سئیں ظفر محمود لاشاری||سعدیہ شکیل

سرائیکی ٻولی دے پہلے ناول نگار ،افسانہ نویس ،ڈرامہ نگاراتے ماہر تعلیم ،،صدارتی ایوارڈ یافتہ ،ادیب لکھاری ظفر محمود لاشاری ،سئیں محمد ابراہیم خان جہڑے جو ہک ویٹرنیری ڈاکٹر ہن دے گھر 9 دسمبر 1948 احمد پور شرقیہ دی وستی محراب والہ وچ ڄمے

ظفر محمود خاں لاشاری ابتدائی تعلیم احمد پور شرقیہ توں حاصل۔کیتی میٹرک دے بعد چنی گوٹھ وچ بطور پی ٹی سی ٹیچر بھرتی تھیے اتے اپݨی باقی تعلیم وی جاری رکھیونے

پرائیٹ طور تے ایم۔اے سرائیکی ایم اے پنجابی اتے ایم۔ایڈ کیتا نال و نال پی ٹی سی ٹیچر توں ترقی کریندے ہوے مڈل اسکول دے ہیڈ ماسٹر بݨئے اتے 2008 وچ ریٹائر تھیے

سرائیکی زبان و ادب دا پہلا ناول لکھݨ دا اعزاز ظفر لاشاری سئیں دے ناویں ہے ،انہیں دا لکھیا ہویا پہلا ناول نازو 1971 میں ادبی مجلس بہاولپور دے زیر اہتمام چھپیا ہا

جہڑا جو 1975توں 1985تائں پنجاب یونی ورسٹی لاہور دے ایم اے پنجابی دے نصاب وچ پڑھایا ویندا ریہے

ظفر لاشاری سئیں دا ݙوجھا ناول پہاج 1987اچ پنجابی بورڈ دے زیر اہتمام چھاپیا گیا اتے ایں ناول دا ادھا حصہ بی اے سرائیکی دے نصاب وچ وی شامل ہے بلکہ مکمل ناول اسلامیہ یونی ورسٹی اسلامیہ یونی ورسٹی بہاولپور دے ایم اے دے نصاب وچ شامل ہے

انہی’ دا ناول پہاج 1974 تو ں 1980 تائں ماہنامہ سرائیکی دب ملتان توں چالھی قسطاں وچ چھپ دا ریہا

انہیں دے افسانیں دا مجموعہ تتیاں چھاواں دے ناں نال وی ہے اتے ایندے نال جگ مشہور شاعر جانباز جتوئی دی شخصیت تے ہک کتاب جانباز جتوئی حیاتی تے فن لکھی

ظفر محمود لاشاری نے پنجاب یونی ورسٹی لاہور دے زیر اہتمام ایم ایڈ کیتے جہڑا مقالہ لکھیا جیڑا جو پنجابی ادبی بورڈ نے خواجہ فرید کے تعلیمی نظریات دے ناں نالوں چھپیا

انہیں سرائیکی لوک سہرے جیں وچ صدیاں پراݨے لوک سہرے شامل کیتے ڳئے ہن جہڑے اسلام آباد توں نہ صرف چھپین بلکہ اے کتاب وی اسلامیہ یونی ورسٹی بہاولپور دے ایم۔اے سرائیکی دے نصاب وچ شامل کیتی ڳئی انہاں اسٹیج ڈرامے وی لکھئے

ایں ڳالھ وچ کوئی شک کینی جو سئیں ظفر لاشاری سرائیکی وسیب دا ہک ٻہوں وݙا ناں اے دبستان َادب دا روشن ستارہ ہن گریل سالھ ،16 مارچ 2020دے اڄوکے ݙیہنہ وار او ایں فانی جہان تو ں جھوک لݙا ڳئے اتے سڄوکے وسیب تے علم و ادب دی دنیا وچ مونجھ ولیٹ ڳئی سرائیکی عوامی تریمت تحریک اپݨے مہاندریں کوں یاد کریندیے ہوے ادا اطہر لاشاری اتے وسیب واسیں توں ارمانی ہیں اللہ پاک انھیں دے درجات بلند فرماوے جنت وچ علیِِْمقام عطا فرماوے آمین۔۔