آوازوں کی کھڑکیاں|یاسر جواد

ہم سب بیس بائیس سالہ نوجوان جب اخبار میں نوکری کرتے تھے تو بہت غریب تھے۔ بعد میں کچھ ایک دوست بھی بن گئے۔ پانچ روپے کا پٹرول ڈلواتے، کھانا کھلانے کی ذمہ داری اُس پر ہوتی جس کے پاس بیس تیس روپے نکل آتے۔ ایسے میں ایک نیم گنجا سب ایڈیٹر بھی کبھی کبھی نظر آ جاتا تھا۔ سانولا رنگ، اُڑتے ہوئے رنگ والی نسواری پینٹ، سہمی ہوئی شخصیت۔

پچیس سال پرانی کھڑکی چند روز پہلے کھلی جب ایکسپریس کے دفتر میں ریکارڈنگ کے لیے وقار احمد نے بلایا۔ میں راہداری میں تھا تو ایک دوست کا پوچھا جو وہاں شفٹ انچارج تھا۔ وقار نے کسی لڑکے کو کہا کہ فلاں کو پیغام دے دے کہ یاسر جواد آیا ہے۔ پیچھے قریب ہی بنچ پر بیٹھے دو آدمیوں میں سے ایک نے اونچی آواز میں میرا نام پکارا۔ یاد کی کھڑکی میں اندھیرا تھا۔ پہچان نہ پایا، لیکن مروتاً کہا کہ ابھی ریکارڈنگ کے بعد آتا ہوں تو بیٹھتے ہیں۔

ریکارڈنگ ہو گئی، باہر آیا، جس دوست کو پیغام بھجوایا تھا وہ ملنے آ گیا۔ میں نے اُس سے پوچھا کہ ابھی کسی نے آواز دی تھی، اُس کا حلیہ یہ تھا، وہ کون ہے؟ اُس نے بتایا، ’’خلیل مغل۔‘‘ پتا کروانے پر پتا چلا کہ وہ اب دفتر میں نہیں ہے۔ ملاقات نہ ہو سکی۔

آج اُس کی وفات ہو گئی ہے۔ آوازیں ایسی جگہوں سے کھڑکیاں کھولتی ہیں جہاں ان کی موجودگی کا ہمیں علم ہی نہیں ہوتا۔

وفات ناموں میں RiP اور اس کے دیگر متبادل کیا لکھنا۔ یاد کا ٹیگ کافی ہے