سینے جھوکاں دیدیں دیرے(21)||نذیر لغاری

گائیڈ آ آکھیآجو آے ایوان صدر ہے اتھاں حسنی مبارک رہندے گائیڈ دی قابلیت ڈیکھ تے عقل لوڈئییں وات آگئ واہ ووئے سوہنا ایوان صدر اچ حسنی مبارک نہ رہسی تاں ٻیا حسݨوڈھاوا رہسی جیندے سانگے گھر بݨیے اوں تاں ٹکݨا تھیا ۔

گائیڈ صیب ساکوں ہک اہرام تے گھن گیا کوچ کنوں ہیٹھ لہہ تے وات پٹی کھڑے ہاسے انسان کڈاہاں اتلاباکمال وی ہا فدا حسین خاں ڳاڈی مرمردئیں تائیں اہدارہ گیاہا کا کاکئی شئے جو ڑو فداحسین خاں ہووے ہا تاں پچھوں ہا استاد ایندے اتوں کیا جوڑوں ’ایں اہرام کوں ڈیکھ تےاگوں نکل گیوسے جتھاں نماشاں ویلھے ابوالہول تے ڈو اہرام بھوت پریت بݨ ڈریندے کھڑے ہن ۔ابوالہول کوں ڈیکھن کنوں پہلے میں سچینداہم جو اے کوئی وڈی بلاہوسی ھے تاں وڈی بلا پراہرامیں کنوں ڈھیر چھوٹی ہے ایویں لگدے جیویں پہاڑوچوں ابوالہول دی شکل کڈھی ہوونے پر اتھاں پہاڑ کوئی کائنی جڈاں انگریزیں نک تے ناساں بھن سٹیاں اتے تھوڈیں تے وی کھلا بجا کیتونے

ناں مراد کہیں جاہ دے ۲۳ سال پہلے کینیڈا دا ہک بندہ اتھاں آیافلم بناوݨ سانگے اواہداہا جو مصر دے اہرام کݨک تے ٻیاان رکھݨ دے گودام ہن مصری اتھ کݨک سانبھ تے کال کوں منہہ ڈیندے ہن کجھ لوکیں داخیال ہے جو اتھ امن دادیوتا سانبھیالاتھے جیرھا ہک نہ ہک ڈینہہ ٻاہروں نکل آوسے ۔اتھاں ہزاراں قصے ٹردے ودن تاریخ دا پیرو آڈھی پیرا چاتی ودے جے کھڑسوبھ کھٹی تاں ساکوں وی سدھ پوسی جو اتھاں چوکھے قصے سانبھئے لاتھن۔ کجھ لوک اہدے ہن جو عظیم اہرام ۱۹۹۹ اچ آپو آپ اپݨاراز کھول ڈیسن ہݨ تاں اساں اتھ ۲۰۰۰اچ آئے ودوں نہ کوئی معجزہ تھئے نہ اہرام راز ڈتے نہ کھڑ سوبھ کھٹی نہ پیرو آڈھی کوئی تیر ماریا۔۔۔اچھا بھلا اے تاں ڈسو جوپنج کنوں ڈاہ ٹن تائیں وزن دے پھتر کیں چاتے اتھ اہرام اسارین پہاڑیں کنوں پتھر کیڑھے ٹرک ٹرالر تے رکھ تے اتھ چاآئےہوسن

آخرانھیں پتھر یں کوں اساری دے قابل وی بݨایا گئے مصر دا ماہر آثار قدیمہ زاہی حواس اہدے جو پتھر یں دا وزن پنج ڈاہ ٹن آکھݨ ساراکوڑہے انھیں وچوں کوئی پتھر وی ادھ ٹن کنوں زیادہ وزنی کائنی ۔۔۔منیوسے سائیں منیوسے ایویں سوہنا ایویں ’’’َٹساں مصری تہاڈی گالھ سچ بھلا اے ادھ ٹن دے پتھر وی تاں آساری اچ استمال تھئن ۱۴ مݨ دا پتھر چاوݨ وی تاں کوئی سوکھا کم کائناہا اتلا بارتاں چوہڑ باغلیاݨی وی نہ چاسگداہا ہݨ سدھ پئی جو پہلے اتھاں نیل دا پتݨ ہونداہا لانجیں تے ٻیڑئیں وچ پتھر بھریج تے انویندے ہن .

