مارچ 19, 2024

ڈیلی سویل۔۔ زمیں زاد کی خبر

Daily Swail-Native News Narrative

سرائیکی جرنلسٹس سانجھ

سرائیکی جرنلسٹس پاکستان اتے دنیا بھر وچ سرائیکی وسوں دے صحافیاں دا سبدھ ہے ۔ جگ جہاں اچ کم کرن والےصحافی ایں تنظیم دا حصہ بن سگدن

 سرائیکی جرنلسٹس سانجھ دا منشور

اے۔ سرائیکی جرنلسٹس سانجھ کہیں وی سیاسی ، سماجی ، یا صحافتی تنظیم دی ذیلی تنظیم یا حصہ کوئنی نہ ہوسی ، خالصتا سرائیکی وسوں دےہرزبان بولن

والے  صحافیاں دی سانجھ ہے

بی۔ سرائیکی جرنلسٹس سانجھ پریس کلب اتے تمام  یوجیز دے آئین تے قوانین دا احترام کریندی ہے تے کریندی راہسی یوجیز دے کہیں دھڑَے دا حصہ نہ ہوسی ،مشاورت نال انتخابی اتحاد کرسگدی ہے

سی۔ سرائیکی جرنلسٹس سانجھ دے اغراض ومقاصد دے حصول سانگے تما م ترآئینی جمہوری ، قانونی مروجہ طریقے ورتن دی پابندہے تے ہوسی

ڈی۔سرائیکی جرنلسٹس  سانجھ سرائیکی وسوں دے صحافیاں اچ وسوں دے حقوق سانگے سیاسی شعور دی بیداری تے فکری ہم آہنگی سانگے تمام تروسائل ورتن دی پابندی ہوسی

ای۔ سرائیکی جرنلسٹس سانجھ تحریر، تحقیق، دلیل تے ثبوتاں دی بنیاد تے وسوں دے مسائل تے مقدمات پیش کرن دی پابندہوسی

ایف۔سرائیکی جرنلسٹس سانجھ سرائیکی خطے وچ بولی ونجن والی کہیں وی زبان، اردو،پنجابی، سندھی، بلوچی ،پشتو،ہندکو، ہریانوی، براہوی وغیرہ کوں بطور صحافتی زبان بنائے/ورتیے ونجن دی حوصلہ افزائی کریسی

2۔بنیادی آہر:

سرائیکی جرنلسٹس سانجھ سرائیکی صحافیاں دے حقوق دا دفاع، خطے دے حقوق دا دفاع تے انج سرائیکی صوبے دے قیام دی تحریک دی مکمل حمایت کریسی

مقاصد:

اے، سرائیکی صحافیاں دے حقوق دا دفاع

بی ۔ خطے دے مسائل کوں ملکی تے عالمی سطح تے اجاگر کرن

سی، ،سرائیکی صوبے دے قیام سانگے عملی جدودجہد کرن تے عملی جدوجہد اچ شریک سرائیکی سیاسی ، سماجی تے ثقافتی تنظیماں دی حمایت

ڈی، سرائیکی صحافیاں اچ  سرائیکی خطے تے ننویں صوبے دے قیام سانگے شعور اجاگر کرن

3۔ اہلیت/ شرائط رکنیت: تنظیم دے اغراض و مقاصد  تے نظریات کوں بہتر سمجھن ،تنظیم نال  عہد  کرن تے تنظیم سانگے عملی  کوشش کرن والا کہیں وی جنس دا مذہب دا حامل صحافی / میڈیا کارکن ایں تنظیم دا عہدیدار تے رکن بن سگدے، ایں سانگے  کم از کم ہیٹھ ڈتیاں خوبیاں تے شرائط تے عمل پیرا ہوون لازم اے۔

