مارچ 28, 2024

ڈیلی سویل۔۔ زمیں زاد کی خبر

Daily Swail-Native News Narrative

لہذا ساڈی ملٹری جیرھے مقصد سانگے ڈیپ سٹیٹ بنائی ہائی او ہُݨ اپݨے وجود کوں قائم رکھݨ سانگے بہوں پریشان ھے۔ ڈیپ سٹیٹ دا پریشر ھے جو او سیاستدانیں کوں استعمال کرے تے آئی ایم ایف تے بچے کُھچے دوست ممالک کولو قرض گھن کے انہاں دے خرچ پورے کرے۔

ذلفی

۔۔۔۔۔۔۔۔۔۔۔۔۔۔.

جیرھی تباہی نظردی پائی ھے ایں کولو ڈھیر تباہی آوݨ آلے وقت دی مٹی اچ پوری لاتھی ہیوے۔ تُساں اساں مہنگائی دے ہتھوں جتنا اج ذلیل تے خوار ہیں ایں کولو ودھ مہنگائی اگوں ساڈی کنڈ کُٹیسی۔ تُساں آہدے پائے ہوسو جو میں تہاڈے پڈ کڈھوئندا پیاں پر سچ ایہو ھے جو بلا دی چُت ہالی باقی ہیوے۔
ہُݨ آکھسو او کیویں ؟ میں سمجھاینداں ذرا گھوڑی چھاں تیں بدھو۔ تہاکوں اے تاں پتہ ہوسی جو اگر آمدݨ چونی تے خرچ اٹَھنی ہووے تاں اوں جُھڳے دا کیا تھیندے؟ سرائیکی دی مثال ھے ٹکے دی دے کُتی چھ آنے گھیلاوی۔ ساڈی اجکل صورتحال ایہہ ہیوے۔ ساڈی اسٹیبلشمنٹ جیندی ورلڈ اچ کوئی اہمیت نہیں رہ گئی پر او سمجھدی ھے جو شئیت اساں دُنیا واسطے کہیں نہ کہیں ضرورت پاروں انہیں دے کم آ سگدے ہیں، کوئی پراکسی وار دی کہاݨی چلا سگدے ہیں، ایٹمی طاقت پاروں اسلامی مُلکیں دی سلامتی واسطے اپݨی خدمات ویچ سگدے ہیں تے طالبان دے ناں تیں دُنیا کوں ڈرا شرا کے اپݨا دھندہ ولا شروع کر سگدے ہیں۔ پر ایویں ہُݨ ھے کائینا ۔ جنگ ساڈے خطے آؤ شفٹ تھی گئی ھے ، ہُݨ جنگ دے میدان چائنا دے لمے پاسے آلا سمندر، مشرقی یورپ یوکرین ، تائیوان تے شُمالی کوریا ہن۔ ساری امیر دُنیا دا فوکس ہُݨ ایں خطے تیں راہسی تے او اپݨے مفادات کوں بچاوݨ واسطے زیادہ پیسہ اتھاں خرچ کریسن۔ چھڑے یوکرین تیں ڈو مہینے وچ امریکہ تے اوندے اتحادی ہݨ تک چالہیہ ارب ڈالر خرچ کر چُکن تے مزید پیسے خرچ کرݨ واسطے تیار ہن۔
لہذا ساڈی ملٹری جیرھے مقصد سانگے ڈیپ سٹیٹ بنائی ہائی او ہُݨ اپݨے وجود کوں قائم رکھݨ سانگے بہوں پریشان ھے۔ ڈیپ سٹیٹ دا پریشر ھے جو او سیاستدانیں کوں استعمال کرے تے آئی ایم ایف تے بچے کُھچے دوست ممالک کولو قرض گھن کے انہاں دے خرچ پورے کرے۔
ایں مقصد واسطے اُنہیں عمران کوں استعمال کیتے تے اوکوں روس دا دورہ کروا کے مغربی ممالک کوں بلیک میل کرݨ دی کوشد کیتی ھے پر اے چال ہتھوں انہاں دے اپݨے ڳاٹے پائے گئی ھے کیوں جو روس تے چائنا خان دے وزٹ کوں کوئی اہمیت نئیں ڈتی نہ ہی مشرق وسطی اچ ایکوں چنڳا گݨا گئے۔ سیاݨے آہدن جیرھے ویلھے بھولݨی دے پیر سڑدن ول او اپݨے ٻالیں کوں پیریں ہیٹھ چا ڈیندی ھے ۔ اسٹیبلشمنٹ اپݨی جان چُھڑاوݨ دی خاطر اپݨے اثاثے عمران کوں قربان کر کے شہباز کوں فرنٹ تیں گھن آئی ھے تے شہباز آوݨ سٹ سعودی بھڃے، ڈوجھی پاسو چائنا کوں منت ترلے کیتونے پر کڈاہوں ڳالھ نئیں بݨی کیوں جو انہیں کوں اندازہ ھے جو ڈیپ سٹیٹ دے وڈکے ہمیشہ دنیا نال دوغلی پالیسی آختیار کر کے اپݨا کُکُڑ کچھ اچ پا کے مڈی بݨیدے رہ گئین۔ انہاں ساریں آکھیا بھائی آئی ایم ایف نال رابطہ کرو تے او تہاکوں ہا کریندی ھے تے ول اساں وی کجھ سوچیسوں۔ ساڈی سیاسی اشرافیہ تے ڈیپ سٹیٹ آپس اچ گالھ بات کیتی جو ہُݨ کیا کروں۔ کم تاں خچ تھی گئے۔ سیاستدانیں شرط رکھی جو ہُݨ مشکل فیصلیں دا بار رل کے چیندے ہیں تُساں سکیورٹی کونسل دا اجلاس سڈو تے اوندے اچ آکھو جو فوج تے حکومت رل کے مُلک کوں بچاوݨ چاہندن تے ایندے واسطے پٹرول وغیرہ دی قیمت ودھاون ضروری ھے اے ریاست دی بقا دا مسئلہ ھے پر سیکورٹی اسٹیبلشمنٹ اے گالھ نہ منی تے شہباز کوں آکھونے اے بار تُساں چاؤ اساں پس پردہ اپݨا کم کریسوں۔
آخر شہباز حکومت کاؤڑی گولی کھادی ھے تے ہُݨ مارکا وت آئی ایم ایف دو بھج گئین جو ساکوں قرض ڈیوو۔ ایڈوں ڈیپ سٹیٹ خفیہ طور تیں تالی بان نال گالھ مہاڑ شروع کیتی ہوئی ھے ہیک گرینڈ جرگہ افغانستان بھیجا ہوئے جیندے وچ خیبر پختون خواہ دے آفیشل وی شامل ہن تے ایں کولو پہلے آئی ایس آئی دے سابق سر براہ جنرل فیض حمید وی افغان وفد نال مل کے آئے ہن۔ ایں ساری کارروائی پاوݨ دا مطبل ایہو ھے جو ڈیپ سٹیٹ دے اثاثے کہیں تراویں محفوظ کیتے ونجیجن تے نال نال سیاسی حکومت کوں استعمال کر کے قرضہ وی حاصل کیتا ونجیجے۔ جڈاں پندرہ اگست کوں افغانستان اچ تالی بان آئے ہن تے ساڈے وزیر اعظم فرمایا ہائی جو اج ہیک سُپر پاور کوں وت شکست کھاوݨی پائے گئی ھے تے او سُپر پاور اج تئیں ایں گالھ کوں بُھلی کائینی تے او ساؤکھیں ساؤکھیں ساکوں پیسے کائنا ڈیسی۔ اگر ڈیسی تاں اینجھی شرائط رکھسی جیندے نال عام عوام دی زندگی بہوں آوکھی تھی ویسی۔ لہذا اے گالھ سمجھ آندی ھے جو اینجھے ویلھے اندرونی حالات کیا ہن تے ساڈے اسٹیبلشمنٹ تے سیاسی اشرافیہ کتنی مشکل وچ ہن. انہاں کولو کوئی فیصلے نئیں پائے تھیندے، ڈیپ سٹیٹ اپݨے اثاثے کہیں قیمت تیں چھوڑن نئیں چاہندی جیندی وجہ کولو عمران دی اہمیت وی برقرار ھے، ڈوجھی پاسوں سیاسی حکومت کولوں پورے اختیارات نہ ہووݨ دی وجہ کولوں فیصلہ سازی تے پالیسی سازی وچ شدید مشکلات ہن۔ سیاستدانیں کولو اے ہیک بہوں وڈا موقع ہا جو او ڈیپ سٹیٹ کوں ننگا کرن پر او اپݨے ڈر کولو کمپرومائز کر گئین تے ایندے نتیجے اچ او ڈیہوں ڈیہیں مزید کمزور تے غیر مقبول تھیسن.۔ ہُن ایندا منطقی انجام اے نکلسی جو ڈیپ سٹیٹ دے اونر ترقیاتی تے سماجی بجٹ کوں کٹ لا کے اپݨے خرچے پورے کریسن تے عوام مزید تباہی تے بربادی دا شکار تھیسی ۔۔! ڈیپ سٹیٹ دی طاقت دے ہوندیں سے ریاست کڈاہیں عوامی ریاست نئیں تھی سگدی تے نہ ہی موجودہ بحران کولو مستقل بنیادیں تیں نکل سگدی ھے لہذا آوݨ آلے وقت اچ عوام اپنی کنڈ تیں مالش کر کے رکھے۔۔!!!

اے وی پڑھو:

ذلفی دیاں بیاں لکھتاں پڑھو

%d bloggers like this: