امریکی سیاست میں کیا ہورہا ہے؟||محمد شعیب عادل

اس وقت امریکی صدر جوبائیڈن کئی مسائل سے نبرد آزما ہیں۔

پہلا بڑا مسئلہ ویکسین کا ہے۔ امریکہ ایک ایسا ملک ہے جہاں سائنس و ٹیکنالوجی کی ریسرچ اپنی بلندیوں پر ہے۔ اور یہ ریسرچ اور ٹیکنالوجی کی انتہا ہی ہے کہ امریکی کمپنیوں نے انتہائی کم وقت میں کرونا وائرس کی انتہائی موثر ویکسین تیار کی ہے۔ جس کی افادیت 90 فیصد تک ہے۔ لیکن دوسری طرف المیہ یہ ہے کہ امریکہ کی ایک تہائی آبادی یہ ویکسین لگوانا ہی نہیں چاہتی ۔ ہاں جب بیمار ہوتے ہیں اور ان کے قریبی عزیز وینٹی لیٹر پر سسکتے ہیں یا اگلے جہاں پہنچتے ہیں تو پھر ویکیسن پر آمادہ ہوجاتے ہیں۔ صدر بائیڈن نے پچھلے ہفتے لازمی ویکیسن کا حکم دیا جسے ریپلکن اکثریت والی ریاستیں اس حکم کو ماننے کے لیے تیار نہیں۔کچھ ریپبلکن ریاستوں نے جوبائیڈن کے اس آرڈر کے خلاف قانونی چارہ جوئی کرنے کا اعلان کیا ہے۔ ان کا کہنا ہے کہ یہ کسی شہری کی پرائیویسی میں مداخلت ہے اگرکوئی ویکیسن نہیں لگوانا چاہتا تو اس پر زبردستی نہیں کی جاسکتی۔ اسی طرح ان ریاستوں میں بچوں کے سکول میں ماسک پہننے پر بھی کافی شور ہے۔ ریپبلکن ریاستوں کے گورنرز کا کہنا ہے کہ سکول کی طرف سے بچوں پر ماسک کی پابندی انتہائی غلط ہے۔ بچے نے ماسک پہننا ہے یا نہیں اس کافیصلہ اس کے والدین کو کرنا ہے نہ کہ سکول انتظامیہ نے۔