بلاول بھٹو دے حلف چاوݨ تیں اعتراض کیوں؟|| زلفی

بہوں سارے پیپلز پارٹی دے دوست تے یوتھئے اج ہیکے پیج تیں نظر آئین ۔اے میڈے واسطے کوئی وڈی حیرانی دا گالھ کائینی بلکہ ایں غیر سیاسی قسم دے گُھٹن زدہ، نرگسیت پسند تے عقل کُل دے فنومنا دا شکار لوک ریاست پاکستان دے اندروں بہوں زیادہ تھی گئین۔ اینجھے ورکرز اپنے آپ اچ اے گُمان پال کے رکھدن جو اساں سب کجھ جاݨ دے ہیں، پارٹی دی لائف لائین ہیں، ساڈے کولو ڈھیر سیانا کوئی کائینی تے اساں ہی سیاسی حالات کوں سمجھݨ دا ادراک رکھدے ہیں باقی سب فارغ العقل تے بونے ہن.

اج دے پاکستان دے سیاسی حالات دا اگر جائزہ گھنوں تاں بلاول دے حلف دی سمجھ وی آ ویسی تے مستقبل دی سیاسی پیش بندی دا وی پتہ لگ ویسی۔۔

پاکستان عمران رجیم اچ ہر محاذ تیں ترٹ بھج، سیاسی تنہائی تے شدید قسم دے مذہبی تے طبقاتی فاشزم دا شکار رہ گئے ۔ عمران حکومت امر بالمعرف آلا منترا جیرھے رنگ اچ سوسائٹی اچ ورتائے اوندے نتائج بہوں ہی خوفناک ہن۔ ایندے علاوہ عالمی سطح تیں غیر ذمہ دارانہ تے سطحی قسم دی سفارتکاری دی وجہ کولو پاکستان جیرھی آئسولیشن اچ لگا گئے اوندا اندازہ اوکوں ھے جیرھا تھوڑا جیہاں وی سیاسی حالات کوں تنقیدی آکھ نال ڈیکھݨ دی صلاحیت رکھدے ۔

مثلا ملٹری اسٹیبلشمنٹ نے بالعموم تے عمران رجیم نے بالخصوص چائنا، سعودی عرب سمیت پورا مشرق وسطی، یوریپئین ممالک، شمالی امریکہ سمیت افریقہ تے سینٹرل ایشیا سمیت ہر ملک نال سفارتکاری کوں انتہائی بُرے طریقے نال ورتئے جیندی وجہ کولوں ساڈے سفارتی تعلقات پاکستان دی تریخ دے بُری ترین نہج تیں ہن۔ اتنا برے سفارتکاری تاں یحیی خان تے ضیا رجیم دے دور اچ وی کائینا ہائی۔ اینجھی صورتحال اچ جتھاں ساڈے تعلقات دا لیول اتنا پتلا ہووے اُتھاں نویں سرو خارجہ تعلقات کوں جوڑݨ تے بہتر کرݨ کوئی ساؤکھا کم کائینی اے ہیک بہوں مشکل ٹاسک ھے۔

ایندے واسطے وزڈم، لابنگ دی صلاحیت ، ڈائیلاگ دی طاقت تے قائل کرݨ دا ہُنر آوݨ ضروری ھے۔ عمران رجیم دے خاتمے کولو پہلے ملٹری اسٹیبلشمنٹ نال جیرھے اندرون خانہ معاملات طے تھائین اوندے اچ ہیک اہم ترین نقطہ اے وی ہا جو ہݨ خارجہ محاذ تیں ملٹری اپݨی لُچ نہ تلیسی تے سویلین لوک انہاں تعلقات کوں نارملائیز کریسن۔ ایں نقطے تیں ملٹری اچ شدید کنفیوژن ہائی تے اندری اندر ملٹری دا اچھا خاصہ حصہ تقسیم دا شکار ہا پر زرداری صاحب انہاں کولو اے گالھ منوائی جو ” ٻس درھے تھی ڳئے” اینف از اینف تُساں ہݨ اے کم ساکوں کرݨ ڈیوو۔ ملٹری اسٹیبلشمنٹ زرداری صاحب کولو ہیک گارنٹی منگی جو اساں ہیک شرط تیں ایں محاذ کولو دست بردار تھیسوں جے کر امور خارجہ پیپلز پارٹی دے قابل ترین لوک سمبھالن ۔ پچھلے پجتر سال کولو ملٹری خارجہ معاملات اپݨے ہتھ اچ رکھئے ہوئے ہن تے او اے کہیں قیمت تیں برداشت نہ ہائی کریندی جو ایکوں کوئی سویلئین حکومت یا لوک چلاون ۔۔۔پر زرداری دے پولیٹکل وزڈم تے ڈائیلاگ دی طاقت نے انہاں کوں مجبور تے قائل کیتا جو ہُݨ او اپݨا کم سمبھالن تےسیاست دانیں کوں اپݨا کم سمبھالن ڈیون۔

اے سیاسی طور تیں بہوں وڈی کامیابی تے پاکستان دی تریخ دا ہیک بہوں وڈا موڑ ھے۔۔! عمران خان جیرھا آئسولیشن تے مبنی خارجہ پالیسی بݨاوݨ تیں یقین رکھدا ہائی اوندے واسطے تے اوندے چاہوݨ آلیں واسطے بلاول تے حنا رںانی دا خارجہ امور کوں سمبھالݨ قطعا ہضم نہ تھیسی ۔ تحریک انصاف دے سپورٹرز دا غصہ تے سمجھ آندے پر ساڈے جیالیں کوں کیا تھی گئے ۔۔!! ایں سوال تیں شدید غور کرݨ دی لوڑھ ھے۔۔!