کا لی||اشولال

ناں تاں اوندا غلام شاہ ھا پر وستی آلے سارے اوکوں شاہ سئیں آھدے ھن تے او وی جواب اچ ہر کہیں کوں جی سئیں جی سئیں ڈو ترے دفعہ ضرور آہدا ہا ۔ تہوں ٻالاں اوندی چڑھ بݨا گھدی  چاچا جی سئیں۔

پر او وت وی ہر کہیں کوں جی سئیں ہی آہدا ریہا۔
اللہ دا ڈتا سبھ کجھ ھا، وڈا ھک حویل ،ڈو ترے کوٹھے،بھوں دا پلا، جیھڑا پورےسال دی کݨک وی سنبھال کے رکھدا ہا۔گھیو کھیر سبزی ہر شئے گھر دی ہئ۔ ہر ویلے کھلدا ودا راہندا جیویں اوکوں کوئی روگ ای نہ ہووے۔ پتلا سکا اتنا ہا جیویں سئے ورہیاں توں روزے نال ہووے۔ کہیں دی توں تکار اتے جھیڑے توں پوہلا رہندا تہوں ساری وستی دا او شاہ سئیں ہا۔
ذال اوندی گانہور بی بی وی غلام شاہ وانگوں نیک اتے رحمدل تریمت ہئی۔ کئی سالاں توں اولاد نہ ھس پر غم بالکل نہی لیندی اتے نہ ہی غلام شاہ کوں اولاد دی چنتا ہئی۔ ڈونہیں آپت اچ خوش نہال ہن۔
  ول چار پنج سالاں پچھوں اللہ اولاد وی ڈے ڈتی۔ ڈونہیں وڈے خوش تھئے اتے اوندا ناں لیلیٰ رکھیونے۔ لیلیٰ بانبڑے پووݨ پئی تاں پتہ لگا جو دماغ دی پوری سوری اے۔ تہوں پوری زندگی او کوئی چالاکی نہ سکھ سگی اتے بال بلوڑے اوکوں للی آھدے۔
اوندی ماء چار پنج کم اوکوں سکھا ڈتے ہن مثال طور اٹا ملݨ، روٹی تھپݨ، گاں ڈوھݨ، کھیر کوں جاگ لاوݨ، اتے دھمی ویلے مٹی کھرکݨ۔ او وی ماء وانگوں چھا وچوں مکھݨ کڈھ گھندی ہئی اتے چھا وستی آلیاں کوں ورتا ڈیندی ہئی۔
ماء وانگوں پیو کیتے دیسی گھیو دی چوری وی کٹ گھندی ہئی۔ نماشیں ککڑیں کوں ترے وڈے کانباں دے کھاریاں وچ ڈھکݨ دا کم او چنگی طرح سکھ گئی ہئی۔ اجاں مسائیں ٻارہ سال دی نہی تھئی جو اوندی ماء مر ستی۔ پر اونکوں کڈھاہیں اے پتہ نا لگ سڳا جو نانگ لڑن نال وی بندہ مر سڳدے۔
ماء دے مرݨ پچھوں شاہ سئیں اونکوں ماء بݨ کے پالا۔ او کجھ ڈینہاں بعد ای ماء کو بھل گئی۔ للی بھانویں جو ہݨ بال نہی وت وی وستی دے ٻالاں نال گیٹی ڈناں، دنبہ سٹی، ختکلیاں، چپہ چرالی وی کھیڈ گھندی ہئی۔
اوندے کہیں کم توں وی نہی لگدا جو او دماغ دی تھوڑی اے۔ وت وی لیلیٰ تو للی بݨن دی گالھ اوکوں کڈھاہیں سمجھ نہ آئی۔
جے کوئی سڑول شاہ سئیں کوں پتر دا طعنہ ڈیوے ہا تاں او کھل کے ولدا ڈیندا ہا۔ ایہاں لیلیٰ ٹھیک اے مجنوں ہوندا تاں پتہ نئی خبرے کیا کریندا ؟
ہݨ للی دے ویہڑے وچ ویہار کھن ککڑیں دا تھی گیا ہا انہاں وچ کوئی ہک وی ککڑ نا ہا۔ رتی چوٹی آلے ککڑ اوکوں بالکل نہن بھاندے۔ سارا ڈیہنہ چگھی چا کے ککڑیں نال کڑ کڑ کریندی راہندی۔
