ہک لغاری سب تے بھاری(ڈوجھی لڑی)|| زلفی

پروگرام دے آغاز تھیوݨ کولو پہلے ہیک بہوں وڈا آوکھا تے نازک مرحلہ ہا جو ایں ناول دے بارے ڳالھ مہاڑ کون کریسی؟ پروگرام دی تیند ستریجݨ کولو پہلے ہیک مختصر جیہاں مشاورتی پینل بݨ ڳیا جیندے اچ صفدر کلاسرہ، مختیار بھٹہ تے قیصر صاحب اپݨی اپݨی صلاح ڈتی۔۔!

طے اے تھیا جو سب کولو پہلے ناول دے حوالے نال ذلفی گالھ کریسی ول پروفیسر میر دی عقابی نظر ایندے چھپے ہوئے ادبی راز پبلک دے سامݨے افشا کریسی، ول لغاری صاحب دے نال آوݨ آلے نامور دانشور تے بول دے اکلوتے تجزیہ کار شاہد لاشاری وی ناول تیں لب کشائی فرمیسن۔ایندے علاوہ کوئی بیا دوست رضا کارانہ طور تیں اپݨے علم دی شمع جلاوݨ چاہوے یا ناول تیں ٹِپݨی کرݨ دا جوکھم چاوے تاں کوئی ہٹک کائینا ہوسی۔۔!

میکوں جڈاں اے اطلاع ملی جو تُساں لغاری صاحب دے ناول وساخ تیں الاوݨے تاں میڈے ہتھیں دے طوطے اُڈ ڳئے۔۔!

پہلی ڳالھ تاں اے ہائی جو میں ہالی تک ناول کوں پڑھیا ہی کائنا ہائی نہ ہی میڈے کولو کتاب ہائی۔ ڈوجھی ڳالھ میں غیر ادبی جیہاں بندہ اے جیڈے ضخیم تے شاہکار ناول تیں کیویں الوا سگداں۔۔؟ میں تھوڑا جیہیں تڈ بدھی پر میزبانیں دی بھر پور فرمائش تے ضد دے اگوں میکوں ہتھیار سٹݨے پائے گئے۔

میں ڈو گلاس پاݨی دے پیتے ترائے چار سڳریٹ پھوک چھوڑے تے سامݨے پٹواریں آلی ٹیبل تیں رکھی کتاب کوں چا کے جلدی جلدی ورقے پھرولݨ لڳ پیا جو ڈیکھاں تے سہی ناول اچ حے کیا۔۔! ایویں ہیک طائرانہ نظر سٹݨ دے بعد میکوں اندازہ تھی ڳیا جو مصنف ناول اچ کیا آکھݨ چاہندے۔۔!

گُمان تے قیاس دا اپݨا نشہ ہوندے ، اساں وی ایں نشے اچ گرفتار تھی کے اپݨے آپ کوں یقین ڈیوایا جو اتھاں جیرھی اٹیلیجینشیا بیٹھی حے او وی تاں گُمان تے قیاس دی عادی حے قلندر گھیو کریسی۔۔!

میڈے ذہن اچ ” میبل اور میں” آلی ہیک کہانی وی اُبھر کے آ گئی جیندے اچ ہیک چھوہر تے لڑکا کہیں کتاب کوں بغیر پڑھیے کیویں تبصرے کریندے ہن۔ ۔۔انسانی دماغ وڈی نا مراد چیز حے اے بندے کوں بہلاوݨ پُھسلاوݨ تے آ ونجے تاں جسٹیفکیشن گول ہی گھندے۔۔!

سٹیج سڃ گیا ، معزز مہمانان سٹیج تیں براجمان تھی گئے تے مختیار بُھٹے اپݨی چسولی آواز اچ سٹیج تیں باہوݨ آلیں دا تعارف کروایا تے پروگرام دی ٻیڑی ٹِھل پائی۔

پہلے پہلے ذلفی کوں بلیدان ڈیوݨ واسطے سٹیج تیں سڈ گھدا ڳیا تے اساں مرشد نذیر لغاری کولوں گوڈے تیں ہتھ رکھ کے اجازت منگی تے ” وساخ ” کوں ہتھ اچ پا کے حاصرین کوں کتاب ڈکھالی تے اپݨے منتشر ذہن کوں کٹھا کر کے شروع تھی ڳئے۔۔! وساخ ہیک مہان ناول حے، اے وسیب دی کہانی حے، ایکوں لغاری صاحب لکھ کے سرائیکی وسوں تیں وڈا احسان کیتے ، ایندے اچ کردار بہوں جاندار ہن جیرھی اپݨی وسوں دے ڈکھ کوں بہوں شاندار طریقے نال نشابر کریندن۔۔ایندا کرافٹ بہوں اعلی حے تے لغاری صاحب آباد کاری کولو گھن کے کالونیلزم دے گھناونے چہرے کوں بہوں چابک دستی نال نشابر کیتے وغیرہ وغیرہ۔۔ہال اچوں تاڑیں دی آواز آئی تاں میکوں ایویں لڳا جیویں میں ناول کوں واقعی پڑھیا ہووے تے ناول تیں میڈی گِرپ بہوں مضبوط حے تاں میں مزید ناول دیاں گنڈہیں کھولݨ لگ پیاں۔۔! میں فورا اپݨی نظم ناسٹلجیا سݨا ڈتی تاں لوکیں مزید واہ واہ کیتی میڈا کونفیڈینٹ مزید ودھ گیا تے میں سمجھیا جو لوظ اُتوں اُتردے پائین تے میں گیان ونڈیندا بیٹھاں۔۔! بس جڈاں اے احساس بندے کوں ویڑھ ونجے جو او گیان ونڈݨ جوڳا تھی گئے تاں پچھیں غلط سہی دا احساس مُک ویندے بندہ اپݨے آپ کوں ” ہائی ٹیبل ” دا فرد سمجھ کے نان سٹاپ شُرلیاں مریندا ویندے۔۔! پندرہ ویہہ منٹ دی گفتگو دے بعد میں پاسے بیٹھے مصنف دو ڈٹھا تاں میکوں احساس تھیا جو صاحب ہوریں کوں پتہ لڳا بیٹھے جو ذلفی ناول کوں ہتھ ہی کائنی لایا تے اے مداری صرف اپݨا سودا ویچݨ دے چکر اچ حے۔۔میں فورا حالات دی نزاکت کوں سمجھ کے سٹیج ولا بُھٹے صاحب دے حوالے کر کے سٹیج آؤ غائب تھی ڳیا۔ تھوڑی دیر بعد میں گیانی کیفیت اچوں نکل کے نارمل تھیا تے ول ہیک عام بندے آلی کار سامݨے ونج کے بہہ ڳیا۔ ایں ویلھے سٹیج تیں ہیک ٻیا نامور دانشور تے سرائیکی دے پروفیسر اپݨی گالھ کریندے بیٹھے ہن۔ ۔۔اوں پروفیسر صاحب کیا کیا گُل کھلائین اے وت اگلی لڑی اچ ۔۔