نامور سرائیکی دانشور استاد محمود نظامی انتقال کر گئے

’’آج صبح دایان کو سکول چھوڑنے کے لیے اٹھا تو جب وہ تیار ہورہا تھا میں نے فیس بک کھولی تو سرمد سلیمان نے اپنے والد محمود نظامی صاحب کی وفات کی اطلاع پوسٹ کی ہوئی تھی۔سارا سرائیکی وسیب انہیں استاد نظامی کے نام سے جانتا تھا۔میرے لیے یہ بہت بڑا صدمہ ہے۔پاکستان آنے کی ایک بڑی وجہ اب نہیں رہی۔ سکول جاتے ہوئے راستے میں دایان نے پوچھا کہ آپ پر زیادہ اثر اپنے والد کا ہے یا نظامی صاحب کا، تو میں نے اسے بتایا کہ میرے والد اور اس کے دادا ساری زندگی علم کی جستجو میں رہے، لیکن ان کا نظریاتی فریم ورک مذہب اور پھر اس میں مذہب اسلام رہا۔ وہ ابن عربی، غزالی، منصور، مرزا غلام احمد، پرویز، رومی اور ایسے دوسرے اسلامی مفکروں، مصلحین اور باغیوں کے درمیان بھٹکتے رہے۔ وہ sceptic تھے۔جبکہ نظامی صاحب کا فکری فریم ورک مارکسی اور صوفیانہ تھا، اور وہ ان پر کامل یقین رکھتے تھے۔ ان کی تجزیہ کرنے کی حس بہت تیز تھی۔ مشکل ترین بات کو عام فہم انداز میں سمجھانے کا ان کا انداز ، لطیفوں سے انہیں اور واضح کرنا، حساس طبیعت، کسان کو اللہ کا ولی سمجھنا۔ استاد نظامی کی کئی یادیں ہیں جو فلم کی طرح اس وقت ذہن میں چل رہی ۂیں۔ مہدی لغاری نے لکھا ہے کہ آنے والے کل کو دیکھنے والا شخص رخصت ہوگیا ہے۔ بے شک۔ استاد نظامی larger than lifeکردار تھے۔ وہ ہمیشہ اپنے چاہنے والوں کی گفتگو، فکر، اور سوچ میں زندہ رہیں گے۔ میں نے دایان کو بتایا کہ فکر اور نظریاتی تیقن کے اعتبار سے میرے اوپر نظامی صاحب کا اثر زیادہ ہے۔ اسے بتایا کہ کیسے انہوں نے میرے اور دوسرے کئی لوگوں میں تنقیدی اور مارکسی فکر کو اجاگر کیا۔دایان جو خود مارکسی فلسفے کا سنجیدہ طالبعلم ہے نے اس پر کہا کہ اس کا مطلب ہے آج میرے فکری دادا فوت ہوگئے ہیں۔‘‘