سینے جھوکاں دیدیں دیرے(22)||نذیر لغاری

جہاز پیا نیل دئیں کندھئیں تے قاہرہ جاگداپیاہا رنگ تے نور دا مینہہ پیا وسداہا ہلٹن شیرٹن انٹرکانٹی نینٹل سٹھ ماڑیاستر ماڑ کوئی حساب کائنی ہوٹلیں دیاں منزلاں ڳݨوں یاسݨہپ کوں سانبھوں ’جیویں سٹھ ماڑ أتے اونویں سٹھ ماڑہیٹھ ’نیل دے اچھرئیے پاݨی اچ دیددے پندھ تائیں ماڑیاں ہیٹھ لتھیاں نظردین ۔جہاز ٹردا ودے ٹھلی ٹھلی ٻیڑی من وچ لوک گیت جاگ پیا نیل سداوہندارہے امڑ سندھوکڈاہاں نہ سکے نیل دیاں ڈوہیں کندھیاں وسوں ہن ایڈوں وی قاہرہ اوڈوں وی قاہرہ ایڈوں وی ماڑیاں اوڈوں وی ماڑیاں فریدی صیب میڈے کن دے کولھوں منہہ آن تے پچھیا ادا اینکوں لکھسوں کیویں ایں سہݨپ دا ناں کیویں ڳھنسوں کیا آکھسوں نیل دی رات کتلا سوہݨی ہئی ایں سہݨپ دے بیان واسطے لفظ کیڈوں آوسن بھوئیں تے اینجھا سہݨپ ولا کڈاہاں ڈیکھسوں یا کائنا؟

رات کوں ۱۰ وجے جہاز اچ پیٹھے ہاسے ہݨ ۱۱پئے وجدن آکھیونے آومارکا روٹی کھاو اساں ہوائی جہاز اچ ماس تے چاول کھادے ہن ول فائیو اسٹار ہوٹل اچ ہاں دی بھا ماری ہاسے اتے ہݨ وت ڈڈھ بھرݨ دی صلاح اساں اٹھی تے بوفے دوگیوسے میں مچھی دا ڈکرا چاتے ہاں تے رکھیا اتے فریدی صیب من وسلوی دے چکر اچ پئے گئے بنی اسرئیل اتھاوں ٻھڄ تے روہیں راویں داپندھ جھاگدے ابھے تے ٹرگئے تاں بکھے تھیوݨ تے چھڑاڳبھا چپا نہ ملیا من وسلوی لدھونے ونکوونک دا کھاج فریدی صیب بنی اسرائیل وچوں تاں کائنی پر انھیں دے سکے تاں ہن اسماعیل دی اولاد قریشی اتے اسحاق دی اولاد بنی اسرائیل فریدی صیب تھئے قریشی ایں ڳالھوں بنی اسرائیل دے سوتروں سوترونڄ تھئے ۔من وسلوی نہ کھاوسن تاں ٻیا اساں وبھ واسئیں وانگر چݨیں دی پونبلی کھاوسن ؟جہاز نیل تے پلتھری مارتے ودا ٹردے پلتھری مارتے ؟۔۔۔۔ہا ساڈی مرضی اساں تاں ایویں آکھسوں شہزاد بھائی کوں ہٹکیاہاوے جو میڈے اتے پئے کوڑیندوتھیاایں جومیں تے اجمل خان لاشاری لیاقت نیشنل ہسپتال بیٹھے ہاسے شہزاد بھائی نال شہزاد بھائی دا ہک ڈینہہ پہلےبائی پاس تھیا ہا ہاں کڈھ تے اوندے والوبدلے ہانے شہزاد بھائی پیا حال ڈیوے جو میڈا ہک چاچا ہونداہا جیرھا پلتھری مارتے ترداہا اساں ڈوہیں وات پٹی ٻیٹھے ہووں شہزاد بھائی اگوں الاݨا چھڑا پتھری مارتے نہ ترادا ہا گوڈے تے حقہ رکھ تے حقہ ٻہہ پیندا ہا ہݨ کھلوں کیویں ڈڈھ اچ دردپئے گیا کھل جھلݨ ڳچی دا گیڑبن گیا میں اجمل خاں کنوں پچھیا حال ڈے اجمل خاں تیڈا چاچا وی تردا ہا اجمل خان آکھیا جو میڈا چاچا تردا تاں ہا پر حقہ کائنا پی سگدا ہا۔۔۔جے میں ہݨ آکھاں جو جہاز پلتھری مارتے تردا وداہا تے نال حقہ وی پیندا وداہا تاں ایندا ڈوہ ثواب شہزاد بھائی دے ذمے لواھے جے جہاز پلتھری مارتے حقہ نہ ودا پینداہا تاں دھوں کیوں ودا نکلداہس بوفے کنوں ہال اچ ول آیوسے ہک مصری نینگر چٹا کھنھور گھیرواں پیرہن پاتے رقص شروع کیتا اینکوں پہلے کتھاں ڈٹھاہاسے میں تے فریدی صیب اکھیں اکھیں اچ ہک پئے کنوں پچھیا ۔