شاید ول ڈیورانٹ کے لیے بھی یہی کرنا پڑے گا۔ لیکن ایسا پوپ کہاں سے ملے گا؟||یاسر جواد

ابھی 75 فیصد سے زائد فرائیڈ پڑا ہے، سارا سی جی یُنگ باقی ہے، وِل ڈیورانٹ کی دس جلدیں پڑی ہیں ترجمہ ہونے کو، میشیل فوکو ہے، دریدا اور لاکاں کے متعلق کتب ہیں، سیمون دی بووا اور سارتر، کارل مارکس اور ابن خلدون ہیں، انتھونی سٹیونز اور نیل ڈی گراس ٹائی سن پڑے ہیں، یورپ پاکستان اور پنجاب کی تواریخ، مسلمان معاشروں کی تاریخ، مسیحیت اور زرتشت مت کی تاریخ، مذاہب کا انسائیکلوپیڈیا، گوتم بدھ کے نظریات، گزیٹیئرز، اور ایک جہان پڑا ہے جسے اُردو میں لکھنا ہے۔ ایک بحرعظیم تاحد نظر محیط ہے ابھی ہم جس کی گیلی ریت پر ہی چل پائے اور بہ مشکل اپنے پاؤں ہی بھگو پائے ہیں۔

اور ن م راشد یاد آ رہا ہے:

(دیکھو، مری کہانی میں رات کے تین بج چکے ہیں

اگر میں بے وزن ہو چکی ہوں…..

اگر میں مریل گدھا ہوں……

مجھ کو معاف کر دو…..)

تلاش ہی وہ ازل سے بوڑھا گدھا نہیں ہے

دھکیل کر جس کو برف گالے

گھروں کے دیوار و در کے نیچے

لِٹا رہے ہیں…..