ول اتھوں اساری سانگے چوائے ویندے ہن ول جنھیں پتھرکڈھئے ول چاکراہیں ٻیڑئیں تے چڑھائے ول اتھوں لہائے ہوسن انھیں کہیں نہ کہیں طراحویں اساری وی کرگھدی ہوسی ہݨ تاں سامݨے اکھیں نال کھڑے ڈیکھدوں جواے سامݨے ابوالہول ہے پروں ڈو ں اہرام پئے نظردن ہڑندتے بھانویں ڈراور دے قلعے ہوون یاول مصردے اہرام ہوون ساکوں اے ڈسیندن جو انسان باکمال مخلوق ہے انسان وڈی شئے ھے آپنے کجھپ سݨہپ اپݨی چنگآئی لنگائی اپنی خیر شرتے اپݨے ڈکھ سکھ نال انسان وڈی شئے ھے ۔۔۔بہوں وڈی شئے

اہرام کنوں ساکوں کوچ اچ پاتے نیل دی کندھی تے گھن آئن گائیڈ صیب آکھیا۔لہو لہو پیوسے نیل وہندا پئے ۔موسی تے ہارون بنی اسرائیل کوں نال گھن تے نیل ٹپ گئن پچھوں فرعون ٻڈدا ویندے محمد اسماعیل خاں احمداݨی دے ناول چھولیاں دا ناں اج ڈھیر سمجھ آئے ہک پاسوں تاریخ پئی چھولیاں مریندی ہے تے ایڈوں اکھیں دے اگوں نیل چھولی توں چھولی مریندے ۔تاریخ اتے نیل دیاں چھولیاں ہک ٻے کوں پاسے ڈیندیاں اگوں تے ودھدیاں ویندین کلھوٹی دی عیݨ وچوں داݨہ ڈھہے یا نیل تے سندھو وچوں چھولی وہے یا فرعون موسی دا پیرا چاوےہر داݨہ ہر چھولی ہر پیرا ویلھے دی دھوڑ اچ دھوڑ تھی ویندے پچھوں نشانیاں بچ کھڑدین اہرام ابوالہول پتݨ منارا موج گڑھ ڈراور ٹھل خیرو ٹھل گانمݨ ٹھل شاہ علی اتے بھٹہ واہݨ دی اوماڑی جیرھی میکوں ممتاز حیدر ڈاہر ڈکھالی ہئی گائیڈ آکھیا جو جہاز تے چڑھ ڄلوں میں تے فریدی صیب ہتھ اچ ہتھ پاتے نیل دی مݨ تے کھڑے جہاز اچ ونج بیٹھوسے اندر ہک ریستوران ہے جتھاں ساکوں رات دا ٹکر کھویسن ٻاہروں نیل ڈسدا پئے ساری حیاتی اچ ہزاراں سوہݨیاں راتیں ڈٹھین ہزاراں ڄلوے ہاں اچ سانبھئے لاتھن جاہ جاہ دا سݨہپ ڈٹھے پر قاہرہ اچ نیل دی ایہا ہکا رات کڈاہاں نہ وسرسی ۔

۴۰۳۵ پاکستانی گروپ بݨاتے نیل اچ تردے ودے ہاسے ہر سوہݨی چھوہر نال ہک سوہݨا نینگر ہا ایڈوں میں تے فریدی صیب ہکے جولے اچ پنجا لیے ودے ہاسے محسن نقوی جڈاں کوئی سوہݨی جوڑی ڈہداہا تاں ٹھڈا ساہ کڈھ تے اہداہا جو اللہ کریسی بھیݨ بھرا ہوسن اساں ڈوہیں نویں حیاتی دے پندھ دامنڈھ ٻدھݨ آلے ہر جوڑے کوں دلوں دعائیں ودے ڈیندے ہاسے ودھو پھلو جیوو شالا خوش پئے وسو جتھ پیر ہووے یہے اتھائیں خیرہوو یہے