سینے جھوکاں دیدیں دیرے(16)۔۔۔ نذیر لغاری

بش ہاوس اچ سنگت نال مل تے خوش تھی گیوسے ہݨ جاویدنال تیاری ہے جاوید دی زال عنبر ین بلوچیں دے خطرناک قبیلے نال تعلق رکھیندی ہے ہسباݨی بلوچیں دا ناں سݨ تے بندہ کنب ویندے پر عنبر ین آپݨے خاندان اتے قبیلے کنوں اصلوں انج تے وکھری ہے کمپیوٹر انجینرنگ کیتی ودی ہئی لندن اچ پہلے ہک ادھ جاہ تے نکی وڈی نوکری کیتی ہس پر ہݨ دنیادے ہک وڈے بینک وڈچےوچ کم کریندی ہے انگریزیں وچ انگریز بلوچیں وچ بلوچݨی ۔۔

حیرت انگیز ذہین چھوکری ہے سندھی قوم پرستیں دی نآراض نسل دی چھیکڑی کاوڑ کلھی عنبرین ہسباݨی اچ بھری کھڑی ہے کراچی اچ صحافت کریندی ہئی سندھی اخبار یں اچ کم کیتس ساڈی اوندے نآل کراچی دی سونہہ ہئی جڈاں وی اوصحافت اچ کوئی تیر مریندی ہئی اساں شابس سانگے فون کریندے ہاسے اتھاں عنبرین کمال کرڈتے بلوچیں والی بلوچکی جہازدے ہیٹھوں سٹ تےلندن آئی ہئی پسماندہ نہ پہلے ہئی تے نہ ہݨ ہے اتھاں لندن آتے امیر خسروکوں یاد کرتے ہنجھوں نہیں وہیندی

کاہے کو بیاہی بدلیس سن بابل مورےتاں اونکوں آندا ہے کائنی ٹیمپل اسٹیشن کنوں ٻہہ تے وکٹوریہ اسٹیشن والےپاسے روانہ تھیوسے ساگی ڈسٹرکٹ لائن دی ٹیوب اچ آن بیٹھوں اتھوں راہ اچ ڈواسٹیشن ایمبارکمنٹ تے سینٹ جیمز پارک آئےاگوں تریجھا اسٹیشن وکٹوریہ دا ہا اے لندن دا ہک بہوں وڈا ریلوے اسٹیشن ہے اتھاں زمین کنوں ہیٹھ أتے ۵۰ کنوں ودھ پلیٹ فارم ہوسن یورپ دے بنھیں ملکیں سانگے ریل گاڈیاں اتھاوں ملدین ایں اسٹیشن دے نال لندن دا بہوں وڈابسیں داٹرمینل ہے جتھوں دیس دیس تےشہر شہر دیاں کوچاں ملدین اتھوں داریلوےاسٹیشن تے بس ٹرمنیل پورے لندن پورے برطانیہتے پورےیورپ نال گنڈھیا کھڑے

وکٹوریہ اسٹیشن تے لتھوں ہݨ دھرتی دے پیٹ وچوں نکلݨ دا پندھ پیدل کتیوسے کتھآوں پوڑیاں چڑھیوں تے کتھاوں پوڑیاں آپو آپ ساکوں أتے چا آیاں زمین کنوں ٻاہرآیوں تاں لمے پاسوں انھیں پیلٹ فارم والے پاسوں ٹرپیوں ڄتھوں زمین دے آتے ٹرݨ والیاں ڳاڈیان ملدین ۔ٹیوب اسٹیشن تےٻیاجہان ہا اتے اتلے اسٹیشن تے ہک ٻی دنیا ڈٹھوسے سنھپ کھنڈیاپیا ہا منظریں دا سنھپ بلڈنگیں دا سنھپ ریل گاڈئیں داسنھپ پیلٹ فارمیں دا سنھپ اتھاں ریلوے اسٹیشن دا شاپنگ مال ڈیکھݨ نال تعلق رکھیندے

شاپنگ مال دا سنھپ میماں دا سنھپ اڄ پتہ لگاجونانا کریم بخش وڈے ویلھے ڈاکݨی تے بھیرویں کوں رلاتے کھودی رینگاٹ دے میوزک تے ایں ٻہہ اہداہا جو بے دی غرض نہ کائی واہ میم کیتی رشناؔئی اتلے پیلٹ فارم تے جاوید ساکوں ہک شاپ تے گھن گیا اکھیں پٹیج گیاں ہرنویں چھپی کتاب اتھاں ہئی اتھوں دے لوک کتابیں دا نشہ کریندن گاڈی اچ پارک اچ بس ہے چ جاہ جاہ تے ہرزال تے جوان کتاب پڑھدے ملسن میڈاخیال ہے جو کتاب پڑھݨ ریت بن گئی ہے

ول ایہے ریتاں قانون ٻݨ ویندین قوماں پڑھائی کوں قانون سمجھ ڳھنن تاں اگونہی تھیندی نہ تاں اساں وانگوں تریجھی دنیادے تریجھے درجے دی مخلوق دردردھلے کھاندی ہے پلیٹ فارم تے عزیز شاہد دی نظم جھمراں پاتی کھڑی ہئی میں اتھاں پوری دی پوری نظم ڈٹھم پورےجسم وجودنال ہک ہک لائن ہک ہک مصرعہ ہک ہک نقطہ ہک ہک رمز ہک ہک کنایہ استعارہ تشٻیہہ آپݨے تمام ظآہری تے گجھے سنھپ نال ہک چھوکری تے چھوکراگلکڑی پاتے نظم بݨیے کھڑے ہن اتے ہک بے کنوں ساہیں دی خریت کھڑے پندے ہن چھوکری دے ساہ چھوکرا کھڑا گھندا ہا تے چھوکرے دے ساہ چھوکری کوں آکیسجن پے ڈیندے ہن جاوید سومرو کیتے اے گالھ اپݨا مل ونجا گئی ہے کیوں جو اوندے کیتے اے کوئی نویں ڳالھ کائنی پر میں جلوت وچ تھیوݨ والے ایں خلوتی عمل کوں عشق دا الوہی تے آفاقی جزبہ سمجھ تےپیا ڈہداہم