لا وارث وسیب|| ذلفی

کُجھ درد ہن دھاڑیں نکل ویندن نسے وس کولو ودے دھائیں تھیندے۔ طارق صاحب دے ڈوہڑے دا اے بند سرائیکی وسیب دی صورتحال تیں صادر آندے۔

سرائیکی وسیب ریاست پاکستان دے اندروں ہر قسم دی محرومی ، بے وسی تے بے دھیانی دی زد اچ ھے۔ اے صورتحال حالیہ سیلاب اچ مزید نشابر تھی کے سامݨے آئی ھے۔ وسیب دے علاقے دمان دا بیشتر حصہ سیلاب دے پاݨی اچ بُڈ گئے، ڈو درجن کولو زیادہ اموات تھی چُکن، سینکڑاں جانور لُڑھ ڳئین، کروڑیں دیاں فصلاں تباہ برباد تھی گئین، ہزاراں گھر ملیا میٹ تھی گئین پر ریاست اجاں تک سُتی پائی ھے۔ ڈُکھ دی گالھ تاں اے ھے جو مین سٹریم میڈیا اچ کوئی خبر تک نئیں آئی۔ ڈو ڈیہنہ واسطے وستی احمداݨی اچ پی ڈی ایم اے ہیک نِکا جیہاں ریلیف کیمپ لائے اوکوں وی رات ختم کر ڈتا گئے جیندے خلاف لوکیں شدید احتجاج کیتے تے روڈ کوں بلاک کر ڈتے پر ریاست دے ایں ادارے آکھئے ساڈے کولو فنڈ کائینی اساں مزید کجھ نسے کر سگدے۔ ایں ادارے دے ہیک سابق فوجی سربراہ ارباں روپے دے فنڈ ڈکار کے باہروں ونج بیٹھے اوندا کہیں کُجھ نئیں کیتا پر وسیب اچ وسدے سیت سڑیے لوکاں واسطے انہاں کنوں معمولی جیہاں فنڈ وی کائینی۔ اساں ایکوں چھڑی بدقسمتی نسے آکھ سگدے بلکہ ایندیاں بہوں ساریاں سیاسی وجوہات ہن۔ مثلا۔

1. اے خطہ جیکوں اساں سرائیکی وسیب آہدے ہیں حکومت پاکستان دی کہیں ترجیح اچ کائنی۔ خاص کر اٹھارویں ترمیم دے بعد اپر پنجاب دا تسلط ہیک گھمبیر کالونیلسٹ مائنڈ سیٹ نال ایں وسیب کوں اپݨے سیاسی تے معاشی فائدے واسطے استعمال کیتے۔

2. ایں ویسوں دے منتخب نمائندیں دی بے حسی، اپر پنجاب دی سیاسی ایلیٹ نال انتہائی ذاتی مفادات دے فائدے واسطے جُڑت قائم رکھݨ دی چاہ۔

3. اتھوں دے نوجوانیں دی سیاست اچ عدم دلچسپی تے سرائیکی صوبے دے ایشو کوں نظر انداز کرݨ دی ریت۔

4. سرکاری دفاتر اچ مقامی بیوروکریسی دا ایں خطے نال کہیں قسم دی وابستگی، تعلق تے رشتہ نہ ہووݨ دی وجہ کولو اتھوں دے مسائل کولو ناشناسائی تے ترجیحات دا فرق۔

5. مُختلف بنیادی انفراسٹرکچر دا نہ ہووݨ یا بہوں کم تعداد اچ ہووݨ، جیویں ہیلتھ سینٹر، آفت کولو بچاوݨ آلے ادارے، روڈ، مشینری تے تربیت یافتہ عملے دی شدید کمی۔

اے سارے معاملات سیاست نال جُڑے ہوئے ہن۔ جہے تک ساڈی وسوں دے لوک اپݨی سیاسی سوچ کوں اپݨے مسائل نال نئیں جُڑیندے اوہ تک اے زیادتی تے جبر ساڈے نال تھیندا راہسی، جہے تک ساڈے پڑھے لکھے نوجوان کوں ایں گالھ دا ادراک نئیں تھیندا جو گورننس، انفراسٹرکچر ، وسائل دی تقسیم، کلچرل تحفظ، اختیار تک رسائی تے اپݨی پہچان زندہ رکھݨ دا تعلق سیاسی عمل نال وابستہ ھے اوہ تئیں ساڈی وسوں اچ بے وسی، لاچارگی، غمگینی تے استحصال دے شکنجے ساڈی گردنیں اچ کسیے راہسن۔