لوگ بغاوت کیوں نہیں کرتے؟||امجد نذیر

لوگ بغاوت کیوں نہیں کرتے؟ مزدور کیوں اٹھ کھڑے نہیں ھوتے؟ کیوں انقلاب یا انقلابیوں کا ساتھ نہیں دیتے؟ تبدیلی کیوں نہیں آتی؟ کیوں ایک ہی طبقے کے لوگ بار بار ھم پر مسلط ہو جاتے ہیں؟ مارکسی فلسفی انتونیو گرامچی کے نزدیک اشرافیہ یا حکمران طبقہ نہیں، جیسا کہ مارکس کا اپنا خیال تھا، بلکہ "غالب نظریہ” یہ کارنامہ سر انجام دیتا ھے ۔ حزب اقتدار اور حزب اختلاف دونوں ایک ہی نظریے کے تسلط اور ادارہ سازی سے ہی عوام پر مسلط رہتے ہیں ِجسے گرامچی "ھیجیمونی” یعنی ثقافتی یا نظریاتی جبر قرار دیتا ھے ۔ پاکستان کی حالیہ صورتِ حال اِسکی بہترین عکاس ہے جس میں تینوں چاروں بڑی پارٹیاں ایک ہی نظریے کے پرچار، تقویت اور اِنجزاب میں ایک دوسرے پر سبقت لے جانے کی کوشش کر رہی ہیں ۔ ہر ایک پارٹی شب و روز یہ ثابت کرنے میں مصروف ہے کہ اِس نظریے کی اصل امین اور علمبردار وہی پارٹی اور اسکے ہمنوا ہیں ۔ اور مملکت خداداد میں وہی اس نظریے کا بہترین احترام اور اطلاق بھی کرسکتے ہیں ۔ گرامچی کے خیال میں یہ جبر کسی طرح کے عملی یا جسمانی جبر سے ہٹ کر ھوتا ھے، یہ ایک طرح کا مستقل فطری، قلبی اور ذہنی مزاج اور رحجان بن جاتا ھے کیونکہ لوگوں کو اِسکے بغیر چیزیں اور معاملات لایعنی اور لاحاصل نظر آتے ہیں ۔ کوئی بھی گروہ یا طبقہ اسکو ایجاد یا اختیار نہیں کرتا بلکہ یہ صدیوں سے موجود اور صدیوں ہی سے تعمیر و تشکیل پاتا رہتا ھے اور یکے بعد دیگرے تہہ در تہہ دبیز سے دبیز تر اور گہرے سے گہرا تر ھوتا چلا جاتا ھے اور لوگوں کے اپنے اور باالخصوص اشرافیہ کے مکرر استعمال، اشتمال اور افکار و اظہار سے سالہا سال کی پرتیں سمیٹتا، مقدس، مستحکم، مزین، مضبوط اور حقیقی بنتا چلا جاتا ھے ۔ بعد میں فرانسیسی فلسفی ‘مشل فوکو’ نے اس رحجان اور مزاج کی نئی پرتوں کا کھوج لگاتے ہوئے یہاں تک بھی کہہ ڈالا کہ ہر زمانے کا کے ایک "علمی دور” ہوتا ھے ، یہ دور بہت طویل بھی ہو سکتا ہے ۔ لوگوں کی ایک وسیع تعداد اِسی دورمیں رہ رہی ہوتی ہے، اسی نصاب میں زندہ ہوتی ھے اور اِس علم کی ھیجیمونی یا غلبہ بغیر کسی بھونچال کے صدیوں بلکہ ھزاروں سالوں تک بھی قائم رہ سکتا ھے ۔ کچھ دوسرے معنوں یعنی تاریخی پس منطر میں وہ اِسے ” جینیالوجی آف نالج” یا علم کا شجرہ اور حسب نسب بھی قرار دیتا ھے ۔ سادہ لفظوں میں تو وہ اسے "علم” ہی کہتا ھے لیکن یہ علم سائینس، سماجی سائینس اور منظق سے ماوراء محض اقدار، خیالات اوراعتقادات کا مجموعہ بھی ھو سکتا ھے ۔