اے ۔ تنظیم دے  نصب العین تے عمل پیرا رہ ویسی

بی۔ تنظیم دے اغراض و مقاصد  تے کامل یقین رکھسی

سی۔ تنظیم دے نصب العین دے حصول سانگے وقت، محنت تے مال کی قربانی ڈیون والا ہوسی

ڈی۔ سرائیکی جرنلسٹس سانجھ دا کوئی وی ممبر کہیں وی قسم دی شاونزم اچ کہیں صورت ملوث نہ ہوسی

ای۔ کہیں وی ممبر کوں ہک ڈوجھے دی کردار کشی [پروپیگنڈا]،ہک ڈوجھے تے الزام تراشی تے دھڑے بندی سانگے لابنگ دی اجازت نہ ہوسی ایندا اطلاق سوشل میڈیا تے وی ہوسی

ایف۔ سانجھ اچ اختلاف رائے کو صحت مند عمل تصور کیتا ویسی ،غیرشائسہ لہجہ ، نازیبا الفاظ تے دھمکیاں ڈیون دی کہیں ممبر کوں اجاز ت نہ ہوسی

جی۔ سرائیکی جرنلسٹس سانجھ کوں اپنے ذاتی مفادات ،ذاتی مقاصد دی تکمیل تے ذاتی تشہیر سانگے نہ ورتیا ویسی ، سانجھ دے اصولاں ، مفادات تے مقاصد کوں تقویت ڈیون ہررکن دی اولین ذمہ داری ہوسی

ایچ۔ سانجھ دے ممبران تے عہدیداران ولوں اختیارات کنوں تجاوز جرم تصور کیتا ویسی ۔فرائض توں غفلت تے کوتاہی قابل برداشت نہ ہوسی

آئی۔ مالی بے ضابطگی تے بدعنوانی ناقابل معافی جرم تصور کیتا ویسی

جے۔ سرائیکی جرنلسٹس سانجھ سانگے تمام صحافتی تنظیماں قابل احترام ہوسن ، ہر تنظیم نال ہکوسنواں گانڈھا رکھیا ویسی ۔ باہمی مشاورت نال انتخابی اتحاد کیتا ونج سگدا ہے ایندے کیتے مرکزی مجلس شوری /وچار ستھ دا فیصلہ حتمی ہوسی۔

کے۔ سرائیکی جرنلسٹس سانجھ دی ہرایکٹویٹی کول پہلے ہک کمیٹی بنائی ویسی جیڑھی ایکٹویٹی کوں ایگزیکیوٹ کرن اچ کردار ادا کریسی

ایل ۔ ڈسپلنری کمیٹی وی بنائی ویسی جیندے وچ سینئیر صحافیاں کو مشاورت نال شامل کیتا ویسی

ایم ۔ سرائیکی جرنلسٹس سانجھ دا ممبر کہیں وی سیاسی ، ثقافتی یا ادبی تنظیم /تحریک نال وابستگی رکھن دا حق رکھیسی پر کہیں وی ڈوجھی سرائیکی صحافتی تنظیم دی رُکنیت نی گھن سگدا۔

این۔ ضابطہ اخلاق دی خلاف ورزی تے کہیں وی ممبر دے خلاف مروجہ طریقہ کاردے تحت تادیبی کارروائی کیتی ویسی

او۔ سانجھ دے پلیٹ فارم کوں بنہاں صحافتی تنظیماں یا افراد دے خلاف تنقید یا پوائنٹ سکورنگ سانگے استعمال نہ کیتا ویسی

پی ۔کہیں وی سیاسی ، سماجی ،مذہبی یا صحافتی لیڈر دی کردار کُشی سانجھ دے پلیٹ فارم تو نہ کرن ڈتی ویسی

 

سرائیکی جرنلسٹس سانجھ دے ممبر بنو

 


سرائیکی جرنلسٹس پاکستان اتے دنیا بھر وچ سرائیکی وسوں دے صحافیاں دا سبدھ ہے ۔تنظیم دا صدر دفتر  اسلام آباد اچ ہے۔  جگ جہاں اچ کم کرن والےسرائیکی وسوں دے صحافی ایں تنظیم دا حصہ بن سگدن

رابطے سانگے

dailyswail@gmail.com