اڄ میݙی وسیب تیاری اے- نماشاں کوں زکریا ایکسپریس دیاں کراچی توں دیرے نواب دیاں ٹکٹاں ہتھیکڑیاں اِن- دل دَھک دَھک کریندا پئے، جݙاں وی میݙی وسیب تیاری ہووے تاں میݙا دل اینویں اِی دُھماں پا کھڑدے- ٹٻری ٹھڈیاں لورہیاں دی چس چاوݨ چاہندی ہے پر کُہیڑ دی رُت اڄاں کجھ ݙینہ پروبھری اے- سرائیکی جنتری موجب اڄ مَسّیں منگھر 2080 (بکرمی) دی 21 تے دسمبر 2023ء دا چھینواں ݙیہاڑا اے، پوہ اڄاں وی پرے ہے۔ ترے ݙینہ پہلے ای آݙت وار کوں کراچی آرٹس کونسل وچ چار ݙینہواری ”سولہویں اردو عالمی کانفرنس“ توڑ کوں پنی ہئی، اُتوں 14 توں 18 دسمبر کوں پنج ݙینہواری” اٹھارہویں کراچی عالمی کتب میلہ“ دا کانڈھا وی مل ڳئے۔ خوشی دی ڳالہہ ایہ ہئی جو اردو عالمی کانفرنس 2023ء وچ وی پچھلے سالیں دی طرحاں سرائیکی دا سیشن وی موجود ہا۔ دسمبر دا مہینہ کراچی آلیاں سانگے ٻہوں اہم ہوندے۔ ایں مہینے 27 کوں بی بی بے نظیر بھٹو دی راولپنڈی وچ شہادت تھئی ہئی، ایہ قتل تریخ دے منہ تے کالا دانگ اے- بی بی دی رَت دے تریڑے ہک لنگ زمین توں مٹا ݙتے ڳئے ہَن پر اوندے خون دے چِھٹے ریاست دے بدن تے ٹھمکی پوشاک تے اڄ وی نشابر ہِن۔ پنڈی دے اوں موت منظر دے زخم اڄ وی زندگی تے تازے ہِن۔ وسیب اتے کراچی سندھ دے دھرتی ڄائے تاں ایہ دھک، ایہ پھٹ آپݨے بدن، آپݨی روح تے محسوس کریندن، بی بی دی شہادت دے مہینے ماحول وچ مونجھ ملال تے رتانجݨ گُھل ویندی اے، وَت کاوڑ دا تاں کوئی انت نئیں ہوندا۔ بی بی شہید استعارہ اے، ایں دھرتی دے اَݨ پھر، غریب اپاپیپ نال محبت تے جُڑت دا، بھاڳیں بھری جمہوریت دا، زندگی دی آزادی دا، موت دی اکھ وچ اکھ پا کے ڈٹ تے کھڑ ونڄݨ دا، نیزے دی نوک تے سر رکھ کے حق سچ الاوݨ دا، متام موسمیں وچ چیتر بہار دے رونق میلے دا۔ بی بی شہید وسدی وسیوں سانگے گُھپ اندھارے وچ ہک ٹِمکدی ہوئی لاٹ ہئی جیڑھی ہک ݙیݨ ݙراکل نماشاں کوں سوگھی کر ݙتی ڳئی۔ بی بی بے نظیر بھٹو دی شہادت تے سرائیکی دھرتی دے عظیم ڄائے جہانگیر مخلص آپݨی نظم ”شہید جمہوریت“ وچ جیڑھا ہدیہ بی بی شہید کوں پیش کیتے او بے مثال اے :
توں اینجھی راہبر!
کہ تیݙی عظمت کوں زندگی نیں سلام کیتے
توں او مسیحا!
کہ تیکوں مارݨ تے موت خود وی متام کیتے
توں او ستارہ ہئیں روشنی دا
جو رُلیے بُھلیے مسافریں کوں وی
منزلیں دا نشان ݙیندے
توں او اشارہ ہئیں زندگی دا
جیڑھا اندھاری کُہیڑ وچ
سوجھلے کوں اپݨی امان ݙیندے
توں سوچ سچی دی ہک کرن ہئیں
ایں اندھے کوفے دی شام کیتے
توں او مسیحا!
کہ تیکوں مارݨ تے موت خود وی متام کیتے
توں اینجھی دھی ہئیں !
کہ جیندی سوہݨی جبین دی
تازگی ہئی سوجھل اسُور کیتے
توں سیندھ اینجھی
جیں اپݨے لشکر دے خیمیاں دی
سڑی سُوا کوں سندور کیتے
توں اپݨے زندہ ضمیر پیو دے جنازے اُتے
لڳے ہوئے پَہرے وی تروڑ آیوں
تے چیر کے دشمنیں دی صف کوں
توں نال دھرتی دے اپݨے سانگے وی جوڑ آیوں
توں اپݨے بابے دی اینجھی جُرات
جئیں آکھیا ہا
جو ”کہیں وی ظالم دے کہیں وسیلے دے نال بیعت قبول کینی
میں اوں قبیلے دا فرد ہاں جُھک ونڄݨ تاں
جیندا اصول کینی
تے ….. یاد رکھو جو میݙے خطبے وی ضرب ہوسن
کہیں یزیدی نظام کیتے“
توں او مسیحا!
