کارل مارکس کو پیار کرنے والی بیٹی||عامر حسینی

” جو لوگ کارل مارکس کو جانتے تھے ان کے لیے اس سے زیادہ مضحکہ خیز کوئی اور بات نہیں ہوسکتی کہ کوئی اسے بدمزاج، لچک سے خالی اور ناقابل رسائی بناکر پیش کرے، جیسے وہ کوئی مشتری تھا جو ہمیشہ برق گراتا رہتا تھا، مسکرانا تک نہیں جانتا تھا اور سب سے الگ تھلگ بہت دور اولمپس میں بیٹھا رہتا تھا- یہ خاکہ اس شخص کے بالکل الٹ ہے جو خوش باش اور کھلنڈرے پن کے ساتھ ہم میں سانس لیا کرتا تھا- وہ طنز و مزاح سے لبریز شخص تھا- اس کا دل کی گہرائیوں سے نکلا قہقہ اس قدر متاثر کن اور ناقابل ژواحمت ہوتا کہ دوسرے بھی قہقے لگانے پر مجبور ہوجایا کرتے تھے۔ جو اس سے واقف تھے ان کو خوب پتا ہے کہ یہ خاکہ اس انتہائی نرم خو، شریف ترین اور اپنے ساتھیوں کے بارے میں سب سے زیادہ ہمدردانہ جذبہ رکھنے والے شخص سے زرا میل نہیں کھاتا- جو لوگ اسے (مارکس) کو واقعی جانتے تھے ان کے لیے (باکونن کا) خاکہ جہان دلچسپ تضاد ہے وہیں پر یہ انہیں مضحکہ خیز بھی لگتا ہے۔

میری نظر میں کوئی بھی کہہ سکتا ہے کہ ان کی گھریلو زندگی ہو یا ان کا اپنے دوستوں یا محض جان پہچان والوں سے ملنا جلنا ہو، کارل مارکس کی سب سے نمایاں خصوصیات ان کی بے پایاں خوش مزاجی اور بے حد ہمدردی تھیں۔ ان کا مہربان رویہ اور بے حد صبر نہایت ہی شاندار تھے۔ خوش مزاجی سے دور آدمی تو اکثر انتہائی مشکلات سے دوچار ہوتا ہے۔ اسے مسلسل مداخلت بے جا کا سامنا اور بھانت بھانت کے لوگوں کی طرف سے ان سے بے جا مطالبات سنتے رہنا پڑتے ہیں اور یہ چیز اس کا مزاج کو برہم کردیتی ہے۔ ۔۔۔۔۔۔۔ وہ سب لوگ جو کہ انسانی فطرت کا مطالعہ کرتے ہیں تو انہیں یہ عجیب نہیں لگے گا وہ آدمی یبک وقت جنگجو اور آدمیوں کے ساتھ انتہائی مہربان اور شریف النفسی کے ساتھ پیش آتا تھا- وہ سمجھ جائیں گے کہ جتنی شدت سے وہ نفرت کرسکتا تھا اس سے کہیں شدت سے محبت کرسکتا تھا- اگر اس کی تیز قلم کسی روح کو جہنم میں قید کر سکتی تھی تو یہ دانتے کی طرح تھی کیونکہ وہ اتنا سچا اور نرم تھا؛ اگر اس کی طنزیہ مزاحیہ انشاء پردازی ایک تیزاب کی طرح کاٹ سکتی تھی، تو یہی مزاح مصیبت زدہ اور مبتلا لوگوں کے لئے مرہم کی طرح ہو سکتی تھی۔ "