"سینگھی میڈا بوچھنڑ ہیوی بوچھنڑ دی گنڈھ کُنجیاں ہِنی”||ثقلین قیس

اج توں کوئی پنج ہک سال پہلیں دی گال ہے پہلی واری سئیں فاروق محرم دی آواز ءچ سُنڑی ہئی ایں توں پہلیں سیف اللہ آصف صاحب ہوراں نال کوئی تعارف کئے نہ ہا پیا. لیکن اے پہلا تعارف ہی کوئی اینجھا جادو بھریا ہا کہ کوئی وی بندہ اگر ممولی جیا ذوق رکھنڑ آلا ہووے تاں ایندے سحر ءچوں نہ نکل سکے .جیویں سوہنڑیں شاعری ہئی اوویں ہی سوہنڑی کر کے گائی گئی ہئی.ایندے بعد آصف صاحب ہوراں کوں جانڑناں ساڈے کیتے ایویں تھی گیا ہئی جیویں کہیں تسے کوں تھل ءچ پانڑیں دی گول ہووے

ساڈا پھر یوٹیوب تئیں تھیندا ہا اوں ویلے سرگودھا رہندا پیا ہم تھل توں پہلی وار نکھیڑیا ہامی .بس ول وسوں دی مونجھ مناونڑ دا ہک منتر جانڑ گھِدا او منتر کڈاہیں ساکوں "روہ تھل "تئیں گھِن ونجیں کڈاہیں "سِندھ بنی "پھرا آوے. کہیں ویلے ساکوں کُٹ دا منگر تے گاوی لسی یاد ڈیوا ڈیوے.

ول کہیں واری ساکوں اللہ سئیں دے ملخ دیاں بیریں تے جالھیں ڈِکھا آوے ایویں سنڑدیں سنڑدیں بندہ خیالیں وچ پوری وسوں اچوں جھات پا گھندا ہئی

میں اج تئیں اکھیں نال نہ روہی ڈِٹھی ہے نہ دمان ڈِٹھا ہے. لیکن آصف صاحب ہوراں دی شاعری دامان روہی تھل پوری وسوں دی ہِک اینجھی تصویر ہے جیکوں پڑھ تے پوری وسوں. اوندا سُنڑہپ اوندے نال جُڑیاں ساریاں شئیاں کانیں کانہیں .بیٹ ,چیتر وساخ دے رنگ ,بوئیاں لانڑیں ہر شۓ کوں محسوس کیتا ہے