سینے جھوکاں دیدیں دیرے(14)۔۔۔ نذیر لغاری

۔۔۔۔۔۔۔۔۔۔۔۔۔۔۔۔۔۔

چھی وجے نندرا کھڑی ۔۔۔اکھڑکلی تھی پتھاری نکل آگدڑ ہے تیڈی واری ۔۔۔تاکی وچوں ڄھاتتیاں پنیدا کھڑہا ،نندروں اٹھݨ سیتی ترائے مسئلے وات پٹی کھڑے ہن سراچ درد ہے نندر پوری نہیں تھئی اتے بکھ کنوں ہاں پیا لہندے ۔۔اچھااے تاں ڈسائی جلاں جو اے اپارٹمنٹ ڈو ماڑ بلڈنگ دی پہلی منزل تے ھے چارلٹن کورٹ اچ ڈھیر سارے اپارٹمنٹ ان سارے ہکو جیڈے تے ہکو جہیں اپار ٹمنٹ اچ ڈوسمھݨ دے کمرے تے ہک ڈرائنگ روم ہے

ناں ھس ندیم چار چھی مہینے پہلےاتھاں آیاہا ہن اتھاں پونڈیں دی کمائی تے زور لائی کھڑے ندیم پھکا تھیا کھڑاہا جو نریان اچ کوئی شئے کائنی ۔اوندا پھکا تھیوݨ اجایا ہا میں اونکوں آکھ تے کائنا آیاہم جو ٹکݨ بہݨ دے نال نال کھاوݨ پیوݨ دا بندوبست وی کریں ندیم کچن دو گھن گیا اتھاں سیب ڈکھالیونس اتے آکھیس جو سیب حاضرہن انھیں کوں کھاوݨ نال کجھ ہاں جھل تھیسی ۔واتوں کجھ نہ الایم چھڑا دل ہئی دل اچ آکھیم کا کا توں نریان نوھیں کریندارہندا کیا ۔

اوں ول وی پتہ نہیں ڳالھ کیویں ٻڄھی آکھیس ٻآہرونج ناشتہ کریساں میں اونکوں آکھیم جو سردرددی ٹکی ہووی تاں اوہاڈے چا ندیم میکوں گولی ڈتی تے روزی دے پچھوں بھڄ ییا ۔میں سیب چاتے ادھ کھادم ول گولی نگلیم ول بستر تے ڈھہہ پیم نندردا جھوٹا آگیا سردا دردتے نندردیاں طلباں تاں مک گیاں پر بکھ وات پٹی کھڑی ہئی کچن وچوں باقی ادھ سیب جاتے ہاں تے رکھیم

درکھڑکیا کونڈی کھو لیم آوݨ والی ہستی الہی صاحٻ ہاایں اپارٹمنٹ دا مالک ۔اے وی گجرات دا ہے ڈاڈھا خوش اخلاق ہا الہی صاحب ساڈا حال حوال پچھیا اتے آکھیس جو ۱۲ تے ہک وجے دے درمیان بلدیہ دا بلڈ نگ سروئیر آوسی ایں نہ ہیووے جو او آوے تاں اتھاں بھنبھنݨ بھئوں اندھاریاں راتیں ہیوون ۔

اونکوں ترسلا ڈتم جو فکر نہ کرمیں لاتھاں الہی صاحٻ ٹرگیا ول شکراے تھیا جو سروئیرصاحٻ ۱۲ کنوں وی پہلے آگیا۔نہ تڑ پھایس نہ ترسالیس نہ آپݨی تانگھ کرایس نہ اساں کاں اڈاریا نہ کوئی گرانہہ ۔۔ڈٹھا اونویں وی گرانہہ ہووے ہا تاں ڈھہے ہا ایں ویلھے گرانہہ کتھاوں لبھ وی پوندا تاں کاں داپیوہئی نہ کھس سگدا ہا

انگریز گیا تے رضون صاحٻ آگیا الہی صاحٻ دا سنگتی ہا پچھیس جو الہی صاحٻ کتھ ہے آکھیم ہر جاہ وسد ی ذات پنل دی اپݨے اندر گول ڈو منٹ کھڑتے رضوان صاحب نکل گیا ول جہانزیب فون کیتا اتے حال پچھیس آکھیم تھَیویں لاش دا سائیں متاں میں ہوواں وودھاڑ ووبکھ لگی ہے ۔۔

آکھیس مرن تیڈے دشمن اجھو بندوبست کرینداں خداحافظ ’جہانزیب فون رکھیا تے لاشاری صاحٻ دا فون آیا شئت جہانزیب پارت کیتی ہوسی جو مہمان رجیئے کجیئے ملک اچ بکھ دے ہوٹے مردے مرݨ جیوݨ راہ جہان دا ہے جے اے بکھا مویا تاں ملکہ اوندا ملک اتے ایں لندن شہر دے ناں کوں لوڈا آویسی ۔۔

لاشاری صاحٻ آکھیا جو میں ہݨیں آنداپیاں میکوں فون رکھئیں اجاں پنج منٹ وی ناں تھئے ہن جو لاشاری صاحب آگئے اتے آوݨ سیت باہرنکلݨ دا حکم ڈتس ڈوہیں باہر نکل آیوسےہیٹھ لاشاری صاحٻ دی گاڈی کھڑی ہئی ۔

گاڈی ساوتھ اسٹریٹ کنوں نارتھ اسٹریٹ آلے پاسے ٹرپئی ۔اگوں ایسٹ ہیم دا ٹاون ہال ڈکھایس ول گاڈی کھٻے پاسوں پھر ی ۔کبھے پاسوں ہک ماڑی تے بنیک آف انڈیا دا بورڈ نظریئے اگوں ہک سگنل ٹپ تے ڈو جھے سگنل کنوں سجے پاسے پھرپیوں اتے کیتھرین روڈ تے آگیوں

’’ایں روڈ تے مکان نمبر ۱۶۰ مشتاق لاشاری دا گھرہے جنرل اسٹور ہے اتے گھر ہ اسٹور وچ بیگم مشتاق لاشاری تے انھیں دے ڈو بال کھڑے ہن سجاد لاشاری دا نمبر چوتھا تے ریحان بیرک دا نمبر پنجواں تے چھیکڑی ہے اسٹور دے اندروں پوڑیاں اتلی منزل تے ویندین اتے پڄیوں تاں ہک پلنگ و تھر یآ پئے نال صوفہ سیٹ لاتھے کٻھے پاسوں کندھ تے ذوالفقار علی بھٹو دا رنگین فوٹوہے فوٹو دے ہیٹھ ٹی وی لاتھے جیندے اتے جیری اسپنگلر دا پروگرام ری یونین چلدا پئے ایں پروگرام وچ ویہہ ویہہ پنچو یہہ پنچویہہ سالیں کنوں نکھڑیئے

ما پتر ما دھی پیو پتر زال پئے دھی پیوتے تے ٻے سکے ملوائے ویندن ۔میں نکھڑیئے لوکیں دے ول رلے ملݨ دے ایں پروگرام وچ شریک لوکیں کوں دھاڑیں مار تے روندا ڈٹھے انسان کتھائیں وی ھے اصل اچ ھے تاں انسان ،

انسان دے جزبے انسانی ہوندن نکھڑݨ دا جھورا روگ تے ڈکھ ہکو جہیاں ہوندے اتے ملݨ دی خوشی وی ہکوجہیں ہوندی ہے ۔۔۔نکھڑیئے کیوں ہن ۔ہر بند ے دی آپݨی کہانی ہے ہر کہانی دا آپݨا درد ہے ہر درد دا آپݨا سیک ہے