پیپرکرنسی سے تباہی ۔۔۔||گلزار احمد

جدید کیمیونٹی سنٹر کا آڈیا Idea آنے سے پہلے ڈیرہ اسماعیل خان میں عملی طور پر یہ سنٹر ہماری بستیوں میں کام کر رہے تھے۔

ماضی میں ہر گھر میں ہینڈ واٹر پمپ نہیں تھے۔یا کھوئیاں تھیں جس کے پنگھٹ پر صبح عورتیں جمع ہوتیں اور ڈول سے پانی نکال کے گھڑے بھر لیتیں۔یا گاٶں کا کنواں تھا جو بیل چلاتے اور اس سے سارے گاٶں کی عورتیں پانی بھر لاتیں۔اس جگہ درخت لگے ہوتے جن کی چھاٶں میں بیٹھ کر گھنٹوں عورتیں آپس میں ڈسکشن کرتیں۔کپڑوں کے فیشن۔جوتیوں کے ڈیزائین۔زیورات اور چوڑیاں اور پتہ نہیں کیا کچھ ڈسکس ہوتا۔بڑی عمر کی عورتیں پنگھٹ پر اپنے بیٹوں کے لیے لڑکیوں کے رشتے چپکے چپکے سیلیکٹ کرتیں۔ گاٶں کی لڑکیوں کی آپس کی دوستیاں یہی پروان چڑھتیں۔تحائف کے تبادلے جیسے رومال۔چھلے ۔ونگاں بھی یہیں ہوتے۔البتہ دامان اور پہاڑی علاقے کی عورتیں تین چار میل دور جا کر کسی تالاب یا چشمے سے پانی بھر لاتیں۔

دوسرا اہم سنٹر تنور تھا۔تین چار گھروں کی عورتیں ایک تنور سے روٹیاں پکا لیتیں اور گپ شپ بھی جاری رہتی۔تنور کے اندر بینگن بھون کر جو بھرتہ بنتا وہ انٹر کانٹینینٹل کلاس کا تھا۔ ہماری گاٶں کی بعض عورتیں تنور خود بناتیں۔ ہم تین چار لڑکے دریا کی چیکڑی مٹی river silt گٹکوں میں بھر کر لاتے اس کو کوٹا جاتا پھر اس مٹی میں سینڑھی۔۔پٹ سن۔ کوٹ کوٹ کر شامل کرتے مٹی کو گیلا کر کے ایک وار دیتے جب وہ سوکھ جاتا دوسرا۔ تیسرا اور چوتھا اس طرح تنور تیار ہو جاتا۔ پھر مقررہ جگہ رکھ کے چاروں طرف دیوار دیتے اور بیچ میں ریت بھر دیتے۔