کہ تیکوں مارݨ تے موت خود وی متام کیتے
توں ایں زمانے
حسینی جذبے دی او مثل ہئیں
جئیں سچ صلیبیں تے چڑھدا ݙٹھے
جئیں سجھ کوں سُولی توں لاہندا ݙٹھے
جئیں پل دیاں پلکاں تے اپݨے ہنجوں سجا کے ݙٹھے
تے سنگ سارے کُہا کے ݙٹھِے
توں بھیݨ اینجھی
جئیں ہر بھرا دا جنازہ مونڈھے تے چا کے ݙٹھے
تے چندر تارے سنویں بھرانویں دیاں لاشاں ݙٹھن
جئیں اپݨے ویڑھے دے صحن وچ
کربلا دیاں لہندیاں نماشاں ݙٹھن
تئیں اپݨے پیارے جوان ویریں دے جسم تے
زخم زخم تارے شمار کیتن
تے سارے بدلے اُدھار کیتن
تے ہر جنازے تے ہر دفعہ تئیں کلام کیتے
جو کہیں وی جابر دے جبر دے انتقام کیتے
تئیں صرف جمہوریت دے نعرے کوں عام کیتے
مُکاݨ ماتم دے سارے قصے
تئیں سانبھ چھوڑیے اوں شام کیتے
جتھاں تئیں جیوݨ تمام کیتے
یتیم گُنگی عوام کیتے
تہوں تاں ایں دور دے زمانے
شہیدِ جمہوریت دا تمغہ وی
ذات تیݙی دے نام کیتے
تے جُھک کے تیکوں سلام کیتے
تے! تیکوں مارݨ تے موت خود وی متام کیتے
ایں ساڳی مہینے کراچی وچ ملیر بار ایسوسی ایشن، کراچی بار ایسوسی ایشن، سندھ ہائی کورٹ بار ایسوسی ایشن، ایوان ہائے صنعت تے تجارت پاکستان، پاک امریکا کلچرل سینٹر (پی اے سی سی) کراچی آرٹس کونسل تے کراچی پریس کلب دیاں سالانہ چُوݨاوی تھیندین۔ آرٹس کونسل دی تریخی” عالمی اردو کانفرنس“ تے روایتی ”کراچی عالمی کتب میلہ“ وی دسمبر وچ تھیندے۔ دسمبر دا مہینہ وکیلاں، تاجراں، صنعت کاراں، صحافیاں، ادیباں دانش وراں، سوجھواݨاں، شاعراں، لکھاریاں، فنکاراں تے بی بی دے عزا داراں دا مہینہ اے، دسمبر مونجھ ملال دا مہینہ اے، پر ایہ سارے روایتی کٹھ رَل مِل کراہیں مونجھ کوں ہک ٻہوں وݙی سِک تے طاقت وچ تبدیل کر ݙیندن۔
وکیلاں، صنعت کاراں، صحافیاں تے آرٹس کونسل دی ڳݨ مُنج ہوندی اے جو اِنہاں دی چوݨ دا ݙینہہ 27 دسمبر کنوں اڳوں پچھوں ہووے جو 27 کوں بی بی شہید دا ورہیݨاں منایا ونڄے تاں ایں دوران ٻیا کوئی ردِھ رُدھیما نہ ہووے۔ میݙی خوش بختی اے جو میں”پہلی عالمی اردو کانفرنس 2009ء“ تے”پہلا عالمی کتب میلہ2007ء“ دے پہلے ݙینہہ کنوں 2023ء دی سولہویں اردو کانفرنس تے اٹھارہویں کتب میلے تئیں کہیں ناں کہیں شکل وچ اُنہاں نال جُڑیا کھڑاں۔ اُنہاں کانفرنساں تے میلیاں وچ میکوں ڄاتے سُنڄاتے ادیباں، سوجھواݨاں، شاعراں، لکھاریاں تے فنکاراں دیاں جُتیاں سِدھیاں کرݨ دی سعادت نصیب تھی پوندی اے۔ ول ایہ ہے جو اِنہاں موقعیاں تے وسیبی تے مقامی سنگت وی کٹھی ہوندی اے- جیڑھے سنگتیاں نال عام حالات وچ میل مہابا اوکھا ہوندے، اُتھاں اِنہاں نال کہیں نہ کہیں ݙیہاڑے مِل ای پوندوں، اِنہاں میل مُلاقاتاں دی ول آپنڑی چس ہوندی اے-
(پندھ جاری اے)