اساں قیدی اپݨی ذات دے||سعدیہ شکیل

ݙو جون سقوط ملتان دا کالا ݙینہہ ہر سال وانگوں ایں سال وی کجھ پوسٹاں لیسوں.

کجھ جلوس کڈھیسوں.. وت اوہا پُراݨی چُپ، جیندا نہ سِر ہے نہ پیر ہے.اوہا چُپ. جیرھی تالوں تے زبان دے درمیاں اینویں ہوسے جیویں اونکوں الفاظیں دی حُرمت دا وی علم کوئنی، اوہا چُپ اپݨے ڳل لا ٻہسوں..

آپݨی گُزری مونجھی تاريخ کوں یاد رکھݨ سانگے ݙينہہ مناوݨ کوئی کوجھا کم کائنی.. میں آپ وی رات آپنڑے ݙوہںیں ٻالیں شانزادی اتے حيدر کوں نال ٻلہا تے ملتان دی تريخ اتے سقوط ملتان بارے جوکجھ پڑھيم يا سݨيم انہیں کوں آپݨی تريخ دی سونہہ سنڄاݨ کرواوݨ دی پوری کوشیت کیتم ميݙی دھی شانزادی میں توں سوال کيتے جو 7اماں تساں آہدے وے اساں قیدی تخت لہور دے ہیں.آخر کیوں 204 سالھ گزرݨ بعد وی اساݙی سيت نی بدلی کياوجہ ہے جو جتھاں 2022 اچ باقی قوماں ترقی کریندیاں پِن اُنھاں وانگے آزاد حیثیت ساکوں کیوں نی مِلدی؟

2 جون 1818 نواب مظفر خاں دی شہادت ۔ ملتان دی خود مختار حيثيت دا خاتمہ رنجيت سنگ تے تخت لہور دی سرائیکی خطہ تے با لا دستی جیکوں سقوط ملتان آکھیا ویندے او واقعہ جیکوں آڄ دی قومی تریخ ءچ کوئئ مقام نی ݙتا ڳيا

او درگھی تاريخ جیں سکندر مقدونی دے دور توں گھن تے سکھ تے انگریز حملہ آ وراں دے ادوار تائیں ہک شدید مزاحمت دے عمل کوں جاری رکھیا ہا تریخ عالم ایں ڳالھ دی گواہ ہے جو جدوجہد آزادی ءچ مزاحمت دی اپنی اہمیت تے وݙی حیثیت ہوندی اے مزاحمت دا اے رویہ انہاں قوماں دی رت اچ رچیا ہوندے جہڑھے تاریخی طور تے عظیم ثقافتی ورثے اتے علی ترین اخلاقی اقدار دیاں امین ہوندین حملہ آور تے آباد قاریں دے ݙڈھپ دے غالب آونڑ وچ سب توں وݙی رکاوٹ مفتاح ومجبور قوم دا ایہو تاریخی شعور ہوندے ہیں شعور توں محروم کرن کیتے حملہ اوری نقطہ نگاہ نال مطلوب تاریخ نویسی دا اہتمام کیتا ویندے اتے مفتوح قوم کوں اوندی تاریخی عظمت توں کݙھݨ کیتے ہک احساس ندامت و کمتری دا بندوست کیتا ویندے ايہو کجھ ساݙے نال تے آونڑ والیں نسلیں نال کیتا ویندا پئۓ جیں ءچ تساں برابر دے شریک ہو مزاحمت دے بجاۓ تساں ساکوں تخت لہور دی غلامی کیوں بخشیندو.. کیوں مانواں وت احمد خاں کھرل تے خان مظفر خاں نی ڄماۓ..

دنیا دا عظيم سمجھیا ونڄݨ والاانقلاب موجب نعرہ انقلاب جیں یورپی عالم دا نقشہ بدل تے رکھ ݙتا ہا

دنیا بھر کے مزدورو متحد ہو جاو

مزاحمت دی بنياد تے ترقی کرݨ دا راہ کیوں نی ݙکھایا ڳیا؟ تساں ہمیش ساکوں واقعہ کربلا روݨ تے مکاݨ سانگے سنݨویندے رہ ڳیو اوں ݙینہ دے بارے جݙݨ ٻہتر عظمت دیاں اعلیٰ مثالاں نے دنیا دے عظیم انقلاب دا منڈھ بدھيا ہا، ݙسݨ دے بجاۓ تساں ساکوں ٻہتر مظلومی دا درس کیوں پڑھیندو؟

صدیاں توں ہکی لکیر پٹیندی پئی اے "اساں قیدی تخت لہور دے "

کیوں ساکوں الاوݨ نی سکھایا ڳیا؟ اساکوں ساݙی گنگدامی کھا ڳئئ ہے ساکوں گھٹی اچ پلائی غلامی توں نجات دا سنیہا کیوں نی پیا مِلدا؟

دھی راݨی دے سوالات دے سامہیں میں لاجواب ہامی، خاموش تھی ڳیُم، پچھے ایں خیال مزید میکوں مونجھا کر ݙتا.. جو ساکوں بس خود فریبی دا عذاب کھا ڳئے.. اساں قومی جنگ گھٹ تے شخصی جنگ ڈھیر لڑی ہے، تہوں حالی توڑیں میکوں دھرتی اُتے احمد خاں کھرل تے مظفر شہید جہیں لوک نی پئے ݙسدے…

میں خود پسندی دے ایں کالے اڳواڑ تے کھڑی او دھرتی ڄئی ہاں..

جیڑھی احمد خاں کھرل تے مظفر شہید جہیں حق پرستیں دی مُکاݨ وسیب کوں نی ݙے سڳدی..

اے بے سُہاڳݨ غلام دھرتی دے گُنگے لوکو جے نہ ٻولیسو،،

تہاکوں دھرتی دی کوئی سسڑی تے کُئی پُنل معاف نہ کریسے

سرائیکی عوامی تریمت تحریک پاکستان