تین عشرے پہلے کا کراچی،کورونا وائرس اور مذہبی دانشور||مبشرعلی زیدی

کوئی تین عشرے پہلے کی بات ہے کہ کراچی کے حالات بہت خراب تھے۔ قتل و غارت اور ہنگاموں کے بعد شہر میں کرفیو لگادیا گیا۔ فوج گشت کرتی تھی۔ کوئی کرفیو کی خلاف ورزی کرتا تو گولی تو نہیں مارتی تھی لیکن سڑک پر ٹھکائی کردیتی۔

ہم انچولی میں رہتے تھے۔ محرم الحرام آگیا۔ رات کو چند گھنٹوں کے لیے کرفیو میں نرمی کی جاتی جس میں مجالس ہوجاتی تھیں۔ زیادہ لوگ نہیں آتے تھے۔

چار محرم کو ہمارے چھوٹے ماموں کے گھر سے جلوس اٹھتا تھا۔ درجنوں علم، تابوت اور ذوالجناح سجایا جاتا۔ کئی ماتمی انجمنیں آتیں اور سیکڑوں عزادار شریک ہوتے تھے۔

اس سال صرف ایک علم اٹھایا گیا اور ہم چند عزادار ادھر ادھر رک کر نوحہ پڑھنے کے بجائے سیدھے امام بارگاہ چلے گئے۔

اہل تشیع کے لیے عزاداری ضروری ہے لیکن حالات کے مطابق اس میں کمی بیشی کی جاسکتی ہے۔

بدن میں جان ہے تو نماز میں بے شک سورہ یاسین پڑھیں۔ نہیں تو سورہ کوثر سے نماز کا بھی وہی ثواب ہے۔

عالمگیر وبا نے تباہی مچائی ہوئی ہے۔ وائرس قابو میں نہیں آرہا۔ اہل تشیع کے اپنے بڑے بڑے نام یہ موذی بلا کھا گئی ہے۔

اس سال یوم علی کی مجالس اور جلوسوں میں بہت احتیاط کرنی چاہیے۔ مجالس آن لائن کرلیں۔ جگہ جگہ جلوسوں کے بجائے ایک مختصر جلوس نکال لیں۔ کم لوگ ہوں، ایک دو علم ہوں اور تھوڑے وقت میں مکمل کرلیں۔

یہی درخواست اہلسنت کے لیے ہے۔ تراویح مختصر رکھیں۔ قرآن گھر پر پڑھ لیں۔

عید کی شاپنگ بہت ضروری ہے تو اب آن لائن سب کچھ ملتا ہے۔ بازاروں میں رش ہوگا تو موت قہقہے لگائے گی۔

خدا تب رحم کرے گا، جب آپ اپنی سی احتیاط کریں گے۔ خدا کے لیے رحم کریں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