سلیٹ پر لکھنے کا رواج ۔۔۔۔||گلزار احمد

ہمارے ہاں مٹی کے برتن گھروں میں استعمال ہوتے تھے۔پانی کا گلاس ۔گھڑا۔کٹوی۔صراحی۔پلیٹیں۔مَٹ ۔پرچ پیالے ۔پتروٹے۔ غرض ہر چیز مٹی کی بنی ہوتی جو یہاں کے کاریگر کمہار بناتے ۔ڈیرہ میں کمہاراں والا محلہ اب بھی مشھور ہے ۔ ایک سو سال پہلے ڈیرہ میں شادی کے موقع پر کمہاروں کو سیکڑوں پلیٹیں پتروٹے بنانے کا آرڈر دیا جاتا جس میں شادی کا کھانا پیش کیا جاتا۔ پھر ہم نے ترقی کی پیتل۔تانبے ۔جست ۔تام چینی۔پلاسٹک ۔اور چینی کے برتن استعمال کرنے شروع کیے۔ بلکہ مسگراں بازار آج بھی موجود ہے جہاں مسگر یا ٹھٹھار تانبے پیتل کے برتن بناتے اور فروخت کرتے۔ وقت نے پلٹا کھایا تو ہماری ہاتھ میں cooker اور non stick

برتن آ گیے۔ معاشرے میں بیماریاں بڑھنے لگیں تو تحقیق ہوئی پتہ چلا یہ جدید برتن صحت کے دشمن ہیں۔

اب کہا جا رہا ہے مٹی کے برتن ہی سب سے بہتر چوائس ہے۔

ہماری مصیبتوں میں غیر ضروری دوائیاں ۔کپڑے ۔برتن ۔گھروں کی ڈیکوریشن اور صنعتی ترقی کے ساتھ مصنوعی مال کی بھرمار شامل ہے۔آج ہمارا اناج ۔دودھ ۔سبزیاں۔پھل ۔گھی۔شھد ۔چینی۔دوائیاں سب مصنوعی ہیں جو زندگی کے لیے مضر ہیں۔ بدقسمتی سے ہم ترقی کرتے کرتے ریورس گیر لگا کے پیچھے چل پڑے ہیں۔

مگر ہم سوچتے نہیں کیونکہ ہمیں سوچنے کی عادت نہیں ہمیں جو لوگ چاہیں آنکھوں پر پٹی چڑھا کر گھماتے رہتے ہیں اور پھر غلام بنا لیتے ہیں۔