ول ڈونھائیں ہکے ویلھے اونکوں سنڄاݨ ڳھدا پچھلے میہنے ایں نوجوان مصردے طائفے نال کراچی آرٹس کونسل دے اوں آڈیٹوریم اچ ڈانس کیتا ہا جتھاں اساں سالیں دے سال خواجہ غلام فرید کانفرنس کرویندے رہ گیوں نواجون پورے رقص دے دوران ایں بھنوالیاں کھاندے جیویں اوندے پیراچ کلی ماری کھڑی ہووے تے اوکلی دے چودھاروں پھردا کھڑا ہووے پیرہن چھتری وانگوں کھنڈڳیا پیرہن دے گھیرتے سیپ کڈھئے پئے چٹے پیرہن دے نال ست رنگے سیپ وی تاں پھردے پئے ہن لال بھنوالی گدڑوی ٹالھی پھردئیں پھردئیں پیر ہن لہا تے ہتھ اچ چاپاتس تے وت وی پیر ہن پاتی کھڑاہا ڈو پیرہن ہانس ہݨ ہک ہتھ اچ پھردا پئے تے ٻیا اوندے پھیر ے نال پیا پھردے چیکل چڈول پینگھ لاھیاں چاڑھیاں اے ذات پئی پھردی ہے یا کائنات پئی پھردی ہے رقص ڈانس لچھی جھمر ٹپ غڑپ چھی اچھی ۔ہمبھوچھی لوہا لاٹوں چنݨ کاٹوں ’’’اے لاٹوں پیاپھردے اے سجھ پیا پھردے بھوئیں پئی پھردی ہے چندر پیا پھردے اکھیں جھلیج گیاں جمکݨ وسر گیاں ول دھڑکن دی تارچھکی کھڑی ہے مصری فنکار رقص پیا کریندے ویلھا ویہاوے پیا پرویلھا کھڑڳئے ویلھا آپݨی ٹور چھوڑتے مصری نینگر وارقص پیا ڈہدے ۔۔۔واہ سائیں واہ ۔۔ہن نوجواݨ غائب تھی گئے تے اوندی جاہ تے ہک چھوکری دا ڈانس شروع تھی گئے ایں ڈانس دا ماترا کیا ھے گسݨتری کیویں ہوسی پیر زمین توں پٹیج ڳئن ایویں لگدے جو مصری چھوہر ہوا اچ تردی کھڑی ہے پاتی کیا کھڑی ہئی جیرھی شے پاتی کھڑی ہئی اونکوں ڳھڳھرا آکھوتا اوگھڳھر انہ ہا شرارا آکھوتاں شرارا ناں ہا غرارا آکھوتاں غرارا ناں ہا اینکوں منجھلا آکھ سگدوں جے چھوکری دا خیال ہووے تاں منجھلی چا آکھویا اے منجھلی دی کوئی ریفائنڈ شکل ہوسی پیر چاوݨ توں پہلے پنی نہ نظردی ہئی پیرچاوݨ دے بعد گوڈاتے ستھلاں وی نظرݨ پئے ویندیاں ہن چھوکری دا ڈڈھ وی نظردا پیا ہا اے سدھ نہ ہئی جو خالی ہاتا بھریا پیا ہا تساں یقین کریسو جو پنی انج پئی نچدی ہئی گوڈا انج پیا نچداہا ستھل انج پئی نچدی ہئی تے ڈڈھ انج ڳنی انج ڈولا انج ڳچی انج متھا انج اکھیں انج گلھاں انج کھاڈی انج فریدی صیب آکھئے جو مائی دی ٻوٹی ٻوٹی پئی نچدی ہے ہاانگ انگ پیا نچداہا تال ہکا تان ہکا سر ہکوردھم ہکوہر انگ پیا نچدے ڳلھ تے ڈڈھ تے ستھل تے پنی تے گھاݨ پئے پوندن گھاݨ اچ کون ٻڈے کون ترے نیل اچ گھاݨ ہوسن نیل دے گھاݨ ایں جہاز کوں ایں چھوہر کوں ایں موسیقی کوں انھیں مسافریں کوں ساکوں کہیں کوں ٻوڑ نہیں سگدے اے نساہا کون پیا تھیندے ساہ کیندا پیا ترٹدے دم کیندا پیا نکلدے گیا رول راول وچ روہی راوے رقص دے بعد جھمر دے بعد لچھی دے بعد لچھی ویلھا وہنداپئے نیل دا نگال وی نہیں ترٹا جہاز ترداویندے رات دے ساڈھے ترے وچ گئے آومسافر و ہوٹل ڄلو قاہرہ ائر پورٹ دی کچھ اچ۔۔۔۔