راتیں انہاں کوں ٹوکریاں اچ ڈھک کے اتے سلھیں ڈیوݨ کڈھاہیں نہی بھلدی جو نال دی جھگی دا جھربلا جھٹ آن مریندا ہا۔
ککڑیں اوکوں بہوں چنگیاں لگدیاں ہن۔ ترے وڈے کانباں دے کھارے ہݨ تھوڑے پوندے ہن۔ اوں ایندا ہکو حل کڈھیا ہا جو ککڑیں کوں پندرہاں توں ودھ ناں تھیوݨ ڈیوے۔ جیویں او انڈے وستی آلے ٻالاں اچ مفت ونڈا ڈیندی ہئی اوویں ککڑیں ودھ ونجݨ ہا تاں انہاں کو وی وستی اچ ورتا ڈیندی ہئ۔ اتنیاں ککڑیں رکھدی ہئی جیڑھیاں ترے ٹوکریاں اچ سوکھے رھوݨ۔ گوڈل بنڑاوݨ دے سخت خلاف ہئی پتہ نئی کیوں۔ ہر رنگ دیاں انہاں ککڑیں اچ ڈو ترے دودیاں اتے ڈو چتریاں ککڑیں وی ہن۔ چتریاں کوں ڈیکھ کے ہمیشاں ایویں لگدا ہا جیویں مشکی تتر وڈے تھی گئے ہووݨ۔
بھاویں جو ککڑ نہی سنبھیندی وت وی اکثرہا ککڑیں گلی دے ککڑاں نال اروڑی پھول گھندیاں ہن۔ للی ایہں گال دا برا نہی منیندی۔ وت وی ککڑ اوکوں چنگے نہن لگدے۔
ککڑیں وچ ہر رنگ دی ککڑ ہئی۔ بھل کالی ککڑ جیھڑی شمور کالی ہئی للی کوں سب توں ودھ پیاری ہئی۔ للی کالی کوں ہک پاسے سڈ کے پیو دی چوری اچوں چوری کھویندی، اوکوں پیار کریندی تے ہاں نال لیندی۔ باقی ککڑیں کوں سوائے دودیاں ککڑیں دے اے پتہ نہ لگا۔ پر دودیاں ککڑیں جاݨ گیاں ہن جو کالی چوری کھڑی کھاندی اے.
کالی ہر ویلے للی دے گرد آل بھنوالیاں کھاندی رہندی تے للی کوں بالکل کلھا نہ تھیوݨ ڈیندی۔ اوندے سوائے للی دی کہیں نال وی دلچسپی نا ہئی۔ حالانکہ کالی وی جوان ککڑ ہئی پر اوکوں وی للی وانگوں کہیں نر ککڑ اچ دلچسپی نا ہئی۔ نماشیں ڈھکیجݨ ویلے وی او ٹوکرے اچ نہی وڑدی۔ اوندا دل کریندا ہا جو رات وی للی نال گزارے۔ پر للی اوکوں زوری نال ڈھک ڈیندی۔
کجھ مہینیاں پچھوں عجیب واقعہ تھیا، کالی کھارے تے چڑھ کے اچیاں اچیاں بانگاں ڈیوݨ لگ پئی۔ للی تاں خوش تھئی جو کالی بانگ وی ڈیوݨ لگ پئی اے۔ پر شاہ جی سمیت ساری وستی حیران ہئی۔ کجھ نحوست اتے بدشگونی سمجھیا تے انت ستھ مولوی صاحب دی وساخ تے ونج اپڑی جو کالی بانگاں ڈیوݨ لگ پئی اے۔ مولوی صاحب فتوی جاری کر ڈتا جو ککڑ دا بانگ ڈیوݨ شریعت دے بالکل خلاف اے، مادی بانگ نئی ڈے سگدی اتے فیصلہ ڈتونیں جو ایکوں کوہ کے ڈھنڈ اچ سٹو۔ آپے کچھواں کمیاں دا رزق تھیسی۔
اجاں ڈھنڈ دے پانڑیں تے کالی دے کھنب تردے ودے ہن جو للی زور دی چیک ماری تے اپنڑیاں ساریاں ککڑیں آزاد کر ڈتونس۔ وت ہک ہک کرکے اناں دے ٹوکرے وی ڈھنڈ اچ سٹ ڈتونس اتے راتیں پنج سال دے ٻال وانگوں چادر تاݨ کے پیو کوں چنبڑ کے سم تھئی جیویں مر گئی ہووے۔