہوانال گالھیں کریندا ڈہداں کڈاہاں اے ڈہداں جو سدھا ساواتے اندرتائیں کھرا فرید نواب کوں پیا آہدے جو پٹ انگریزی تھانے نواب ہݨ فرید کوں کیا ڈسے ہا جو او ملکہ وکٹوریہ دے کمداریں دے ہتھیں اچ ہتھ ڈے تے بیعت کیتی کھڑے پیلس دے اگوں بت بݨیے گارڈنہ کہیں کوں سلیوٹ مریندن نہ کھلدن نہ مر کدن نہ اکھیں بھرکیندن نہ سرلڈیندن کیا پندن کیا پتہ ساوی ہنے یا کائنا محل دی ہیٹھلی منزل دے اتوں ڈو منزلاں بݨیا لگدین جنھیں دیاں اتوں تلوں ۴۰ تاکیاں بݨیا ں کھڑین محل دے باہروں میدان اچ ملکہ وکٹوریہ دی یادگاد بݨی کھڑی ہے یاد گار دے اتوں ایویں لگدے جو سونے رنگا ہک بوتا کھنبھ کھنڈیر تے ہوا اچ اڈردے یادگاردئیں چار چنڈ یں اچ چارکالے بوتے ہن جیڑھے کالے شینھیں کوں جھلی کھڑن شینھیں دے ہیٹھوں پاݨی دے تلابیݨے پئن یادگار دو منہ کرتے دید بھالوں تاں پہلے پہلے تاں یادگاردی ٹوسی دے ہیٹھوں وکٹوریہ دا مجسمہ نظرسی ول محل تے دید پوسی ۔۔ول آکھیئے جو اندروں ونج تے ملکہ کوں نونہہ دی مسکاݨ ڈیواں پر اے ملکہ وکٹوریہ نہیں الزبتھ ہے جیرھی نونہہ دے سݨہپ تے مشہوری کنوں ٹھردی نہ ہئی سڑدی ہئی او ڈیا ناوی مکاݨ کیا جھلیسی بکنڳھم پیلس وی ڈیکھ ڳھدوسے ولدے سال فریدی صیب تے برکت بھائی نال رل تے اتھاں ڈھیر پھیرے ماریئے ہم ولد ے سال تاں جڈاں برکت بھائی نال آیاہم اوں ڈینہہ بکنگھم پیلس دے اگوں وڈارش ہا ہک پاسوں انگریز نواب ڈیوک لارڈ شہزاد ے شاہی خاندان دے مردتے زالیں پئے نظردے ہن اتے ٻے پاسوں عام مخلوق تے سیلانی پچھیوسے کا کا کیہاں لڑھ لاٻا ہے پتہ لگا جواڄ ملکہ دی اماں سیݨ دی سال گنڈھ ہے واہ وے اماں واہ خیر پئی ہووی پوری ہک صدی ہنڈھائی کھڑی ہے وت وی نویں نکور ہے ساڈیاں کئی نانیاں ڈاڈیاں مربھر گیاں پر ملکہ دی ماکوں ہئوہی نئیں آئی کھلے تاں ٻتر یہی لشکار ے کھڑی مارے ٹرے تاں نکیاں نکیاں ٹوراں ٹردیں ہاں کلیجے پار وے ٻہے تاں حضرت داغ جہاں بیٹھ ڳئے بیٹھ ڳئے کھڑے تاں ٻھوئیں دیاں نبصاں کھڑونڄن ۔۔۔بکنگھم پیلس دی تاکی وچوں جھاتی پاتے ملکہ دی اماں سیݨ ہتھ جو لوڈیا ہاں لڈݨ پئے گیا کن پئی کئونہ سݨیجے لوک وی ہتھ پئے لوڈن میں تے جہانزیب بکنگھم پیلس دے احاطے تے اوندے جادو وچوں نکل تے محل دے سامݨھے آلی پھلواڑی کوں ڈہدے سینٹ جیمزپارک اچ پہہ گیوں ایں پارک دا ناں سینٹ جیمز محل دے ناں نال گھدا ویندے بکنگھم پیلس کنوں پہلے بادشاہت ھیں محل کنوں ٹردی ہئی سینٹ جیمز محل ۱۶۹۷ کنوں ڳھن تے ۱۸۳۷ اچ وکٹوریہ راڄ دا منڈھ ٻدھیجݨ تائیں شاہی محل رہ گئے ہݨ ایں محل اچ چھڑیاں دعوتاں تھیندین پر ہا یاد رکھا ھے جو لندن دی عدالت ہݨ وی سینٹ جیمز دی عدالت سڈویندی ہے اساں سینٹ جیمز پارک دے ٹیوب اسٹیشن تے آپݨی ڈسٹرکٹ لائن دی گاڈی اچ آن بیٹھوں تے سدھے اپٹن پارک تے آن لتھوں اسٹیشن کنوں لہہ تے شیفسبری اسٹریٹ تے جہانزیب دے گھر آگیوں